4 Ehame mâreŋ rune jaŋe menao homa domame honerâ nazaŋ gazaŋ erâ mumbiŋ, “Ŋic e ʒika qaqa jâmbâŋ, hâwecko mi hurâ hâmojecte ʒira tiŋko wefume okacne fisicnekac.”
5 Eme Paulozi homa qatatiŋkeme ʒocko hume homazi mi kiwec tinac fâsâcne domawec.
6 Domahame jaŋe sisiwiŋ fuacneocmu me onʒoŋ jaha hâmorâ rândiŋkeocmu muhuc woŋec ŋembiŋ. Ŋekuhapie iŋuc me iŋuc mi ecneme honerâ mumbiŋ, “Ŋic e nemu.”
7 Jumbeŋ irec bembeŋnao ŋicbomboŋ‐jeŋic ʒâŋene Popilio ere hae mâreŋ fowec. Eme ŋic eki hâcne hezu hewâneŋ enâreme ere ficko ʒoaŋ jahec â moc ŋeŋe juju embeŋ.
8 Juhapene Popilio mamac‐ticne huc fuacneme woke socnehec qawec. Eme Paulozi manarâ ficticnao ferâ mene qizecnao râerâ numuhuc bâpiaŋkewec.
9 Iŋuc eme biŋene manarâ nuc irec ŋic gâcne huc ʒâic‐jeŋichec fisipie iŋuc jaha ɋiɋicne bacjopawec.
10 Eme irec okacne ŋic jaŋe bubiaŋ mana‐nârehuc uruc jauŋ fekicne enârembiŋ. Erâ rara dameŋ maickeme hata nâsiŋ wiac wokeo râe‐nârembiŋ wâc.
11 Nuc ira hâcne juhapene mosa jahec â moc tarame woke furunao fembeŋ. Woke i Alesandria haeonec, qoruc‐ticnao nemu hahac ɋa jahere hawari bakicne. Nâŋe jumbeŋko ijaha woke i ŋehuc juhame hoemaŋ tarame ira hâcne ferâ rambeŋ.
12 Raku Siraku haeo fisirâ raʒirâ ʒoaŋ jahec â moc jumbeŋ.
13 Irecnec mâŋâŋ hecnehuc bac bâŋoric raku Regioŋ haeo fisimbeŋ. Eme hae fureme râpefuŋ‐nâŋecko mula qahuc ficne suec‐nâpome ŋafe ʒoaŋ jajahec sawa raku Puteoli haeo fisimbeŋ.
14 Fisipene hae irec miti mamanazi hefârec‐nâpopie ʒoaŋ 7 jaŋehec ŋeŋe juju embeŋ. Eme irecnec mocwâc raku Roma haeo fisimbeŋ.
15 Eme hae irec miti mamanazi biŋe‐nâŋec biac manambiŋte gâcnezi wareku Apio haeo bâfuac‐nâpombiŋ â gâcnezi Tetrabeŋ haeo bâfuac‐nâpombiŋ. Eme Paulozi honec‐joparâ Anutu daŋge âzâcnerâ bubiaŋ manawec.
16 Roma haeo fisipene kiazi mume Paulo kâpâcwâru ficko mi râembiŋ, momori moczi soŋaŋkeha fic omane mocko ŋec juc ewec.
17 Juhame ʒoaŋ jahec â moc eme Judaŋic jaŋere micne hefârec‐jopame fisipie dâŋ ʒiŋuc jazawec: “Âgo bureŋ, no Judaŋic âgofâc‐nâŋec mi kisuec‐jopapo â mimiŋnefâc‐nâŋec jaŋere dâŋ mi qâsuapo. Eme jaŋe sifu Romaŋic jaŋerao qikiŋnupie Jerusalem haeo kâpâcwâru bacnumbiŋ.
18 Eme Romaŋic jaŋe fuŋne‐nane mu rituc ehuc nuniŋte kiŋnane basarâ firuecnuniŋte mumbiŋ.
19 Ehame Judaŋic jaŋe sanaŋne qatarapie Roma ŋicwofuŋzi dâŋnane mutaraocte mupo, Judaŋic âgofâc‐nâŋec jaŋere dâŋ ʒira bawarerâ mupemurâ ine mi warepo.
20 Eme no irec hâcne honec‐ŋoparâ ŋoŋehec muc manac enaŋte hefârec‐ŋopape fisimbieŋ. No ine Israe ŋic woworic‐nâŋec ewec ere erâ kâpâcwâru ŋic epo jukopac ʒi.”
21 Iŋuc muhuc jazame mumbiŋ, “Ocna Judaŋic mâreŋfuŋ‐nâŋecko jueŋgopieŋ jaŋe gore dâŋ mi qâreŋke‐nârembiŋ me ŋicjeŋic moc mi sorepie ware gore bahacdâŋ mume manambeŋ.
22 Irec dâŋ bajuekic i go gahac mutec mananaŋte muŋgopeneŋ. Â opâ ruakicne jaŋere ʒiŋuc manaeŋgopeneŋ: Mâreŋ sâc ŋiczi mu supaic ejareeŋgopieŋ.”
23 Iŋuc murâ ʒâfo babac embiŋ. Eme i maickeme Judaŋic bocjahazi Paulore ficko tumaŋnembiŋ. Eme Anuture uucmaŋte dâŋ binaŋ uupicte fuŋkerâ jazahuc juhame hae ŋafewec, ehuc Mosere sâcmutâc dâŋqâhâcko â porofete jaŋerao biŋedâŋ qâreŋkekicne fokac i Jesurao fâri fideteŋ ewec, irec fuŋne muhuc maŋuruc qajarewec.
24 Ejareme ŋic gâcne jaŋe dâŋticne âgo bambiŋ â gâcnezi ine qaisockembiŋ.
25 Ehuc mu qaqatarac epie Paulozi dâŋ mocjaha ʒiŋuc jazawec: “Tiri Mârozi porofete Jesaja ecneme mimiŋnefâc‐ŋeŋic sowine dâŋ kecʒiŋuc jazawec:
26 ‘Go rarâ ŋicguru keci ʒiŋuc jazac: Hazeczi mamana i mananiŋmu, maŋzi mamana tara ine mi eniŋmu. Ʒâŋezi fifi finiŋmu, wiac hohone tara ine mi eniŋmu.
27 Ŋicguru ʒi jaŋe maŋjeŋic sanaŋkekicne, â hazec‐jeŋic bâzickekicne, â ʒâŋe‐jeŋic hâmonʒambiŋ. Irec ʒâŋe‐jeŋiczi wiac mi hone taraeŋgopieŋ, â hazec‐jeŋiczi wiac mi mana taraeŋgopieŋ, â maŋjeŋiczi wiac mi manasu‐hâmoeŋgopieŋ, ehuc maŋjeŋic mi bârisiepie no wemocko bâpiaŋ‐jopazapo.’
28 Irec no ŋazape mananiŋ, Anutuzi bâbâpiaŋ hata bâfuawec i qâpuc jaŋere biŋe ekac, jaŋe sâcne mana aŋac eniŋmu.”
29 Iŋuc muhuc jazame Judaŋic jaŋe jaŋackoaŋ mu wioc bocjaha eec ehuc rambiŋ.
30 Eme Paulozi jara 2 Roma haeo fic omanao juhame ŋic jaŋe iqickehuc jumbiŋ.
31 Iqickepie Anuture uucmaŋte dâŋ binaŋ ejarehuc Wofuŋ Jesu Kristo ere fuŋne hâwicmâc jaha muhezuc tâmiricko jaza qazuc ehuc juwec.
