7 Emeḡe iduhu gaubanana zu aheu fareꞌe (12), eꞌe ḡoeꞌaniꞌa hudanoga radu guhineꞌohe. Ze ohere zu madai Badiꞌa tuḡure inare haḡaeꞌohe. Kini vazeḡa! Eꞌe, eꞌe ḡoeꞌa guhineꞌeteꞌe uꞌano, Iuda azaḡaniꞌa eḡe rana ḡoere aduga riꞌineꞌohe.
8 Za nuꞌe nougaꞌahi Badiꞌaꞌa rune azaḡa bare ḡaboziꞌuma raꞌeteꞌe ḡoeꞌa mene mae ḡihineꞌohe?
9 Eḡe zuni ibite ꞌahige zamariro. Nazareta neḡa vazeḡa, Iesu niḡa ꞌuꞌuoga veize inare gauine manoḡa rae zamariro.
10 E ꞌuguḡa haḡaiḡa Ierusalema neḡano haḡairo. Ebu Dibuꞌo hauꞌeteꞌe boroboro niḡano, Zuhiꞌa Boro mone azaḡa ḡehaḡa ḡuꞌano ohoziro, zu zimi ruzihi reirotene, eꞌe ḡoeꞌa mae ḡihiniro.
11 Ebu Iuda azaḡa kuru neḡa niduꞌa diuḡadu, 'Bouzoꞌi!' reiro. Ebu bouzeꞌenaꞌa, 'Iesu niḡa sausaune ḡoeroꞌi!' rae tatariro. Zuni e maḡune rudaro ꞌahine, haba faḡano neḡa ꞌahoga ꞌahoga onamadu, Zuhiꞌa Boro mone azaḡa vaḡadu sausauziro.
12 Mada ꞌahogano eꞌe ꞌougihi radu, dibuꞌo hauꞌeteꞌe boroboro niḡano zu ḡoereze odohadu, Damaseko neḡa onamiro.
13 Kini vazeḡa! Madai nemaḡano eꞌe ibiḡano onamiroteꞌea, e adureonoꞌo agaḡa boroꞌa agaranoga horoniro. Eꞌe agaḡaꞌe mada agaḡa vitinoga. Eḡe zu eḡe teite onamiroteꞌe azaḡa agafiꞌ ovairo.
14 Ebu emeḡe niduꞌa rahao higau bauriro, ebu Iuda ḡoeꞌano ihiꞌeteꞌe agoḡa ꞌahoga igiro, raenaꞌa, 'Saulo! Saulo! Ḡa nougadu eḡe sausauheꞌohe? Ḡa ire meiga meiga futuneꞌohe. Aꞌe ḡaeꞌa ḡae bare sausauꞌeꞌohe.'
15 Ebu eḡeꞌa ḡadinenaꞌa, 'Zuhiꞌa Boro, ḡa iniu?' reiro. Zuhiꞌa Boroꞌa naenaehinaꞌa, 'Eꞌe Iesu, ḡaeꞌa sausauheꞌeteꞌe vazeḡa.
16 Iḡunadu edanoꞌi! Eḡeꞌa ḡae mazao fureranataꞌaꞌe, eḡe tuḡure vazeḡano ohoꞌifine, zu horohateꞌe hariḡa vaze mazao meꞌodo zinifine, zu eḡeꞌa ihoꞌiteꞌe ḡoeꞌa rae furenoga veize.
17 Eꞌe Iuda azaḡa zu Iuda mene azaḡaniꞌa sausauꞌihi reiteꞌe zamaḡanonoꞌo mae vaḡiꞌiꞌuma. Ebu zeḡe mazao bare tuḡuꞌiꞌuma,
18 ubumaze raꞌanadu uzaboonoꞌo agaḡa moneo mae ḡihuzoga veize, zu Satani ꞌuꞌuḡanonoꞌo mae vaḡizadu Badiꞌa mone rouga veize. ꞌOugine, sauꞌaze eḡeꞌa rae modiꞌuma, zu zeꞌe eḡe mazao fiadu, Zuhiꞌa Boro veize avo reiroteꞌe azaḡa teite ꞌauḡiꞌuma.
19 Eꞌanoꞌo kini Agripa, eꞌe adureonoꞌo fureranadu ihohiroteꞌe ibiḡano daꞌo dureꞌohe.
20 E ibite Damaseko neḡa azaḡa mazao, ebu Ierusalema neḡa zu Iudea habaꞌa niduꞌa zamaḡano radiuꞌeteꞌe azaḡa mazao, ebu Iuda mene azaḡa mazao zuni haramiro, raenaꞌa, 'Zamaze ḡihunadu, Badiꞌa vaḡe aroꞌi! Ebu haḡai manoḡa haḡaenaꞌa, zamaze ḡihunateꞌe furenoꞌi!'
21 Eḡeꞌa ꞌougiroteꞌe uꞌano, Iuda azaḡaniꞌa dibuꞌo neḡano obohe tiro, ebu uḡuhe ruhihi reiro.
22 Rehano Badiꞌaꞌa danahe onaoo izidi, e ꞌada edauꞌohe, ebu vaze zuhuꞌanonoꞌo boro ḡonaga zeḡe niduꞌa mazao hari tiba hina rae fureneꞌohe. Eꞌe ḡoeꞌaꞌe peroveta azaḡa zu Moseꞌa vesuꞌu naginiꞌa fureraꞌuma reiroteꞌe ḡoeꞌa daꞌo.
23 Eꞌe ḡoeꞌaꞌe, Keriso ani zaharaniꞌuma, ebu ibite runeonoꞌo bare ḡabodiꞌuma, ebu aneꞌa Iuda azaḡa zu Iuda mene azaḡa mazao ḡabone hidiꞌuma agaḡa haramoḡa haramiꞌuma.”
24 Pauloꞌe ꞌouge raeꞌenogano, Festoꞌa ḡoere ḡihauꞌenaꞌa, “Paulo! Ḡa baboraneha. Ḡa ufeta mirihiroteꞌeꞌa mae baboꞌeha.” rae reiro.
25 Rehano Pauloꞌa naenaeninaꞌa, “Ḡihiꞌa vazeḡa Festo, eꞌe mene baboraneha. Eḡeꞌa raꞌeteꞌe ḡoeꞌaꞌe ḡoere huga zu edaꞌeḡa.
26 Kini Agripa ani, ꞌadi haḡaiḡa niduꞌa edeḡa ꞌahine, eꞌe mene rihauꞌenaꞌa huga niꞌohe. Mazaḡa e edeḡa kini Agripaꞌe haḡai ꞌadi niduꞌa igi hauḡiro, mazaḡa eꞌe haḡaiḡaꞌe guniꞌano mene fureraro.
27 Kini Agripa, ḡa peroveta azaḡa ḡoere mae ḡihineꞌe hehe? E edeḡa, ḡa mae ḡihineꞌohe.”
28 Ebu Agripaꞌa Paulo ninaꞌa, “Ḡa mada futuꞌano ḡoere tahiḡa rae furenadu, eḡeꞌa Kristenio tiroꞌi raꞌe rehano, aꞌe mene idaḡa.”
29 Pauloꞌa naenaeninaꞌa, “Mada futuꞌa ga faḡaꞌe ago zamaroꞌi! Mazaḡa e Badiꞌa mazao ꞌahige kurauꞌohe, ḡae zu ꞌada igiꞌeteꞌe azaḡa niduꞌa eḡe teigoga, rehano ḡuꞌano ohoheꞌetaꞌaꞌe ahiḡa.”
30 Ebu kini Agripa, gavana vazeḡa Festo, zu Berenike ebu eꞌea ehorinuteꞌe azaḡa niduꞌa iḡune edaro.
