2 Higeno Stiveni'a huno, nafuhetane nafaheta mika'motma nagri kea antahiho, nerageho Abrahamu'a, Mesapotamia mani'negeno, Msanentake Anumzamo'a avure ehanati'tegeno henka'a atreno Harania umani'negeno,
3 Anumzamo'a amanage huno asami'ne, Vaheka'ane mopaka'anena atrenka, kaveri hanua mopare vuo. (Jen-Agf 12:1)
4 Anante Kaldia mopa atreno, Harani kumate umani'ne. Anante Abrahamu nefa frigeno, Anumzamo'a huntegeno amama menima mani'nana mopare e'ne.
5 Anumzamo'a mago mopa manisana zane huno Abrahamuna omi'ne, mago osi atupa'e huno refako huomi'ne. Mofavrea onte'tfa hunananagi Anumzamo'a huvempa hu'ne, ana hu'neanagi Nagra kagri'ene mofavre zgaka'a henka zamigahue huno hu'ne.
6 Hianagi Anumzamo'a amanahu ke huno Abrahamuna asami'ne, Kagehe'za ru vahe mopafi, mopazmi omne vahe umanigahaze. 400 ti'a zgegfu'mofo agu'afina, mopa agafa vahe'mo'za kazokzo eri'za vahe zamavrente'za, kva huso'e huozmantegahaze.
7 Hianagi Nagrani'a kazokzo eri'za zamisaza mopare vahera, nona'a zamazeri haviza huzmantegahue, huno Anumzamo'a hu'ne. Anama hute'za henka zamagra atre'za e'za ama mopare Nagrira eme nagi hanta vazigahaze. (Jen-Agf 15:13-14)
8 Anumzamo'a Abrahamu'ene huvempa hagerafikea huno oku avufama tagahu nanekea hutegeno, Abrahamu'a, Aisakina nefaza higeno 8'a zgegnama nemaniana, oku avufa taga hu'naze. Aisaki'a Jekopu nefaza higeno, Jekopua 12fu'a tagehemofona nezmafa mani'ne. (Jen-Agf 17:10-14)
9 Ana tagehe'mo'za Josefena kanive rente'za mizante atrage'za ru vahe'mo'za avare'za Isipi vu'naze. Ana hu'nazanagi Anumzamo'a agrane mani'neno,
10 knama nemizageno'a aza nehuno, knare avu'vazane, antahizana Josefena amigeno, Isipi kini ne'mofo Fero avurera knare higeno, Fero'a huntegeno ugagota kva Isipia hu'neno, noma'afima me'neazane nemania vahetera anazanke huno kegva hu'ne.
11 Anante Isipi mopare'ene Kenani moparera ne'zana fanane higeno, vahe'mo'za tusi'a zamagate'zampi mani'zage'za, tagehe'za mago kavera hakare'za eri fore osu'naze.
12 Hianagi ne'zana Isipi me'ne kema Jekopu'a nentahino'a, tagehemofona esete ne'za omerihogu huzmantege'za vu'naze.
13 Anante'ma mago'ane (second time) vazageno'a, Josefe'ne huno agra'agu huama higeno, Fero'a, Josefe afuhe'za e'naza kea antahi'ne.
14 Anantera Josefe'a ke naneke atrenteno nefa Jekopunku ene ana miko tuzgarazga'agura nagritega eho huno hu'ne, ana mika'a 75fu'e.
15 Hanki Jekopu'a Isipi umani'neno, anantega agrane tagehezanena fri'naze.
16 Anantegatira zaferina'a eri'za Sekemu vazazamo'za, Abrahamuma zagoma atreno Hamori mofavre nagapinti'ma mago'a zagoreti'ma mizama asente'nea kerigampi Sekamu ome asente'naze. (Jen-Agf 50:13)
17 Hu'neanagi, Anumzamo'ma, Abrahamuma huvempama hunte'nea knamo'a kofta huno eku nehigeno, Isipima tagri vahe'ma mani'naza vahe'mo'za tusi vahe krerfa fore hu'naze.
18 Henka Josefema antahino keno osu'nea kini ne' Isipi fore huno kegva hu'ne.
19 Ana kinimo'a vahetia rezmatga nehuno, tagehe'ina havi avu'ava hunezmanteno kasefa mofavrema ksentenazana megi'a zamatrenke'za friho huno huhanavetine. (Ekso-Uti 1:8–2:15)
20 Anama hianknafi Mosesena ksentegeno Anumzamofo avurera hentofa mofavre fore huteno, 3'a ikamofo agu'afina nefa nompi manitegeno,
21 henka avare'za megi'a ometrageno, Fero mofamo'a avareno agri'a mofavregna huno kegva hu'ne.
22 Mosese'a Isipi vahe'mofo antahi'zana rempi huno maka eriteno, kema hu'zampine, avu'ava'zama'afina hankave nentake ne' fore huno mani'ne.
23 Hu'neanagi 40ti'a zagegafu huku'ma nehuno'a nafuhei, Israeli vahera nantu antezmante nagesahie huno antahi'ne.
24 Mosese nevuno keana Isipi ne'mo, Israeli kazokzo eri'za nera nehegeno negeno, Israeli ne'mofo ahoke heno Isipi nera ahe fri'ne.
25 Mosese'a antahiana agri vahe'mo'za antahi ama hu'za, nagripi huvazino Anumzamo'a huntegeno tagrira tahokeheno tavarenaku e'ne hu'za hugahaze huno antahine, hianagi zamagra Mosesena antahi omi'naze.
26 Umaseno nanterana Mosese'a nevuno keana, tare Israeli ne'tremoke ha' nehakeno, zanarimpa zanazeri fru hunaku, agra amu'noznifi vuno znazeri atrenaku nehuno anage hu'ne, Ama ve rarena, tanagra kogna mani'na'e. Nahigeta hara neha'e?
27 Magomo'ma haviza huno ahe frinaku nehimo'a, Mosesena retufe kanti netreno anage hu'ne, aza kva mani'nenka tagrira refako hurantegahane?
28 Kagra okima Isipi ne'ma hae fri'nananankna hunka nagrira nahe frinaku nehampi? (Ekso-Uti 2:14)
29 Ana kema hia Mosese'a nentahino, Isipia atreno viazamo, Midieni mopare anantega rurega vahe umani'ne. Mosese'ma Midienima umani'neno'a, tare ne'mofavre kseznante'ne.
30 Foti'a zgegfuma agateregeno mago ankeromo hagage kokampi Sainai agonamofo agiafi osi zafafi teve srasra huno nerefi fore humi'ne.
31 Mosese'ma anazama negeno'a, naza fore nehieha nehuno kenakuma etvaoma higeno'a, Ra Anumzamo keza tino,
32 Nagra kagri kagehei Anumzane, Abrahamuma Aisakima Jekopu Anumzane, huno higeno, Mosesena, tusi ahirahitegeno avuge'zankura tusi agogogu nehuno uravao osu'ne.
33 Higeno Anumzamo'a Mosesena anage huno asami'ne, Kagia nona, kagaretira zafitro, na'ankure e'ima otinana mopa, Ruotge hu'nea mopare oti'nane.
34 Vahe'nima Isipima manine'za knama e'neriza zana tamage hu'na Nagra ke'noe, zamata hozama zamizage'za krafa kema nehazana Nagra nentahina zamaza hunaku menina erami'noe. Menina kagra eno, hugantesugenka, etenka Isipi vugahane.
35 E'ima ana Mosesima zamesra hunente'za, anagema hu'za, Iza kagrira kva mani'nenka vahera refko huo huno huntenemofo, e'i ana nera Anumzamo'a hunteno, kva ne' mani'nenka, zamazahu ne' manio huno Anumzamofo ankeromofo azampi osi zafafinti efore huno hunte'ne,
36 Ana ne'mo zamavreno nevuno Isipi mopare ene koranke hagerinte'ene ka'ma hagege mopafina kaguvazane avame'zana 40ti'a zgegfufina huzmeri hu'ne.
37 Ama ana Mosese, Israeli vahe'zgagura huno, Anumzamo'a kasnampa vahe'tmia tmagri'pintira nagrima hiaza huno azeri otigahie.
38 E'i ana ne'mo, vahe kevumokizmi amu'nompima ka'ma mopafi mani'negeno ankeromo Sainae agonafima tagri tagehemokizmi, Anumzamo kea huntegeno asimu erino mani naneke erino'ma eme tmi'nea nere.
39 Tagri tagehe'za ke'a antahizanku zamefi hunemi'za, retufeganti netre'za, zamagu'afina Isipigura tusi zamagesa antahi'naze.
40 Eronina amanage hu'za asmi'naze, Kagotama hurantesia anumza'tmina tro huranto, na'ankure ama ana Mosese'ma Isipi mopareti tvarenoma e'nea nera na'a fore humi'nefi tagra antahita keta osu'none hu'naze.
41 Hige'za ana knafina kolire havi anumzana bulimaka anenta kna huza tro hu'za, kre sramna avuga vunente'za anama zamazanuma troma hazazankura muse hunte'naze. (Ekso-Uti 32:1-10)
42 Hu'neanagi Anumzamo'a amagena huzmantege'za, zamagra havi anumzantema zagere'ma, ofunte'ma ikante monora hunte'naze, ko'ma kasnampa vahe'moma krente'neana tamagra Israeli vahe'mota ka'ma kokampima kre sramna vu'nazana foti'a zage kafufima Israeli vahemota Nagrite kre sramna vu'nafi? A'o. Nagrite kre sramna ovu'naze.
43 Tamagra Moleki havi seli mono no erita magoka ne-eta, Rafani havi anumzamofo ofu eritma ne-etma, havi anumzamofo amema'a mono huntenaku tro hu'naze. Ana hu'negu ama mopafintira tamazeri atranenketma Babilon umanigahaze. (Emo 5:25-27)
44 Tagri neragehoza seli mono no zamia eri'za magoka ka'ma kopi vu'naze. Anumzamo'ma Mosese asamino e'inahu hunka tro huo huno hunte'nea kante ante'za, anahu kna hu'za trohu fatgo hu'naze. (Ekso-Uti 25:9)
45 Henka tagehe'za ana seli mono nona e'neriza, zamagra ana mopafi Josua'ene naga'amo'zanena megi'a vahe'mofo mopafi ha'hu'za eri'za mani'neza, seli mono nona kiza mani'nageno henka Deviti kna e'ne.
46 Anumzamofo avesi zamo'a Devitinte megeno, Anumzamoka natregena ra mono nonka'a kineno huno antahige'ne, Jekopu Anumzamo'ma manisia no kinaku hu'ne.
47 Hu'neanagi Solomoni'a Agri ra mono nona kinte'ne. (1 Kin 6:1)
48 Hu'neanagi, Mareri Agatere'nea Anumzamo'a vahe'mo azanteti kinte nompina omanigahie huno, Kasnampa ne'mo hunte'ne,
