16 Ana hige'na Ramo'ma huno, Joni'a tinu mono tina fre ramante'neankina, Avamunu tina frermantegahue hu'nea kegu nagesa antahi'noe.
17 Ana hu'negu Anumzamo'ma magozahu muse'zama (gift) zamagri'ma zami'neana, anahu kna huno Agra Ramofo Jisasi Kraisinte tamentinti nehunkeno tami'neaza hu'negu, iza'na nagra Anumzamofo eri'zankura i'o huzamantegahue?
18 Ana kema zamagrama antahite'za, kema huzmanteku'ma hazana netre'za, Anumzamofo ra agi ami'za anage hu'naze, Anumzamo'a megia vahera zamarege'za zamagu'a rukarehe hu'za zamasimu e'nerize hu'naze.
19 Ananknafi Stivenina ahe nefri'za mago'a nagara zamahe fragu vazige'za, atre'za Fonesiane, Saiprasine, Antiokune, nevu'za ru vahete mono osu, Jiu vaheteke mono kea ome zamasmi'naze.
20 Hu'neanagi Saipras vahe'ene Sairini vahe'mo'za zamagripinti mago'a Antioku e'za, agafa hu'za Ramofo Jisasi knare musenkea huama hu'za Griki vahe zamasmi'naze.
21 Ramofo hihamumo zamagripi me'negu, tusi'a vahe'mo'za zamagu'a rukarehe hu'za Ramofonte zamentinti hu'naze.
22 Anama zamagrama hazankemo'a, Jerusale mono vahete ege'za nentahi'za, zamagra Banabasi huntageno Antioku vu'ne.
23 Agrama eno Anumzamo'ma asunku'ma humazmanteaza negeno, muse nehuno zamazeri hanaveti ke zamasmino, tamage huta tmaguareti Ramofonte maniho hu'ne.
24 Banabasi'a knare ne' mani'neno, Avamupi aviteno amentinti hu'negeno, maka vahe'mo'za Ramofonte e'naze.
25 Ana huteno Banabasi'a Tasisi kuma atreno Soli omegenaku vuno,
26 ome ke fore huteno avareno Antioku kumate uhanati'na'e. Ana kafufina Banabasi'ene Solikea mono vahe'zga mono kea hunezamikeno tusi'a vahe fore hu'ne. Anante amage'ma nentea disaipol naga'mo'za pusa (kristen) mono vahere huno zamagi'a eri'naze.
