1 Morarame, “Juteutõkara a Ritonõpo omiry tapoise mana,” kary totase Jezu poetory tomo a, Juteapõkomo a.
2 Morarame Jerusarẽ pona Peturu toytose ropa ahtao, imaro tõsezusezuhse toto oxime jekyry tomo, juteu tomo.
3 —Oty katoh juteutõkara maro mexiase? Oty katoh roropa imaro xine motukuase? tykase toto Peturu a.
4 Mame Peturu a turuse ropa toto emero. Kure turuse toto. Ynara tykase ynororo eya xine,
5 —Jope po exiase oturũko Ritonõpo maro. Morarame otuato panõ enease josenety. Nyhtoase sã kapu ae yneneryme. Mame typorohse ymyhtokoxi.
6 Moro ao onokyro panõ enease eeryhpo, kapau, pakira, mũpo, rere, okoi, torõ tõ panono, enara sã tonese ya.
7 Morarame omi etase, “Peturu, moxiã etapako õtyme,” nase sã ya.
8 Yrome ezukuase, “Onetapara ase. Jotỹtory tõ moxiaro. Moinoro ase toto onõpyra, ypoetoae ro,” ase eya.
9 Yrome jezukuase ropa, “Õty ynekarohpyry poko, ‘Jotỹtory tõ moxiaro,’ kara exiko,” nase ropa ya.
10 Morarame nonukuase ropa sã repe, otuato panono. Morarame nyhtoase ropa samo osemazuhme ayhtohpyry panono. Oseruao nyhtoase ropa sã moro. Morarame nonukuase ropa rahkene jũme kapu aka.
11 Morarame ahno neporehkase, oseruao, morotona ytapyĩ taka, Sezarea poe Koneriu nenyohtyamo.
12 Morarame ynara tykase Ritonõpo zuzenu ya, “Moxiã maro ytoko. Enaromyra exiko,” nase ya. Morara exiryke toto maro ytoase rahkene. Moxiã roropa wekyry aroase ymaro 6me Jopepõkomo Koneriu tapyĩ taka.
13 Morarame tytapyĩ tao noturuase yna a. Ynara tykase ynororo, “Taro Ritonõpo nenyokyhpyry nosenepoase ya. Ynara tykase ynororo ya, ‘Opoetory aropoko Jope pona, Ximão enehtohme. Esety akorõ Peturu.
14 Mokyro oturũko oya xine mana oorypyrykõ korokary poko Ritonõpo a opynanohtohkõme,’ nase Ritonõpo nenyokyhpyry ya,” nase Koneriu ya, tykase Peturu eya xine.
15 —Morarame jotururuhtao ro eya xine Ritonõpo zuzenu tyhtose. Tomõse toto kurohtaka kukurohtaka xine aomõtopõpyry saaro.
16 Morarame Jezu a yna zurutopõpyry enetuputyase ropa, ynara katopõpyry eya, “João a imehnõ tõpurihkasẽpo rokẽ mana. Yrome ywy Ritonõpo zuzenu ekaroneme exĩko ase oya xine,” katopõpyry Jezu a yna a.
17 Juteutõkara a roropa Tuzenu tokarose Ritonõpo a, kyya xine Tuzenu ekarotopõpyry saaro. Morara exiryke zae se rokẽ exiase Ritonõpo a, tykase Peturu eya xine.
18 Morara kary etaryke tyya xine sekere tykakehse toto. Kure rokẽ tõturuse ropa toto Ritonõpo poko. Ynara tykase toto, —Kure Ritonõpo mana. Emero kypyno xine mana. Juteutõkara rypyry korokary se roropa mana, orihpyra toto ehtohme, toorihse toto ahtao toto ẽsemãkatohme ropa, tykase toto.
19 Morarame Exitewão totapase ahtao Jezu poetory tõ atapiaka toepase toto totaparykõke. Mame Ritonõpo omiry ekaroryme toytose toto. Penixia pona toytose toto, Xipere pona, Ãtiokia pona, enara. Tyekyry tomo a rokẽ Ritonõpo omiry tokarose eya xine.
20 Mame imehnõ Jezu poetory tõ kynexine Xiperepõkomo, Xirenepõkõ roropa. Tosae xine toytose toto Ãtiokia pona. Moroto tõturuse toto juteutõkara a Ritonõpo omiry kurã poko Jezu Kyrixtu poko.
21 Morarame Ritonõpo zuzenu toto jamihtanohnõko kynexine imehnõ zururuhtao. Tyyrypyrykõ turumekase eya xine Jezu omipona toehtohkõme.
22 Morarame, “Tuhke Jezu poetoryme toehse,” kary totase Jezu poetory tomo a, Jerusarẽpõkomo a. Naeroro Panape taropose eya xine Ãtiokia pona.
