7 manarâ maŋjeŋic goroŋkeme wareckerâ mumbiŋ, “Ŋic dâŋeŋgopieŋ ʒi jaŋe Galilaia ŋic sasawa,
8 jaŋe weniŋuc erâ dâŋnâŋec sâc dâŋepie manapene dâŋrune marac efârekac?
9 Nâŋâc ʒi Pataŋic â Medeŋic â Elamŋic, erâ Mesopotamia mâreŋkonec â Judaia mâreŋkonec â Kapadokia mâreŋkonec â Ponto mâreŋkonec â Asia mâreŋkonec
10 â Frigia mâreŋkonec â Pamfilia mâreŋkonec â Aigita mâreŋkonec â Africa mâreŋkonec Kirene hae rârec rârec irecnec, nâŋâc Romaŋic
11 â Judaŋic mafa â hae fâri erâ Kretaŋic â Arabia ŋic. Nâŋâc iŋuczi juhuc dâŋnâŋec sâc Anutu mâsi sâko‐ticnere biŋedâŋ mupie manaŋgopeneŋ.”
12 Ŋic jaŋe iŋuc murâ maŋjeŋic goroŋkeme kâuc barâ nazaŋ gazaŋ erâ mumbiŋ, “I wemo mâsi mo?”
13 Gâcnezi ine aposolo mufec muriŋ ejarehuc mumbiŋ, “Jaŋe waiŋ opâ gapecmâc nâmbieŋte maŋjeŋic bibiriwakac.”
14 Eme Petoro e âgofâcne 11 jaŋehec domahuc dâŋ hahaŋne barâ ʒiŋuc jazawec: “Judaŋic â Jerusalem haeo juŋgopieŋ sasawa, no dâŋ ŋazape hazec‐ŋeŋic râerâ mananiŋ.
15 Ŋoŋe ŋic kecʒi jaŋere muŋgopieŋ ‘Waiŋ opâ nâku maŋjeŋic bibiriwakac.’ Iŋuc aricne. Hae miŋecne furekacte wemocko waiŋ opâ nanʒapeŋ.
16 Porofete Joelezi findaŋdâŋ kecʒiŋuc qâreŋkewec i sanaŋkekac hâcne:
17 ‘Anutuzi mukac: Juku mâreŋ dameŋne bembeŋkeha, no Mâro‐nane ŋic ʒeŋgoma sâcke‐jarepemu; eme otâ ŋokâfâc‐ŋeŋic findaŋdâŋ muniŋmu, socɋârifâc‐ŋeŋic wiac ʒâŋe furu honeniŋmu, â ŋic ŋokac qizecfâc‐ŋeŋic guŋ fârine mananiŋmu.
18 Erâ kiŋaŋ qaqa ŋic ŋokacfâc‐nane dameŋ ira Mâro‐nane sâcke‐jarepe findaŋdâŋ muniŋmu.
19 Erâ mupe faic sambâŋko ʒâŋe furu wiac fuaocmu, â juwic mâreŋko fuŋne qaqa mâsi fuaocmu, soc â ʒoc â hosâc rombâŋ.
20 Ʒoaŋ ʒâŋene hâpoocmu, â mosa ʒâŋene socsoc eocmu, ehame Wofuŋte dameŋ maickeocmu, dameŋ biaŋ sâko hâcne.
21 Eme ira Wofuŋte ʒâŋe riwaseckeniŋmu, jaŋe sisipirickonec batarac‐jopazo.’
22 “Israe ŋicbureŋ no ŋazape mananiŋ: Jesu Nazarete haeonec e Anutuzi neŋgoc ŋesiŋ ŋecnehame ŋondeŋ‐ŋeŋicko tâpiri sâko‐ticnezi mâsi â wiac ʒâŋe furu bahuc, Anuturaonec wahawec, irec fuŋne‐ticne bataniŋkeme honembiŋ.
23 E hâcne Anutuzi mârâc jaha maname fowecte hata mutaracnewec irec sâcko ŋoŋe wiac ecnehuc doc barâ ŋic qâpuc jaŋerao râepie maripoŋko qapie hâmowec.
24 E hâcne hâmoczi gozi kime Anutuzi gozi bacneme ɋârerâ faharewec. Hâmoczi e wemocko sakarezac.
25 Dawidizi ere hâcne kecʒiŋuc muwec: ‘No Wofuŋ hone dendeŋnehuc mi beheekopac, e fâre‐naneo domahame biric boroc mi epemu.
26 Irec bunane biaŋkeme nameŋzi mu ʒeri ekopac, erâ sahac‐nanezi wâc sâcne ŋec foc eocmu. Go mi qaisocnutec hâmoc haeo ʒâziŋkepemu, â Tiriŋicge mi behetec gârecke ʒaŋ eocmu.
28 Go jujure hata nowatumeŋ, maigao ʒeri bubiaŋ guru dindiŋ bâfua‐narecmu.’
29 “Âgo bureŋ, no mimiŋne‐nâŋec Dawidi ere acmâc ŋazape, e hâmome duckembiŋ, eme ʒâŋeruŋ‐ticne hone manac ehuc jueŋgopeneŋ.
30 E porofete juweczi ʒiŋuc manawec: Anutu e ɋâricfâc‐nane jaŋeraonec moc âkendâŋneme nore ŋicwofuŋ ŋeŋetacko ŋeocte mupaŋke‐narewec.
31 I manahuc juwicnao Kristo fafahare‐ticnere hâcne muwec, ‘E hâmoc mi qikiŋnecneocmu â sahac‐ticne gârecke ʒaŋ mi eocmu.’
32 Eme Jesu e hâcne Anutuzi baɋâreme fahareme nâŋe ʒâŋe fâri‐nâŋeczi hone‐fârembeŋ.
33 Eme Anutu mefârenao risie feme Tiri Mâro biŋe qanâre‐kicne e hâcne Mamaczi qikiŋnecneme soreme wahame fuŋne‐ticne hone manac eŋgopieŋ ʒine hâcne.
34 Dawidi e jahacne sambâŋko mi fewec, mâc dâŋ kecʒiŋuc ine muwec: ‘Wofuŋzi nore Wofuŋ âzâcnewec: Ware fâre‐naneo ŋehaŋtec,
35 râsifâcge guruc‐jopape kikegere ââtesiŋ enʒepieŋ.’
36 Irec Israe ŋic mâmâc sasawa ʒiŋuc mana sanaŋkenʒepieŋ: Ŋoŋe Jesu maripoŋko qambiŋ, e Anutuzi Wofuŋ â Kristo âkendâŋne‐nârewec jukac.”
37 Petorozi dâŋ iŋuc jazame maŋjeŋic henʒaŋneme e jahacne â aposolo gâcne ʒiŋuc mu wioc ejarembiŋ: “Ŋic âgofâc, nâŋe weniŋuc epene sâckeocmu?”
38 Mupie Petorozi ʒiŋuc jazawec: “Ŋoŋe maŋŋeŋic bârisierâ Jesu Kristo ʒâŋene biŋeckehuc Miti Opâ ruapie sâqocne‐ŋeŋic tâmirezejec, eme Anutuzi Tiri Mâro tahacke‐ŋareocmu wâc.
39 Ŋaŋacne â ɋâricfâc‐ŋeŋic â ʒoricko juraŋgopieŋ, Wofuŋ Anutu‐nâŋeczi hefârec‐ŋopaocmu sâc, ŋoŋe hâcne Tiri Mâro biŋe qaŋare‐fârekicne.”
40 Petoro e iŋuc murâ dâŋ gâcne ʒuhuckerâ uŋ sawaŋ ejarehuc ʒiŋuc jazawec: “Ŋoŋe ŋic bâbâsifucne jaŋere guruonec wiserâ wefupie rocŋopazo.”
41 Eme ʒoaŋ gie bapa ira ŋic 3 tauseŋ jaŋe Petorore mitidâŋ mana ʒakiepie Miti Opâ rua‐jarepie Jesure kikefuŋfâc jaŋerao ʒuhuckembiŋ.
42 Eme aposolo jaŋe miti jaza qazuc epie mananiŋte henʒiriŋnehuc jumbiŋ, ehuc maŋzi roroc bâmbândeŋ erâ tiwâre â nunumure gâbâ tumaŋne jumbieŋ.
