11 Na tahuna ri masia a maki e Paulus i ratea, ri gale tala na nita Likonia, ri ta maea, “A bakovi nga, a vure ru vulo manga bakovi, ru puru valai ne hita!”
12 E Barnabas ri galea e Seus, e Paulus ri galea e Hermes, a vuhuna ia a viri i habi a ngava.
13 A roho na vure e Seus i pesi tabukoi, polovavo na tanga dagi. Lakea a prister ne Seus i bole valai na poridala na tanga dagi a maka bulmakau, a hurumade ni basi. Ge a nihabi na apostolo nga.
14 Pali na tahuna a apostolo e Barnabas e Paulus ru longo vona a maki ri ngaru ni ratea, ru rape a varakia ne rua, ru nunu lakea ne ria, ru gale tala, ru ta maea,
15 “I navai mu rata mavonga? Maria a bakovi tavula kunana manga mua! Miri valai koea miri ngaru ni vakalongo mua vona a Velenga Kamumu, mu gu ha taro a maka maki tavula nga, mu gu ramai a Vure mahuri, a viri i ratarike a hunu, a malala, a dari, turana maki lobo i tabuli ne tou.
16 Hosi i matataro e huriki i uka ma ria a Iuda ri ramai kunana a ningaru ne ria.
17 Pali i uka ma i kapiloho liu, ge uka a viri ge lohoka vona. I vakasiri vakaroro a ningaru vona ne mua: I vakaboru vilia na hunu a vala, i rata a maka maki ni kani kamumu ri koru rike, ri ramai a parava ne ria. I habi a maki ni kani i kupo ne mua, i rata mua mu vivi.”
18 Ru rata a ngava nga, pali e huriki ri tabana ri ngaru ni habi a nihabi ne rua.
