13 Polnöŋ neŋakurupŋi yembuk Pafos miri mosöta waŋgenöŋ öŋgögetka opo seri öröba möröreŋgögetka luhutnöŋ naŋgöiga anda mala Pamfilia prowinsgö siti qetŋi Perga miaŋgöreŋ aŋgotket. Miaŋgöreŋ aŋgota kinda Jonöŋ etkömosöta eleŋda Jerusalem sitinöŋ liliŋgöyök.
14 Liliŋgöyökmö, yetkön Perga siti mosöta toroqeba anda Pisidia prowinsgö taon qetŋi Antiokia miaŋgöreŋ aŋgorohot. Miaŋgöreŋ aŋgota Sabat kendonöŋ köuluk miriŋine öŋgöba tarohot.
15 Tarohotka köuluk mirigö galöm yeŋön Mosesgö Köna keu aka kezapqetok yeŋgöreŋ Buzup Kimbi oyoŋda welen algetka eta kewö qesim etkiget, “Azi alayahöt, etköreŋ keu kun könagesö urunini kuŋgubingöra ahöza ewö, mi mönö ölöp jiyohot mötpin.”
16 Mewö jigetka Polnöŋ wahöta börö misiba kewö jiyök, “Israel kianurup aka gölme toŋi nembuk Anutu waikŋi memba möpöseimakzei, iŋini mönö kezap ala mötket.
17 Israel ambazip kambu nanine bemnini mi Anutu. Yaŋön bömönurupnini möwölöhöm eŋgiiga ambösakonurupninan Ijipt gölmenöŋ anda kian aka malget. Anutunöŋ nalö miaŋgöreŋ Israel ambazip kambu mi töhötmöriam eŋgiiga sehiba qetbuŋaŋinambuk aket. Mewö aketka Anutunöŋ aŋgöletot aka kukösumŋi kondela miaŋön eŋguaŋgiri Ijipt kantri mosöta yaigep kaget.
18 “Kaba mala gölme qararaŋkölkölŋe kutuba kaba ahakmeme bölöŋi aka malgetka Anutugö irimŋan seholiiga (yara) yambu 40:gö dop urubölö möta malök.
19 Möta malökmö, töndup kaba mala Kenan gölmenöŋ kaŋgotket. Kaŋgotketka miaŋgöreŋ ambazip kambu 7 közöla köndeŋ eŋgiba gölmeŋini memba mendeŋda isikurupnini toŋe toŋe akŋegö buŋa qem eŋgiyök.
20 “Mewö asuhuiga (yara) yambu 450 miaŋgö dop anök. Miaŋgö andöŋe Anutunöŋ jimtekötekögö azi kembuŋi kembuŋi kuŋgum eŋgiyök. Mi kuŋgum eŋgii mala kotketka Samuelnöŋ asuhuyök. Yaŋön jimtekötekögö azi kembu qöndökŋi aka kezapqetok azia malök.
21 “Samuelnöŋ asuhuba mali nalö miaŋgöreŋ kiŋ kembugöra uletketka Anutunöŋ azi qetŋi Sol eŋgiyök. Sol yaŋön Benjamin isikurup yeŋgöreŋök azi qetŋi Kis yaŋgö nahönŋa ahök aka (yara) yambu 40:gö dop kiŋ kembuŋina malök.
22 Mi malökmö, Anutunöŋ Sol uteköba salupŋe azi qetŋi Deiwid kiŋ azi kembuŋini akŋapköra möwölöhöba kuŋguyök. Kuŋguba könaŋamŋi jim asariba kewö jiyök, ‘Nöŋön Jesigö nahönŋi Deiwid miwikŋaizal. Yaŋgö uruŋi kewöta mötpi ölöp dop köl niŋgiza. Yaŋön mönö ahakmemeŋi pakpak miaŋgöreŋ nöŋgö jitni tem köla malma.’
23 Anutunöŋ mönöwök Amötqeqe Toŋi melaim neŋgimapkö jiyöhi, jöhöjöhö keu miaŋgö ölŋan mönö kewö asuhuyök: Deiwidkö gwölönarökurupŋi yeŋgöreŋök azi qetŋi Jisös asuhuiga Anutunöŋ i Israel kambu neŋgö Amötqeqe Tonini aka malmapköra kuŋguyök.
24 “Jisösnöŋ qahö asuhuiga qeljiŋe miaŋgöreŋ Jonöŋ mutuk kaba kewö jiba malök, ‘Iŋini mönö uruŋini meleŋget. Uruŋini meleŋgetka nöŋön o melun mem eŋgimam.’ Mewö jiba Israel ambazip kambu pakpak uru kuŋgum eŋgiba malök.
25 Mewö malökmö, yaŋön mirililik nupŋi mem tekömamgö aka miaŋgöreŋ kewö jii mötket, ‘Iŋini nöŋgöra denöwö mötmörize? Yuai mötmörizei, nöŋön mia qahöpmö, mötket, nöŋgö andöne azi kun kama. Yaŋön kaiga nöŋön yaŋgö qöhöröŋe eretŋi maljalaŋgöra wayangösöŋi teŋgöba köna esu kösöŋi pösatmamgö qötötaŋgömam.’
26 “O alaurupni, Abrahamgö gwölönarökurupŋi aka gölme toŋi eŋön nembuk Anutu waikŋi memba möpöseimakzei, Anutunöŋ amöt qem neŋgimapkö Buŋaŋi mi ali neŋgöreŋ kaza.
27 Miaŋgö könaŋi kewö: Jerusalem toŋi aka galömurupnini yeŋön Jisösgö könaŋi qahö möt kutuget. Kezapqetok yeŋgöreŋ Buzup Kimbi Sabat kendon dop oyoŋmakzemö, miaŋgö könaŋi qahö möt asarimakze. Mewö tönpin maljemö, töndup galömkölköl aziurupninan Jisös kömumapkö keuŋi jim tekögetka kezapqetok ambazip yeŋgöreŋ keu mi mewö miaŋön ölŋambuk ahök.
28 Yeŋön Jisös kömupkö buŋa akŋawaŋgö dop keu könaŋi jaruba kun qahö miwikŋaiba töndup “Yapmakek!” qetket. Qeta Pailötnöŋ jim teköi kömumapkö qeta uletket.
29 “Yaŋgöra keu pakpak ohoget ahözawi, yeŋön mönö miaŋgö dop aketka ölŋi ahum teköiga Jisös ipnöhök meköba eta qaksirinöŋ anda köt köteŋ uruŋe alget.
30 Algetmö, Anutunöŋ i kömupnöhök mem gulii wahörök.
31 Wahöri yambuk Galili prowinsnöhök Jerusalem sitinöŋ kageri, yeŋgöra mönö silim gwötpuk miaŋgöreŋ asuhum eŋgiyök. Alaurupŋi asuhum eŋgiyöhi, yeŋön nalö kewöŋe ambazip sutŋine dangunu ewö kinda könaŋi naŋgöba jim asariba malje.
32 Anutunöŋ Juda ambösakonurupnini yembuk yuai akŋamgö keu jim jöhöiga nini yeŋgö gwölönarökurupŋini ahinga keu walŋi miaŋgö ölŋan mönö nalö kewöŋe neŋgöra kewö asuhuyök: Yaŋön Jisös mem gulii wahöta malja. Miaŋgöra neŋön miaŋgö Buŋa ölöpŋi mi jim asarim eŋgizin.
33 “Anutunöŋ Jisösgöra keu jii Deiwidnöŋ möri Sumbara (Buŋa liŋet Sam) jaŋgö yahöt miaŋgöreŋ kewö ohoi ahöza, ‘Göŋön nani nahöna akzani, nöŋön mi merak ambazip eŋgöra kondelbiga eka mötze.’ Yaŋön keu miaŋgö dop Jisös mem gulii wahörök.
34 Jisös mem gulii kömupnöhök wahöta köhöiba mala könaŋgep kunbuk qahö kömuma. Miaŋgö keuŋi Anutunöŋ kewö jii ahöza, ‘Ni kalem möriamni kiŋ Deiwid waŋgiba malbiga sarakŋi aka pöwöwöm köhöiba kinöhi, miaŋgö dop mi mönö eŋgöra tököm eŋgimam.’
35 Deiwidnöŋ miaŋgö keuŋi mi Sumbara (Buŋa liŋet Sam) kun miaŋgöreŋ mewöyök kewö ali ahöza, ‘Nangahö wölböt azigi sarakŋi i mönö qahö mosötnöŋga kömupkö lömnöŋ qahö gisahöma.’
36 Nini kiŋ Deiwidkö könaŋi mötzin: Yaŋön malmalŋi mala Anutugö jitŋi wuataŋgöba nup waŋgiyöhi, mi mem teköba nöŋ qeba kömuyök. Kömui ambösakonurupŋi yeŋgö kösutŋine löm kölgetka qamötŋan ahöba gisahöba qahöwahök.
37 Deiwidnöŋ gisahöba qahöwahökmö, Anutunöŋ azi mem gulii wahöröhi, yaŋön mönö qahö gisahöyök.
38 “Azi alaurupni, miaŋgöra keu ki mönö mötket: Anutunöŋ Jisösgöra aka siŋgisöndokŋini mosöta saŋgoŋma. Neŋön miaŋgö Buŋaŋi jim asarim eŋgizin.
39 Mutuk ‘Mosesgöreŋ Köna keu wuataŋgöba mewö miaŋön solanŋi akin,’ jiinmö, mi inöŋ wainöŋ qaköba osiba malin. Mewö malinmö, nalö kewöŋe denike yeŋön Jisös möt nariba yambuk qekötahömei, Anutunöŋ mönö körek yeŋgö keuŋini jim teköiga solanime.
40 Kezapqetok ambazipnöŋ keu jiba ohoget ahözawi, Anutunöŋ miaŋgö dop likepŋi meleŋni qakŋine öŋgöbapuköra mönö galömŋini mem aŋgume. Keu mewöŋi kun kewö,
41 ‘Nöŋön eŋgö malmal nalöŋe aŋgöletot qainŋi kun memam. Kunŋan miaŋgö keu buzupŋi jii mötpeak, mi ölŋi akŋapkö qahö möt naribeak. Miaŋgöra keu mi memba et ala jijiwilit ahakzei, iŋini mönö öne uba eka welipköba ayuhume.’”
42 Polnöŋ mewö jiiga Barnabasbuk köuluk miri mosöta erohotka tosatŋan kewö qesim etkiget, “Nini keu ki kunbuk mötpingö mötzin. Miaŋgöra mi Sabat kendon euneaŋön ölöp toroqeba jiyohot mötpinak.”
43 Köuluk mireyök eta deŋgetka ambazip gwötpukŋan Pol aka Barnabas könaŋire etkuataŋgöget. Tosatŋan Juda ahuba malget aka tosatŋan kian kantrinöŋ ahuba könaŋgep Juda ambazip aka malget. Yeŋön etkuataŋgögetka eraum möta qambaŋ keu kewö eŋgiyohot, “Anutunöŋ kalem möriam eŋgiyöhi, miaŋgöreŋ mönö böŋ qeba kinme.”
