16 Gêdêŋ têm gêmuŋŋa eŋ gêlôc gebe lau samuc sêsa tauŋ nêŋ lêŋ.
17 Mago eŋ gêwa tau sa ŋa moasiŋ, kêkêŋ kom aŋga undambê gêdêŋ amac ma têm tomoasu gêlôm amac to kêkêŋ mo gêôc amac tôŋ aŋgôŋ totêmtac ŋajamgeŋ.”
18 Ŋaclagêc sêsôm bi ŋ tonaŋ, mago kêtu kôm kapôêŋ gebe sêkô lau auc êtu sêkêŋ da êndêŋ êsêagêc atomŋa.
19 Go Judawaga ŋagêdô aŋga Antiokia to Ikonium sêmêŋ ma sêjam lau pom tonaŋ ôkwi e têtuc Paulu ŋa poc ma sê eŋ kêsa aŋga malac gêja seboc eŋ gêmac endu.
20 Go ŋacseŋomi sêgi eŋ auc sêkô e gêdi sa kêsô malac gêja. Ŋageleŋ êsêagêc Barnaba sêja Derbe.
21 Ŋaclagêc sêsôm ŋawae ŋajam lasê aŋga malac tonaŋ e sêjam lau taêsam ôkwi, go sêmu sêja Lustra to Ikonium ma Antiokia Pisidiaŋa kêtiam.
22 Agêc sêpuc ŋacseŋominêŋ ŋalêlôm tôŋ to sêjac biŋsu êsêac ŋajaŋa gebe sêwi biŋ sêkêŋ gêwiŋŋa siŋ atom. Ma sêsôm biŋ tonec gêwiŋ gebe “Ŋandaŋ taêsam êpi aêac acgom, go tasô Anôtônê gamêŋ tana.”
23 Go ŋaclagêc sêjaliŋ lau sa kêtôm gôlôac dabuŋgeŋ têtu laumata. Go sêjam dabuŋ mo to teteŋ mec ma sêsuŋ êsêac dêdêŋ Apômtau, taŋ sêkêŋ gêwiŋ eŋ naŋ.
24 Go sêsa Pisidiaŋageŋ e jasêô lasê Pampulia.
25 Sêjam mêtê aŋga Perge su acgom, go sêsêp Atalia sêja.
26 Aŋga tonaŋ sêlac jasêsô Antiokia, malac taŋ gêmuŋgeŋ sêkêŋ êsêagêc sêsêp Anôtônê moasiŋ ŋalêlôm to sêsakiŋ êsêagêc kêtu kôm, taŋ sêgôm su naŋŋa.
