19 “Mewö mötketmö, Juda jitŋememe yeŋön Judia miaŋgöreŋ keu mi qetala tuarenjoŋ aket. Mewö aketka siksauk aka lömböriiga nöŋön köna jaruba kun qahö miwikŋaiba kewö kapaŋ köla qesial, ‘Ni ölöp Rom sitinöŋ anbiga sisa kiŋnöŋ keuni mindiŋgöi diŋgima.’ Mewö qesibiga melaim niŋgigetka ki kayal. Nani Juda kambu yeŋön kazik al niŋgigetmö, töndup yeŋgö sileŋine keu bölöŋi kun ala jim eŋgimamgö qahö mötzal. Mewö qahö.
20 Anutunöŋ azi kun asuhumapkö jöhöjöhö keu al neŋgiiga Israel neŋön keu miaŋgö ölŋi ahumapköra mamböta jörömqöröm ahakzini, nöŋön mönö azi sorokŋi yaŋgöra aka gwaröhöm niŋgigetka tapep (muŋgamuŋga) ki bisizal. Könaŋamni mewö. Miaŋgöra aka merak eŋgeka keukeu eraum mötpingöra köl öröm eŋgibiga ki kaba tokoze.”
21 Mewö jiiga jiget, “Judia gölmenöŋ göhöra keu jiba malgetmö, neŋgöra kimbi kun qahö alget kaiga ehin. Mewöyök alaurupninan miaŋgöreŋök ki kageri, yeŋgöreŋök kunŋan göhö keu buzup me kösohot bölöŋi kun qahö jii mörin.
22 Mi kun qahö jiget mörinmö, uruge keu ahözawi, nini mi ölöp mötpingö mötzin. Göhöreŋ Nazaret pati kambu miaŋgö keuŋi mi gölme dop jigetka ambazipnöŋ qetalgetka likeplikep miaŋgöreŋ goranora keu gwötpuk jiba kazik ahakze. Pati kambu miaŋgö buzupŋan mewö kezapnine gei mötzin.”
23 Mewö jiba Polnöŋ keu kunbuk jimapköra nalö kun areŋgöget. Mi areŋgögetka Juda ambazip jesöŋgöŋan nalö miaŋgöreŋ kaba Pol miri malöhaŋgöreŋ tokoget. Tokogetka söŋanök könahiba Anutu bemtohoŋaŋgö könaŋi jim asariba mali miri söŋauyök. Jisösgö könaŋi möt yaköba möt nariba uruyahöt mosötmegöra kapaŋ köla uru kuŋgum eŋgiba malök. Mutuk Mosesgöreŋ Köna keu aka kezapqetok ambazip yeŋgöreŋ Buzup Kimbi oyoŋda keu miaŋgöreŋök könahiba Jisösgö könaŋi indela miaŋön kondela naŋgöba jiba malök.
24 Buŋa keu mewö jiba maliga tosatŋan uruyahöt mosöta möt narigetmö, tosatŋan mi qahö möt nariba tönpin malget.
25 Nanŋini urumohot qahö ak aŋguba sutŋine mötmöt kambu yahöt aka deŋbingö aket. Deŋbingö aketka Polnöŋ keu kewöyök jii mötket, “Uŋa Töröŋan keu kun kezapqetok azi Aisaiagö uruŋe saŋep ali ambösakonŋini jii mötkeri, mi mönö eŋgöra dopŋine törörök jiyök.
26 Aisaianöŋ keu mi kewö jii ahöza, ‘Gi mönö ambazip kambu kieŋgöreŋ anda kewö jinöŋ mötme: Iŋini mönö kezapŋini ala keu ölŋa mötagun könaŋi möt bibihiba töndup qahö möt asarime. Jeŋinan uba yuai ölŋa ekagun könaŋi ek bibihiba töndup qahö ek kutume.
27 Ambazip kambu kieŋgö uruŋinan mönö köhöiba gwözöŋda ahöza. Kezapŋinan keu möt bibihiba jeŋini kömaziliköba malje. Mewö qahö akeak ewö, mönö jeŋinan yuai ölöp ek kutuba kezapŋinan keu möta uruŋinan könaŋi möt asariba uruŋini meleŋgetka nöŋön i ölöp mem ölöwak eŋgibileŋak.’”
28 Polnöŋ keu mi jim teköba kewö jiyök, “Miaŋgöra iŋini mönö keu kötŋi ki ölöp möt yaköme: Anutunöŋ amötqeqegö Buŋa keuŋi mi mönö kian kantri yeŋgöreŋ ali anma. Yeŋgöreŋ aniga yeŋön mi ölöp kezap ala mötme.”
29 (Polnöŋ mewö jim teköiga Juda yeŋön nanŋinök könöpuk jitnakölik aka goranora erauget öŋgöba eriga mosöta anget.)
30 Polnöŋ nanŋaŋgöra miri kun kusuk söŋgöröŋi memba miaŋgö uruŋe (yara) yambu yahöt jömukŋanök ahöm malök. Miaŋgöreŋ mala ambazip denike yeŋön ekingö kageri, yaŋön mi pakpak ölöp köl öröm eŋgiba malök.
