30 Kimbi mewö ohoba melaim eŋgigetka anget. Köna anda geba Antiokia sitinöŋ aŋgotket. Aŋgota urumeleŋ könagesö köl öröm eŋgigetka tokoget. Tokogetka kimbi mi eŋgigetka oyoŋget.
31 Mi oyoŋgetka miaŋgöra amqeba urukölalep möta söŋgaiget.
32 Judas Sailas yetkön nanŋirak kezapqetok azia mala goro keu gwötpuk eŋgiba urugö naŋgönaŋgö keu jiba mem köhöim eŋgiyohot.
33 Mem köhöim eŋgiba nalö tosatŋi miaŋgöreŋ toroqeba malohot. Malohot teköiga urumeleŋ alaurup yeŋön “Luaibuk anmahot,” jiba melaim etkiget. Jerusalem malohotka melaim etkigeri, Judasnöŋ mönö yeŋgöreŋ liliŋgöyök.
34 (-)
35 Pol aka Barnabas yetkön toroqeba Antiokia sitinöŋ mala ambazip tosatŋi gwötpuk yembuk Kembugöreŋ Buŋa keu kusum eŋgiba uruŋini kuŋgum eŋgiba malget. Mewö.
36 Mewö malgetmö, nalö tosatŋi teköiga Polnöŋ Barnabasgöra kewö jiyök, “Netkön taon miri pakpak liliköba Kembugöreŋ Buŋa keu jim asariba maliri, mönö miaŋgöreŋ liliŋgöba urumeleŋ alaurupniran denöwö maljei, mi ölöp anda eka mötpit.”
37 Mewö jiiga Barnabasnöŋ Jon qetŋi alaŋi Mak qetkeri, i mewöyök waŋgita mohotŋe anbingö mörök.
38 Mewö mörökmö, Jonöŋ mutuk Pamfilia taonöŋ löwöriba etkömosöta yetpuk toroqeba nup qahö meyök. Miaŋgöra Polnöŋ i waŋgita anbingö möri qahö dop kölök.
39 Qahö dop köliga aŋgururuk aka uruŋiri könöp jeiga deŋnohot. Deŋda Barnabasnöŋ Mak waŋgita geba waŋgenöŋ öŋgöyohotka opo seri öröba möröreŋgögetka luhutnöŋ naŋgöi gölme jölanŋi Saiprus miaŋgöreŋ anohot.
40 Anohotmö, Polnöŋ azi qetŋi Sailas meköiga urumeleŋ alaurup yeŋön Kembugö böröŋe al etkiba kalem möriamŋan sel jöhöm etkimapköra jigetka mosöta anohot.
41 Anda mala Siria aka Silisia prowins yahöt mi kutuba liliköyohot. Liliköba Polnöŋ urumeleŋ könagesöŋi könagesöŋi eŋgeka mem köhöim eŋgiba malök. Mewö.
