9 Ŋic jaŋe raku hatao fombiŋ. Hae fureme mocwâc raku hae bâmbeŋkezo ehapie ʒoaŋ ʒâʒâŋiŋko Petorozi numuocte fic maŋne mocko fewec.
10 Numuku nânâre hâmorâ mume rike bâmoc ecnehapie Wofuŋzi maŋko fuac ecneme wiac ʒiŋuc honewec:
11 Sambâŋ aŋkeme wiac moc racsâko tinac tofane 4 ira basanaŋkehuc mâreŋko âkesuepie wahawec.
12 Maŋnao qowi â homa wiac â wipe fuŋne fuŋne fowec.
13 Ehame dâŋ moc ʒiŋuc fuawec: “Ajoc Petoro, hezu nâc ec.”
14 Eme Petorozi muwec, “Wofuŋ, misac, no wiac hecke‐nârekicne â mamakâcne moc mi nâekopac.”
15 Mume dâŋ harierâ ʒiŋuc fuawec: “Anutuzi muʒurekac i goki mi surec.”
16 Wiac i fuame jahec â moc eme izia racnehec fârepie sambâŋko risie fewec.
17 Eme Petoro e wiac ʒâŋe furu honewec irec maŋ kukumbuc ecnehame Konelio ŋicfâc‐ticne jaŋe haeo fisirâ Simoŋ ficticnere wio wio raku bâfuarâ motâcko domahuc
18 wiracne basac ehuc mumbiŋ, “Simoŋ, ʒâŋene moc Petoro, e fic ʒira jukac me?”
19 Eme Petoro e wiac ʒâŋe furu‐ticnere manatâc qâtâc ehuc jaha juhame Mârozi ʒiŋuc âzâcnewec: “Manakic, ŋic jahec â moc fisirâ go basacguŋgopieŋ,
20 irec go hurâ jaŋehec racmurâ maŋ bahac mi ezemec, ŋic i noni mupe warembieŋ.”
21 Eme Petorozi jaŋerao hurâ muwec, “Basacnuŋgopieŋ no hâcne ʒi, wemo wiacte wareŋgopieŋ?”
22 Mume ŋic jaŋe ʒiŋuc âzâcnembiŋ: “Momori soŋaŋ Konelio, e Anutu araŋ bacnehuc tiŋne juekac, â Judaŋic jaŋe ere manapie sâckeekac, e hâcne tiri aŋelo moczi fuacnerâ go ficticnao hefârecgurâ micgaonec dâŋ manaocte âzâcnewec.”
23 Iŋuc mupie Petorozi hezu hewâneŋ ejarewec. Fohapie hae fureme e â Jope haeonec opâ ruac gâcne mâmâc ŋic jaŋehec rambiŋ.
24 Jaŋe hatao ŋafe moc forâ raku Kaisarea haeo fisimbiŋ. Konelio e wiacfâcne â âgo qomâfâc‐ticne hetumaŋ‐jopame woŋec juhapie fisimbiŋ.
25 Fisirâ Petorozi ficko fezo ehame Koneliozi ware maŋfuŋnao fodaperâ muac baafec ecnewec.
26 Ecneme Petorozi ro bafaharehuc ʒiŋuc âzâcnewec: “Faharec, no ŋic jaha wâc.”
27 Eme muc manac ehuc ficmaŋko ferâ ŋic tumaŋnerâ ŋepie honec‐joparâ ʒiŋuc jazawec:
28 “Ŋoŋe Judaŋic nâŋere fuŋne manaŋgopieŋ, nâŋe ŋic furune ŋoŋehec ââgo â iiqic mi enaŋte aka henârekicne. No ine ŋoŋe wâwânâŋhec â hone suŋgiŋne mi muŋarepemurâ Anutuzi fuŋne naza nowatuc ewec.
29 Irec hâcne hefârecnupie warepemurâ mi quŋkepo. Eme ʒi hefârecnumbiŋ irec mupie manape.”
30 Iŋuc mume Koneliozi ʒiŋuc âzâcnewec: “No wiac ʒâŋe furu honerâ juwarehape miŋecgac ʒoaŋ gie bapa jahec â jahec ekac irec dâŋ binaŋ egarepe. No owâ gieo numuhape ŋic moc ŋaqi‐ticne tatamacnehec norao fuarâ
31 ʒiŋuc nazawec: Konelio, Anutuzi nunumuge manarâ bâmecgere mana biaŋkewec.
32 Irec go Jope haeo ŋic sorec‐jopatec Simoŋ, ʒâŋe‐ticne moc Petoro, jowa warenʒepieŋ. Eki wase‐ticne Simoŋ, becsahac bapa, ere ficko ŋeŋe juju ekac; ficticne hâwecmecko ŋekac.
33 Eme no irec hâcne ŋic sorec‐jopape gorao fâmbiŋ. Eme go dâŋnane manarâ warekicte bunane biaŋkekac. Eme ʒi Wofuŋzi dâŋ gazawec i mutec mananaŋte Anuture maio tumaŋnerâ ŋefâreŋgopeneŋ hâcne.”
34 Eme Petoro e micafec erâ ʒiŋuc jazawec: “Anutu e ŋic nâŋâcne sahac‐nâŋeckopec maname feriŋ wahariŋ mi eekac i mana‐jâmbâŋkekopac ʒi.
35 Ŋic gurune gurune jaŋeraonec gâcnezi e araŋ bacnehuc aimuŋ jupie jaŋere maname mitio rorocjopane eekac.
36 Anutu e Israe ŋic nâŋerao dâŋ fârine bâfuawec, irec biŋe ŋoŋe manaeŋgopieŋ; e Jesu Kristo, ŋic sasawa nâŋâcne Wofuŋ hâcne, soreme wamadâŋ biaŋ nâzâ‐fârewec.
37 Erâ Judaia mâreŋko wiac fuawec, irec biŋe wâc ʒiŋuc manaeŋgopieŋ: Johane e ŋic Miti Opâre dâŋ jazahame gie qanaŋ Galilaia mâreŋkonec domarâ rawec;
38 â Jesu Nazarete haeonec e ine Anutuzi tâpiri â Tiri Mâro tahackecneme mâreŋ rârecke rac warec ehuc ŋic jauŋ bacjopawec â Sataŋzi bâumbeŋ‐jopawec jaŋe bâpiaŋ‐jopa‐fârewec. Anutuzi dopeckehame gie i hâcne bawec.
39 Eme Judaŋic nâŋere mâreŋko â Jerusalem haeo wiac muwec bawec i nâŋe hone manac efârembeŋ. Ehame juku maripoŋko qapie hâmowec.
40 Hâmorâ fohame ʒoaŋ jahec â moc eme Anutuzi bâɋârewec. Bâɋârerâ râeme fua sipuac ewec.
41 Erâ ŋic kosa jaŋerao mâcne, ŋic biŋe mumufâc‐ticne, Anutuzi mârâc rowosâec‐nâpowec, nâŋerao sawa fuawec. Nâŋe hâcne hâmockonec fahareme ehec nâ gugumec â mumac qamanac embeŋ.
42 Erâ Anutuzi e ŋic ɋâricne â hâmokicne mumutara‐nâŋec âkendâŋnewec, irec biŋedâŋ ŋic guru sâc mutaniŋkerâ jazanaŋte munârewec.
43 Eme e manasiŋkeniŋmu jaŋe ʒâŋe biŋe‐ticnere erâ sâqocne tâmire‐jareocmu, i porofete jaŋe mufua‐fârembiŋ.”
44 Petoro e dâŋ iŋuc muhuc domahame, manahuc ŋembiŋ jaŋerao Tiri Mâro wahawec.
45 Eme Judaŋiczi opâ ruac, Petorohec rambiŋ, jaŋe Anutuzi ŋic qâpuc Tiri Mâro tahacke‐jareme bipic tatara ejarewec.
46 Ŋic qâpuc jaŋe dâŋmarac furune dâŋehuc Anutu musokapie manambiŋ hâcne. Eme Petorozi ʒiŋuc muwec:
47 “Nâŋâc Tiri Mârohec embeŋ, ŋic kecʒi jaŋe iŋuc jaha fua‐jareme Miti Opâ wemocko sakare‐jarezo.”
48 Iŋuc murâ mume ŋicfâcne jaŋe Jesu Kristo ere ʒâŋeo ʒuhuc‐jopahuc opâ rua‐jarembiŋ. Eme jaŋe Miti Opâ ruarâ Petoro sakarepie ʒoaŋ gie bapa gâcne jaŋehec ŋeŋe juju ewec.
