2 Eꞌea Iuda vazeḡa ꞌahoga, niḡa Akula hidiro. Aniꞌe Ponto habaꞌa vazeḡa. Itali habaꞌanonoꞌo inuga Priskila teite Korinto neḡa onaadu, mada nu daꞌo radiro, mazaḡa Roma zuhiꞌaḡa, niḡa Klaudioꞌa, “Iuda azaḡaꞌe niduꞌa Roma neḡanonoꞌo vaḡinoꞌi!” rae ziro ꞌahine. Ebu Paulo ani, ze ḡiaziꞌ onamiro.
3 Paulo zu zeḡe moni gauḡaꞌe tiba: taruha ogoneꞌeteꞌe faraiḡa rafaḡa ꞌaune turinido. Eꞌanoꞌo Pauloꞌe zeḡe teite radadu gauido.
4 Ebu aniꞌe Bana Madaḡa madaḡa niduꞌa, Iuda azaḡa kuru neḡano haramido, ebu Iuda zu Giriki azaḡaniꞌa Zuhiꞌa Boro mazao fioga veize inare ḡoerido.
5 Silasi zu Timoteoꞌa Makedonia habaꞌanonoꞌo onairotene, Paulo ani, mada niduꞌa haramo moneo daꞌo gaue hunido, ebu Iuda azaḡa mazao “Iesuꞌe Keriso.” rae doḡoꞌani furenido.
6 Rehano ze Paulo haramo ꞌue ḡoerinu, zu ḡoere sauꞌa hina roninutene, aniꞌe dabuaḡa zuꞌizuꞌinadu ziro, raenaꞌa, “Za ire roga diuḡoꞌidene, aꞌe zae sauꞌa uꞌano roꞌi! Eꞌe adugaꞌe eḡe mazao oꞌoꞌa. E izidionoꞌoꞌe onamadu, Iuda mene azaḡa mazao haramiꞌuma.”
7 Ebu ani, Iuda azaḡa kuru neḡa modadu, vaze niḡa Titio Iusito, ani ne onamiro. Aniꞌe Badiꞌa kurano haudoteꞌe vazeḡa. Ani neꞌe Iuda azaḡa kuru neḡa genaḡano.
8 Iuda azaḡa kuru neḡa ibitohauꞌeteꞌe vazeḡaꞌe niḡa Krisipo. Ani zu neḡano radiudoteꞌe azaḡa niduꞌa Zuhiꞌa Boro mazao fiiro. Korinto neḡa azaḡa ḡehaḡa zuni Paulo haramo egadu, Zuhiꞌa Boro mazao fiiro ebu bapatizo meiro.
9 Ohere ꞌahogano, Zuhiꞌa Boroꞌa iḡunao Paulo niro. “Ago rihanoꞌi! Rehano ꞌize harame onamoꞌi! Hebeꞌo ago ꞌue radoꞌi!
10 Mazaḡa eꞌe ḡae teite radiuꞌohe. Vaze ꞌahoganiꞌa zuni sausauꞌoga veize mene agato ḡaniꞌuma, mazaḡa ne ꞌadaoꞌe eḡe none reꞌuma azaḡa ḡehaḡa.”
11 Eꞌanoꞌo Pauloꞌe Korinto neḡano muri tiba zu bato fuꞌo tiba fare (6) radadu, Badiꞌa ḡoere ihozido.
12 Vaze ꞌahoga, niḡa Galio, aniꞌa Akaia habaꞌa gavanaḡa reiroteꞌea, Iuda azaḡaniꞌa tiburanadu, Paulo obone tiro, ebu kota habaꞌa tutune onamiro.
13 Ebu raenaꞌa, “Vaze ꞌadiꞌe, vazevazeꞌa Badiꞌa mazao kuranoga veize, zamaze auꞌohe. Badiꞌa ꞌahoga mazao kurauꞌetaꞌaꞌe, Roma azaḡa goro.”
14 Ebu Pauloꞌa ḡoerihi raꞌenogano, Galioꞌa Iuda azaḡa ziro, raenaꞌa, “Egoꞌi! Iuda azaḡa! Vaze ꞌahoganiꞌa goro variꞌifo, ga haḡai sauꞌa boro haḡaifone, eḡeꞌa ḡoereze ego zinifo.
15 Rehano zaꞌe Iuda azaḡa mone ḡoeꞌa ga niḡa ga goroḡa nunu moneo taꞌirotite ḡoꞌanoꞌidene, zae daꞌo ḡoꞌane fainoꞌi! Eꞌe ꞌuguḡa kotaḡa mene haḡaiꞌuma.”
16 Ebu Galioꞌa kota habaꞌanonoꞌo tuḡuze buziro.
17 Ebu zeḡe niduꞌa, Iuda azaḡa kuru neḡa ibitohauꞌeteꞌe vazeḡa, niḡa Sositene obone teadu, kota habaꞌa ꞌusiḡano bouniro. U Galioꞌe ḡiane reꞌoreꞌiro.
18 Pauloꞌa Korinto neḡano ꞌize mada ḡehaḡa radiroteꞌe enogano, Zuhiꞌa Boro mone azaḡa muhizadu, Suria habaꞌa ruhau onamiro. Priskila zu Akulaꞌa ḡatine onamiro. Pauloꞌe ꞌize ꞌizema ruhanogano, Kenekrea toḡatoḡaḡano iguḡa variꞌiro, mazaḡa ani ibite Badiꞌa mazao kuranadu, ḡoere rinede tiroteꞌe zamaḡano radiunu ꞌahine.
19 Ze Efeso neḡano feurirotene, Priskila zu Akulaꞌe eꞌea ohoze modiro, u aniꞌe Iuda azaḡa kuru neḡa diuḡadu, Iuda azaḡa teite hari manoḡa ḡoꞌaniro.
20 Zeꞌe Pauloꞌa zeḡe teite eꞌea faḡa radoga uminiro rehano, ani mene mae ḡihiniro.
21 Rehano ani muhize iḡuneꞌenaꞌa, ꞌahige reiro. “Badiꞌaꞌa uratine, zae vaḡe bare onaiꞌuma.” Ebu ani Efeso neḡanonoꞌo ruhau onamiro.
22 Pauloꞌa Kaisarea neḡano feurirotene, Ierusalema neḡa onamadu, ekalesia azaḡa teite hido titiro, ebu bare Antioka neḡa onamiro.
23 Paulo ani, mada mene ḡehaḡa Antioka neḡano radiroteꞌe enogano, eꞌeanoꞌo iḡunadu, Galatia zu Ferigia habaꞌano neḡa ꞌahoga ꞌahoga onamiro. Ebu Zuhiꞌa Boro tahiꞌa tahiꞌa niduꞌa inaraziro.
24 U Iuda vazeḡa ꞌahoga, niḡa Apolo, ani Efeso neḡa onairo. Aniꞌe Alesandria neḡa vazeḡa. Ani faifairu ḡoereꞌeteꞌe vazeḡa zu buka zaḡoḡa zuni faine ederoga.
25 Zu Zuhiꞌa Boro ibi fairu ederiroteꞌe vazeḡa, ebu zama niduꞌa hanadu inare ḡoerido zu Iesu hariḡa hugano daꞌo ihozido. Rehano Ioaneꞌa bapatizoziroteꞌe daꞌo edeḡa.
