Aposolo 15:9-34 in Siane

⁹ Etito gimami ya mona ailo mele gedeto, ido mona ailo mele ledámaiye. E’e, moda koli kikito umanako, lifimanina ya kilili o gedaiye.

¹⁰ Eti nemo nenako, linate nediti Goti siya olu kala-kala lo edae? Lamoki ido autefo-motaki keina ya mofunumo ya ogoufámonimo keinawa ya nediti olu mofu gedae?

¹¹ E’e, etito minámaiye. Wekola Yesu Kilisto ya nasafilila yakafo olu omude kami yaidana oto wenenawa yaki olu omuni kaiye, loto koli minone, loto logimaiye.

¹² Etito logimaito, mau minamo muki ya ka meto fulitaito minoti Gotikafo Polote Banabasite gimaito ya aumala gilibami neta ya ailo feka wenena minagu olu oloto pi gedami ka Polote Banabasite logimaito koli minae.

¹³ Ka logimi fuli lito Yemusikafo eti loto logimami, Mono wenenane-motao, ka lomo ya kolife loti kolalo.

¹⁴ Gotikafo ya namo wenenane minenawae, loto komu ya ailo feka wenena minaguti aimola wenenala iyaina oto kiyaba o gedami mona ya Saimonikafo lolomaito kolone.

¹⁵ Ido polofete yaki ka ayamaidana eti lamo,

¹⁶ Wekolakafo ka asa wito eti loto limo, Aiga namo itibito oto Defiti numuna lumu fou limo ya kofa kuto numuna u kopa wimo ya olufe lenae.

¹⁷ Yamu wenena liliga yaki ido ailo feka wenena nanimo wenenane minenawae, loto lo melomo wenena yaki ya Wekola moni wilinawamo ne. Ido ailo feka wenena nanimo wenenane minenawae, loto Wekolakafo netawa eti imo ne, loto

¹⁸ Wekola komu adeinalekati netawa kolami we yakafo eti limo ne, loti ka mono lufuwau (Amo 9:11-12) ya nemo ne.

¹⁹ Yamu kane-manene kolomo ya ailo feka wenena yate eleyapa witi Gotidoka wamo wenena ya keina gimámenune, loto kolowe.

²⁰ Keina gimámoto ka fulo gedeto etito logiminuwe, Konuma-kobina suki gotinina gimamo ya ánalo. Ido kopa olu onámalo. Ido neta kenobalalo ipili witi ofo folamo ya ánalo. Ido wanu yaki ánalo, loto lufuwa wi fulo gedenune.

²¹ Yamu adeinaukati numudo-numudo Mosese kala ya lo oloto mele-mele minato, ido oiya ya ayaidana oto Sabatiku-Sabatiku Yuda wenena mono numuni negu-negu ya katoto koli-koli o minone, loto logimaiye.

²² Ena aposolo ido mono kiyaba weki lakoina mono wenena mau naba muki yaki ka lo kifititi minagu yauti we lele ma olu oloto piti, Polote Banabasiteki lakoina Antiyoku numudo unawae, loti mono wenena kiyabani we ya kuliya Yudasi kuliya ma ya Basabasi, ido we ma kuliya Sailasi ya olu oloto piti lufuwa witi gimato oluti wae.

²³ Wato, lufuwawa wi fulo gedeti eti lamo, Aiyo, lamo aposolo ido mono kiyaba we ya mono wenenatina minonimo yate linate ailo feka wenena ya Antiyoku numudo minamo, ido Silia ebau minamo, ido Silisia ebau minamo, ya setinane, loto aiyokoiyo ka fulo gedone.

²⁴ Ena wenena ma lamodokati uti linatedoka u fedeti ka lamo yakafo seti-muludigu fiti kati-manidi ya olu kopaitae, loti lamo ka ya kolone.

²⁵ Aya kawa ya kolito olu mau wito ka lo kifito sete-mulude olu lawoko meleto we maleka iyaina oto wewaki Polote Banabasite sete-mulude gimonimo weki lakoina linatedoka gilifi melone.

²⁶ Wewa lele ya Wekola Yesu Kilisto lonola olainako, yamu wenena gini fulunune, loti igamu ae.

²⁷ Yamu Yudasite ido Sailasite yate wenikafo ka lufuwa wi fulo gedonimo yaidana oto logimato kolinagilae, loto gilifi melogeto wae.

²⁸ Ido lamoki Ouna Felegagaki ya keina maki olu mofu gedámenune, loto efe loto kolonimo yamu mona etiti logiminumo ya meyalo melalo.

²⁹ Ido suki goti ya konuma kobina ofo ki gimamo ya linate moi witi ánalo. Ido wanu yaki moi witi ánalo. Ido neta ma kenobalalo ipili witi ofo folamo yaki moi witi ánalo. Ido kopa-napa olu onamo mona yaki melámalo. Linate netawa-matawa ya ekena oti moninawamo ya lalo ne. Modae, loti ka lufuwa wi fulo gedae.

³⁰ Wemomoma ya gilifi melato, uti Antiyoku numudo ya lumuti mono wenena muki olu mau wi gedeti, lufuwama ya gimato,

³¹ katoti koliti olu auma wi gedeti fulamo lufuwa yamamu seni-muluni lalo iye.

³² Etito Yudasite Sailasite ya polofete minoti ya wenena ya olu aila wi gedeti olu auma wi gedenune, loti ka naba logimi minaiye.

³³ Wewa lele ya kamena fana Antiyoku numudo minaito ya Yesu mono wenenala yate you amene mona ya mino gedenaiye, loti wenena gilifi melamo wenenadoka ya itibito unawaiye, loti gilifi melae.

³⁴ Gilifi melafa, Sailasi ya amaleka fa minenae, loto fa ne.

⁹ Feito bibo ya mona eito molo betito, ido mona eito molo ledámiye. E'e, moda holi hikito muwanako, lifimatina ya hilili o betiye.

¹⁰ Feto nebo nenako, hemotina nedafaito Goti lula li hala-kala lo edae? Lemogi ido awatefo-motagi hena ya mofunubo ya ogofuwámonibo henawa ya nedafaito li mofu betiyae?

¹¹ E'e, feito minámiye. Wenaba Yesu Kilisto ya aifa li dowa lo ledaibo monala yakafo li nomude waibo yaidana oto weninawa yagi li nomudina waiye, loto holi minone, loto lobiye.

¹² Feito lobito, mau minabo muki ya hameme oti minato Gotikafo Polote Banabasite bito ya aubala itibibo idafa ya eito feka wenina minagu li oloto pi betibo ha Polote Banabasite lobiyaito holi minae.

¹³ Ha lobi hulito Yemusikafo feto loto lobibo, Mono weninane-motao, ha lobo ya holifefe loti holilo.

¹⁴ Gotikafo ya nemo weninane minanae, loto homu ya eito feka wenina minaguti eimola weninala weuna fito hiyaba o betibo mona ya Saimonikafo lolumito holiyone.

¹⁵ Ido polofeti yagi ha ayamaidana feto labo,

¹⁶ Wenabakafo ha wase ito feto loto libo, Aliga nemo liwila oto loto Defiti numunala lukoto lumibo ya hofa huto numunala u hopa wibo ya lifefe lanowe.

¹⁷ Yagunu wenina malekama yagi ido eito feka wenina neimo weninane minanae, loto lo molobo wenina yagi ya Wenaba wita anabo ne. Ido eito feka wenina neimo weninane minanae, loto Wenabakafo idafawa feto feyaibo ne, loto

¹⁸ Wenaba homu aidenati idafawa holibo we yakafo feto libo ne, loti ha mono lufuwau (Amo 9:11-12) ya nebo ne.

¹⁹ Yagunu hane-mananeu holiyobo ya eito feka wenina yasi elepa iti Gotidoka uwabo wenina ya hena biyámanune, loto holiyowe.

²⁰ Hena biyámoto ha fulo betito feito lobinune, Hoba-hobina sugi gotitina biyabo ya námilo. Ido hopa li unámilo. Ido idafa henobalalo ipili iti hofo fuliyabo ya námilo. Ido lunu yagi námilo, loto lufuwa i fulo betinune.

²¹ Yagunu aidenauti numudo-numudo Mosese hala ya lo oloto molo minato, ido onesa ya ayaidana oto muki Sabatiku-Sabatiku Yuda wenina mono numunatina negu-negu ya hitoto holi-holi o minone, loto lobiye.

²² Ena aposolo ido mono hiyaba wegi maina mono wenina mau naba muki yagi ha lo fukoti minagu yauti we loiti ma li oloto piti, Polote Banabasitegi maina Antiyoku numudo unae, loti mono wenina hiyabatina we ya huliya Yudasi huliya ma ya Basabasi, ido we ma huliya Sailasi ya li oloto piti lufuwa iti biyato liti uwae.

²³ Uwato, lufuwa i fulo betiti feto labo, Aiyo, lemo aposolo ido mono hiyaba we ya mono weninatina minonibo yasi hemotina eito feka wenina ya Antiyoku numudo minabo, ido Silia ebau minabo, ido Silisia ebau minabo, ya setinane, loto aiyo-weiyo ha fulo betiyone.

²⁴ Ena wenina ma lemodokati uti hemotinaloka u fedoti ha labo yakafo lutina-hatinau fiti hatina-manadinau ya li hopaitae, loti labo ha ya holiyone.

²⁵ Aya hawa ya holito li nuba oto ha lo fukoto lute-hate li mako moloto we malekama weude fito wewagi Polote Banabasite lute-hate biyonibo wegi maina hemotinaloka idipi molone.

²⁶ Wewa loiti ya Wenaba Yesu Kilisto ononala liyainako, yagunu wenina hofo beti fulinune, loti lalafu ae.

²⁷ Yagunu Yudasite ido Sailasite yasi wetinagunu ha lufuwa i fulo betiyonibo yaidana oto lobiyato holinigilae, loto idipi mologeto uwae.

²⁸ Ido lemogi Weuna Felegi ya hena magi li mofu betiyámanune, loto fefe loto holiyonibo yagunu mona feti lobinubo ya meyalo molalo.

²⁹ Ido sugi goti ya wetina-idafa hofo hi biyabo ya hemotina moi iti námilo. Ido lunu yagi moi iti námilo. Ido idafa ma henobalalo ipili iti hofo fuliyabo yagi moi iti námilo. Ido hopa-napa li unabo mona yagi molámilo. Hemotina idafa-adafawa ya ekei oti moninabo ya dowa ne. Modae, loti ha lufuwa i fulo betiyae.

³⁰ Wemolima ya idipi molato, uti Antiyoku numudo ya lumuti mono wenina muki li nuba o betiti, lufuwama ya biyato,

³¹ hitoti holiti li auba i betiti fulabo lufuwa yamagunu lutina-hatina dowa liye.

³² Feito Yudasite Sailasite ya polofeti minoti ya wenina ya li aila i betiti li auba i betinune, loti ha naba lobi minaiye.

³³ Wewa loiti ya hamena fana Antiyoku numudo minaito ya Yesu mono weninala yagi you amena mona ya mino betinaiye, loti wenina idipi molabo weninaloka ya liwila oto unaiye, loti idipi molae.

³⁴ Idipi molafa, Sailasi ya aifa meleka minanowe, loto aifa ne.