15 Atabo agatming la miga tappo a wain ila nei ga ngongpang? Pa tale ngongpang. Karuk. Titot it la gamialat o muabarit parabira. Pa bubuo onim Iudaia la tale bume tapbu a wain parabira. Karuk.
16 Iruo paga la agimaming ga mipta titot, irie la betong gare la tiesong Morowa na nanam a unuli Ioel tinan ga ugama,
17 “Morowa la tiesong ga ugama, ‘Na la lagorang, eba talang Muranama ruo maun inamaniap ganam gare la ouruktung burunam. Are ratmat ga lop mila teip ga lop mila magaulap mim eba baismeng ma tiesiap tuam gare unulip ma pagap la eba betmeng tubiat. Ga kubap mim la eba magimameng pagap gare kikiritniapup. Ga laipakip mim la eba durimeng ga magimameng kikiritniapup.
18 Migat, eba talang kukunim ang Muranama ruo maun teip ga magaulap tuam o ubi agarit. Ga eba tiesmeng o unuli ma tiesiap tuam ma pagap la eba betmeng tubiat.
19 Ga na la ula kanu ang Ila Kakani la eba muiong, eba makosartang pagap o kukunim nakap na panbinim ga eba makosartang kagup na kimanam, are kaguma o urie la. Ga eba betang olabuan ga kit ga bonat ula kanu na kimanam. Ga eba betieng arubu ira efan, ga ulang la eba betang ga taktogi ba gare olabuan.
21 Na irie tara lagorang, inamaniap ganam la eba marikmeng me ai Ila Kakani meba maagaalie, ga eba ina malagiang ga maionang maset.’
22 “Are ratmat ga mimi inamaniap onim Israel, miptang urio ties tung. Tuga miralava a Iesu onim Nasaret. Iriro migana, mimi kan la amit la angangasong Morowa meba makosarang pagap o turupnuabap ga pagap o kukunim ga kagup onim na panbinim. Ga a iriro tavuk, misinguala irie kan la asagaong Morowa ga muo.
23 Tinan migat, Morowa la mait ara tavukup mim, ga tavuk irie kan la namo akosarang. Ga uaira Iudas ga uabua iruo migana Iesu na kilalap mi. Ga miabua na kilalap ma inamaniap la tale ameit tavuk ang Morowa. Ga akibumei iro maiogun. Ana iruo tavuk la minamua ga uvara.
24 Pa nuvarap la tale kan puoieng meba uiaring a. Karuk. Morowa la oduratong ngitngit ula kiro o nuvarap ga imua Iesu ga titot la inim.
25 Memani, tinan la tiesong Devit aime gare ro, ‘Iriro Ila Kakani, irie la unama kagarat toi busit na kilan a lamige ruang. Ga ualo ngangas toun, are ratmat ga karuk kan a paga ba, la puoong meba togisgisang tapmat.
