13 Pali e Ananias i koli i ta maea, “Bakovi Dagi, iau a longo e huriki ri takia a bakovi iea, ta i ratapile e huriki a tara vomu o Ierusalem.
14 Ngane e huriki a prister dagi ri rudu vilia ge lakavu e huriki ri gale a ramu.”
15 Pali e Bakovi Dagi i takia, “O vano! A bakovi iea, a ngarua ge lakea ne huriki a bakovi a ngatavine i uka ma ria a Iuda, e huriki a hariki, e huriki a Israel, ge vakalongo ria nau.
16 Ga vakasiria na maka maki bara i bole a nimadihi vona na tahuna i ramai iau.”
17 I mavonga, e Ananias i vano, i bele na ruma. I dili, i ru langa a limana ne Saulus, i ta maea, “O turagu o Saulus, e Isu a Bakovi Dagi, a viri i bele vomu na dala na tahuna o laho valai koea, i rudu iau a valai vomu, go matapara tabu, ge dili vomu a Hanu Kiripiripi.”
18 I malaviriri kunana, a maki manga a honana manu i boru tala na matane Saulus, i matapara tabu. Lakea i pesi rike, ni vahilolo.
19 Muri i kani i vaga a tuhana. E Saulus i made turane huriki a murimuri o Damaskus na parava ranga,
20 i lakea malaviriri na maka roho na vaponga, i vakalongo e huriki maea, “E Isu ia a Tuna Vure.”
21 E huriki ri longoa a nitana ri turutu, ri vanana, “Ra bakovi iea, i navai i ta mavonga? Ia kunana a viri i rabalaki e huriki ri luhoi torea e Isu o Ierusalem. Pali ngane i valai koea ta ge lakavu ria, ge turari mule ria ri gi pesi na matane huriki a prister dagi o Ierusalem.”
