2 Ana hu'za mani'nageno amehuno zaho'mofo agasasamo hiaza huno, tusi'a agasasa runo monafinti eramino mani'naza nompi avite'ne.
3 Tevemofo agefu'nagana huno, tagareno vuno eno huno, magoke magoke'mofonte emani'ne.
4 Maka'mofona Ruotge Avamu'mo zamagu'afi viteno, zamazeri otige'za, Avamu'mo zamasamia kante ante'za, agafa hu'za aru agerupinti kea hu'naze.
5 Ana knafina knare hu'za amage ante'naza Juda vahe'mo'za, mopane mopane kotegati e'za Jerusale kumate emani'naze.
6 Ana agasasa fore nehige'za, miko vahe'mo'za atru hu'za na'a fore nehie hu'naze. Na'ankure mago mago'mo'a agra'a agerupi antahitere hu'ne.
7 Zamagra antri nehu'za anage hu'naze, ana maka Galili vahe'mo'za kea nehazanki na'a fore nehie?
8 Na'a higeta tagra mago mago'mota tagra mofavremota nehuna tagerupina nentahune?
9 Tagra rukotegati rukotegati (Amama mani'nona vahera) Patia mopareti'ene, Medes mopareti'ene Elami mopareti'ene, Mesopotemia mopareti'ene, Judia mopareti'ene, Kapatosia mopareti'ene, Pontasi mopareti'ene, Esia mopareti'ene,
10 Frigia mopareti'ene, Pamfilia mopareti'ene, Isipi mopareti'ene, Livia kazigati'ene, Sairini mopareti ene, Romuti nantu vahe'ene, Hibru vahe'ene, megi'a vahe'mo'za zamagu'a rukrahe hu'naza vahe'enene.
11 Kriti mopareti'ene Arab mopareti vahe'mota tagra hanavenentake avu'ava'zama Anumzamo'ma hia zana tagerupi nentahune!
12 Maka'mo'za mago'ene na'a fore nehie nehu'za, tusi'za hu'za antahintahi hakare hu'naze. Zamagra'a ohumi ahumi nehu'za anage hu'naze, Na'a amazana fore nehie?
13 Hianagi mago'amo'za anama haza zankura anage hu'za zamagi'za nereza, zamagra kahefa waini ti ne'za negi nenegahaze! Hu'za hu'naze.
14 Hianagi Pita otino 11ni'a amage' nentaza naga'ane mani'neno, ranke huno zamasmino, tamagra Judia vahe'ene, miko Jerusale mani'namota ama huankea tamagesa anteta antahi ankereho.
15 Amama kema nehaza zanku'ma tamagesa hakare nehazana, menina nantera 9 kiloki hu'neanki'za, zamagra negi tina one'naze.
16 Hu'neanagi ama'i korapa kasnampa ne'mo, Joeli hu'nea nanekemofo avufa'a meni negaze.
17 Hagi vagare knafina, Anumzamo'a anage hu'ne, Nagra Avamuni'a vahepi eri herafi atresugeno, tamagri ne'mofa tamimo, kasnampa kea huama nehina, kasefa vahe'mo'za ava'na keaza nehanageno, ranafa tamimo'za ava'na kegahaze.
18 Nagri eri'za vahete'ene, vene'nere ene, a'nerera Nagra Avamu'ni'a ana knafina eri herafi atresugeno zamagra kasnampa kea hugahaze.
19 Nagra monafina ruzahu'za eri fore nehu'na, kaguva avame'za ama mopafina erifore nehu'na, korane, tevene, hampone tokira hugahie.
20 Zgemo'a rukrahe huno hani hanigeno, ikamo'a kora hanigeno, henka tusi'a hanave'nentake Ramofo kna egahie.
21 Ana nehanigeno miko vahe'mo'za, Ramofo agi hanta nevazisamo'za zamu'vazinke'za knare kuma erigahaze. (Jol 2:28-32)
22 Israeli vahe'motma ama kea antahiho, Nazareti ne' Jisasina, Anumzamo azeri oti'nea ne'mo, kaguva zane ruzahu'zane, avame'zana Anumzamo'a, Agripi runtanino amuno tamifina eri'zana erigeta, keta antahita hu'naze.
23 Ama ana nera, Anumzamo antahino ahegahaze huno korapa retro hu'nea kante antetma, tamagra avaretma megi'a vahe zamazampi antage'za, keka zafare hanto ahegeno fri'ne.
24 Hianagi Anumzamo'a fri'nefinti azeri otino, fri'zamofo atazampinti azeri so'e hu'ne. Na'ankure frizamofo hanave'amo'a azerintega osu'ne.
25 Deviti'a amanahu ke agriku hu'ne, Nagra maka zupa negogeno, Ramo'a navuga nemanie, na'ankure Agra nza tmaga'a mani'neankino, nazeri kazara osugahie.
26 E'ina hu'negu nagu'amo'a so'e nehanigeno, nagipintira tusi'a musenkemo atiramigahie. Navufamo'enena anazanke huno fore'ma haniazanku avega anteno manigahie.
27 Na'ankure kagra nagu'namena fri vahe kumapina (Heidis), otregahane, huge atresankeno Ruotge hu'nemo'a kerifina okasrigahie.
28 Kagra mani'zanimofo kana ko eri'ama hunami vare'nane. Kagrama navate'ma nemaninkeno'a, musezamo avinete, huno Deviti'a hu'ne. (Sam-Zga 16:8-11)
29 Nafuhete, nagra fatgo hu'na neramasmu'e, mago tahiti'a Deviti'a frige'za asentageno, keri'amo'a menina tagrane me'ne.
30 Na'ankure agra kasnampa nekino antahine, Anumzamo'a mago negeho avareno tra'are (kini trate) antesigeno mani'nigu averino huvempa hu'ne.
31 Deviti'a kegamuteno, Kraisi friteno otisniazana ke'ne, fri vahe kumapina (Heidis) avufamo'a atresigeno zaza kna omaneno, onkasrisia zanku hu'ne. (Sam-Zga 16:10)
32 E'i ana Jisasina, Anumzamo'a fri'nefinti azeri otigeta, tagra maka'mota tavufinti ke'nona zanku nehune.
33 Ana higeno Anumzamo ragi nemino, azantamaga kaziga'a avarentegeno, huvempama hu'nea Ruotge Avamura Nefampinti erino, eritagitregeta menina negeta nentahita nehaze.
34 Na'ankure Deviti'a monafinka mareori'neanagi, Deviti agra'a huno, Ramo'a, nagri Ramofonku huno, Naza tamaga kaziga mani'nege'na,
35 Nagra ha' vaheka'a zamazerina kagia tra antesugenka, kagiareti arentrako hugahane huno hu'ne. (Sam-Zga 110:1)
36 E'ina hu'negu, maka Israeli vahe'motma tamage hutma antahi ankereho, tamagrama aheta hanti'naza nera, Anumzamo azeri otigeno, Ra vahe tro huno Kraisi mani'ne.
37 Ana kema zamagrama nentahizageno, kemo'a zamarimpafi agonaza zamareaza hige'za, Pitanku ene ruga'a aposol nagaku anage hu'naze, tafuhete tagra na'a hugahune?
38 Hazageno, Pita'a zamagrikura anage hu'ne, tamagu'a rukrahe nehutma, Jisas Kraisi agifi mono tina frenkeno, kumi'timia apaseramante'na, ruotge Avamu'mofo museza tamagra erigahaze.
39 Na'ankure huvempama hu'neana tamagri'ene, mofavre tamimofonku'ene, afete mani'namokizmigu'ene, ruga'a vahera tagri Ra Anumzamo zamagi hanige'za, Agrite egahaze.
40 Rama'a ruga'a ke Pita'a huama nehuno, zamazahuke zamasami'ne. Kefo zampima mani'naza vahe'pintira, manigneta manisaza zamo tamagu'vazina, knare huta manigahaze.
41 Agri kere zamentintima haza nagapintira, monoti fre'naze, anazupage tima fre'nazana, 3tauseni'a nazamo'za fre'naze.
