Aposel 2:4-38 in Yessan-Mayo

⁴ God Reri Wow re remne yan etemne gurerem. Wow re remne kitimena newom, rem agerbo agerbo kwomri tumak welepe ek namrebem.

⁵ Er yabel nugwape Juda tatame rem kiyi agerbo nowsel mesegenen Jerusalem kwomke sene yan temenem. Er tatame rem God rene lom yokwobo tatame.

⁶ Rem nelke yam ken bukre kirkir metem, rem yan duwem. Rem metem, God Reri Wow gurerem tatame rem agerbo agerbo kwom tumak namrebem. Etop metem, rem remri kwom tuma kirkir etop metemke, rem danekene sekem.

⁷ Rem op habo op habon op wem. Nemri kwom tuma namrebo tatame rem Galiliri tatame. Rem nemri kwomri tatame bo.

⁸ Rem mapurke neremri agerbo agerbo kwom tumak namrebo?

⁹ Nem agerbo agerbo nowselke yam. Nem Partia nowselke, Midia nowselke, Elam nowselke yam. Rane nem Mesopotemia yokwok, Judia yokwok, Kapadosia yokwok yam. Rane nem Pontus yokwok, Esia yokwok yam.

¹⁰ Rane nem Frigia yokwok, Pamfilia yokwok, Isip nowselke yam. Rane nem Sairini kwom meknik tetane yokwo Libiak yam. Rane nem Rom nowselke yam.

¹¹ Nem Romke yam tame, rane nem Juda tame. Rane nem Juda tame bo, nem Juda tame etemri wule setene tame. Nem rane Krit tame, rane Arebia tame. Nem aboyei, nem God eter nenbo yaku bukre neremri kwom tumak metbo.

¹² Op wem, rem danekene seken habolaweyem. Rem etemwou etemwou op wemetbem. Berke rem opkap tuma namrebo?

¹³ Op wem, rane rem wekeyen op wem. Neremri tumak namrebo tame rem nugwape ok yaper an sisi pebo.

¹⁴ Sene Pita re Jisas reri werasen yi tame letpeis tewo wuri kere tamekene rem teten Pita re tatame remne tuma yaye op wem. Juda tatame. Jerusalemke yam tatame. Kem wan tai. Kem meten labo wos an kemne tuma tobo wesowte.

¹⁵ Agerbo agerbo kwom tumak namrebo tatame rem sisi be pebo. Et kerwukem. Kerwu nem ok yaper be abo.

¹⁶ Kem metbo wos, God reri kiyi temenem tuma wesowbem tame, Joel, re op wesowem.

¹⁷ God re op wem. Nowsel yaper tete yabel matnatek, an ari Wow rene aboyei tatame remne newote tetane. Kemri yentenyen, tauryen rem yuri tete wos wesowte. Kemri muyensi yen tame rem nugsikap labo wos late. Kemri kar tame rem nugsi tukna late.

¹⁸ Ari Wow an rene areri yaku nen tatame remne newote. Newote, rem yuri tete wos wesowte.

¹⁹ An kitimenakene bukre wos nelke nente tetane. Kem lan danekene sekete. Kem nepkene kerkene ker bow nugwapekene late tetane.

²⁰ Yabel re be paste. Liyp te kupkap tete. Etop kiyi tetek, Keryen Yen re ek yate tetane.

²¹ Tatame rem Kwobo La God rene wemete, re remne sene poten rem pow tete tetane.

²² Pita re sene op wem. Juda tame. Kem ari tuma heyar met. An kemne Nasaret kwomri Jisas eterne kemne wesowte. God re Jisas eterne werasen yam, re nugwape yenbo wos nenbem, re kitimenakene bukre wos nenbem, re yaku bukre nenbem. God re rene kitimena bukre newon re er wos nenbem. Kem etop lan sanetene.

²³ Kiyi God re eterri wuribai purerek habon re Jisas rene keremri letke rasem. Wule yaper nenbem tame rem rene mek kwuren peikkeren ek sam, kem lewouke me lam. Kem remne be sewayem. Opkap, kerem, kem rene pen sam.

²⁴ God re Jisas reri sam mus poten septim, re rene wow sene newom, re selek mesegenem. Tame sabo wule et Jisas rene keikerelaweyem.

²⁵ Kiyi Devit re Jisas eterne habon op wem. An labo, God re anne temnas yi tetane. Re arenkene meknik som tetane. Re anne kitimena newobo, eker be wos wuri anne tete, an be aken polpolte. An be op habo op habote.

²⁶ An metekwasbo, an webo tuma an okbop tebo. An more tame temente, an ege sin yuri tete wos heyar kowbo.

²⁷ Ne ari wow be mesegente tetane, an gambo kwomke som be temente. Ne anne be mesegente, neri yaku omuteke nenbo tame re sele meike be kupoite.

²⁸ An heyar somsom temente wule, ne anne peteram. Ne arenkene temente, an okbop tete tetane.

²⁹ Pita re remne sene wem. Ari gesmase, nemri warege Devit eterne an kemne wesowte. Re er tuma basrasem, re eter kworer be basrasem. Devit re sam, rem rene pertayem, reri sele som tetane.

³⁰ Devit re God Reri Tuma wesowbem tame, eker re God reri puromon teiktem tuma op sanem. Yuri Devit reri gurnan re reri wolbaye poten re kwom panen site tetane.

³¹ God re yuri nente wos Devit re etop metem. Re metem, Krais re sate, God re rene wow sene newote. Devit re etop metem, re op wem. God re Krais rene sou be mesegente, re gambo kwomke sou be tete, re be kupoite. Op wem.

³² Nem lam, God re Jisas rene wow sene newom. Nem etop lam, nem kemne etop wesowbo.

³³ God re rene wow sene newom, re yawun re God eterri let mame yokwori wolbaye yenbok sitene. God re kiyi wemkap, re etop nenem, re Eterri Wow Jisas rene newom. Gwotepte re Eterri Wow rene, nemne werasen nemne gurereye. Kem etop meten laye.

³⁴ Devit eter re God reri kwom be yawum. Devit re Krais eterne habon re op basrasem. Keryen Yen God re areri Keryen Yen rene op wem. Ne yan ari let mame yokwok site.

³⁵ Yuri an wete, ne nereri peiktame remne teitkwunte. Ne remne panen site tetane.

³⁶ Pita re sene op wem. Kem Israel tatame, kem heyar met. Kem Jisas rene mek kwuren peiken sam. Eter, God Re Lebam Tame, eter, re Haneyen.

³⁷ Tatame rem Pita reri tuma metem, rem wuribai lisokon pap yaper metem. Rem Pita eterkene Jisas reri werasen yi tamekene remne op wemetem. Lakemase, nem berke nente, God re nemne pap mette?

³⁸ Pita re sein op wem. Kem wulare wulare kemri nenbem wule yaper kem mesegenkeipte, opkap wule yaper sene mane nente. Sene nem Jisas Krais eterri sigke kemne wulare wulare okke tirmunte. Kem etop nente, God re kemri wule yaper poten septite, re Reri Wow kemne newote.

⁴ Ten yam, God Eri Wou ere tatame emne yan etemne gulelemke, eme akeite akeite kom tumak namdem.

⁵ Ete yabel Juda tatame nogwape eme kiyi akeite akeite nowsel mesginin yam, eme Jerusalem etek temenem. Ete tatame eme God eteri tuma meten tobobetem tatame, eme Pentikos awos eisau ate yam.

⁶ Yam, eme nelke yam ken eisau metem, eme yan lam, eme metem, God Eteri Wou gulelemenem tame eme akeite akeite kom tumak namdebetem. Etep metem, eme emri kom tuma kir etep meten eme wouken akem.

⁷ Wouken aken eme ep abo ep abon etep wom. Nemri tumak namdebe tame eme Galili distrikri tame. Eme neremri kom tame berai.

⁸ Eme mapeke neremri akeite akeite kom tuma sekenke namdebe? Neremri kom tame etem namdebekap, eme etepke namdebe, nema etep metye.

⁹ Nema akeite akeite provinsken kantriken etek yam. Nema kantri Partiak yam, kantri Midiak yam, kantri Elamke yam. Kau nema Mesopotemia distrikke yam, Judia distrikke yam, Kapadosia provinske yam. Kau nema Pontus provinske yam, Esia provinske yam.

¹⁰ Kau nema Frigia distrikke yam, Pamfilia distrikke yam, kantri Isipke yam. Kau nema Sairini kom mekinke tetan yekwok yam, Libia distrikke yam. Kau nema Rom komke yam.

¹¹ Nema Rom komke yam tame, kau nema Juda tame seken, kau nema Juda tame berai, nema Juda tame etemri tebekap nema nenbe. Nema kau, nema ailan Krit tame, kau Arebia distrikri tame. God eter kerebe yaku eisau e eme wusoube, nema etep neremri tumak metbe.

¹² Etep wom, eme wouken aken abolawoyim. Eme etemwou etemwou etep wometbetem. Beke eme etepkap tuma namdebe?

¹³ Etep wom, kau eme workwoyeken resen etep wom. Neremri tumak namdebe tame eme ok yaper an sisi peye, eke eme etepkap tebe. Eme etep wom.

¹⁴ Sene Pita ere aposel tame ep yekwo let ep yekwo let tewo ges wuri kei (11-pela) tameken eme teten Pita ere tatame emne tuma noubke etep wom. Juda tatame, Jerusalemke yam tatame, kem wan raste. Emri nenbekap an kemne wusoute.

¹⁵ Akeite akeite tumak namdebe tame eme sisi beke pe. Berai. Keni nema ok yaper beke a.

¹⁶ Emri nenbekap kem abo. God eteri kiyi temenem tuma wusoubetem tame, Joel, ere etepke wusowum.

¹⁷ God ere etep wom. Nowsel yaper tete yabel mekin mekinte, an Ari Wou tatame emne newote nenbe. Kemri yedeyen, taureyen eme yuri tete wos wusoute. Kemri taureyen tame eme nugsi tuknalabe woskap late. Kemri keryen eme nugsik tuknalate.

¹⁸ Ye, Ari Wou an areri yaku kerebe tatame emne newote. Newote, eme yuri tete wos wusoute.

¹⁹ An rigrabe nelke nente nenbe. Kem lan wouken akte. Kem nep, ker, ker bou nogwape late nenbe.

²⁰ Yabel ere beke kip pas. Lup te wolepai tete nenbe. Etep tetek, Keryen ere ek yate nenbe.

²¹ Tatame eme God eter etemne kobo late womette, ere emne kobo late, eme noub tete nenbe. Kiyi temenem tame, Joel, ere etep wom.

²² Pita ere sene etep wom. Juda tame, kem ari tuma noub mette. An kemne Nasaret komri Jisas eterne kemne wusoute. God ere Jisas eterne won yam, ere wos yenbo nogwape nenbetem, ere rigrabe nenbetem, ere yaku eisau kerebetem. God ere erne mure eisau newon ere ete wos nenbetem. Kem etep lam, kem abom, God ere erne won yam.

²³ Kiyi God ere eteri porerek Jisas erne keremri letke rasem. Rasem, wule yaper nenbetem tame eme erne mek kwuran kwanen ek sam, kem lewouke lam, kem emne beke wotake. Etepkap, kem erne pen sam.

²⁴ Sam, God ere Jisas eteri sam mus lam, eri sam mus ere akei peten petewarem, ere erne wou sene newom, ere yenbo tem. Tame sabe wule Jisas erne keresuklawoyim.

²⁵ Kiyi Devit ere Jisas eterne abon etep wom. An lam, God ere arenken mekin tetan. Ere arenken tetan, ere ane mure newobe, an beke kip ak.

²⁶ Etepkap an metekwasye, an erne tuma yenbo wobe. An metten, an sate, an noub temente.

²⁷ Ne ari wou beke kip mesginte, an gabo komke beke kip yi. Ne ane beke kip mesgin, neri yen yenbowai ere beke kip kupoi.

²⁸ Noub som temente wule ne ane peteram. Ne arenken temente, an metekwaste. Jisas eri wom tuma Devit ere etep bas rasem.

²⁹ Pita ere emne sene wom. Ari geisimase, neremri warege Devit eterne an kemne wusoute. Ere ete tuma bas rasem, ere eter maime beke bas ras. Devit ere sam, eme erne meike rasem. Eri sele mei som tetan.

³⁰ Devit ere God eri tuma wusoubetem tame, God ere erken tuma namderasem. God ere Devit erne etep wom. Yuri neri nan ere neren tetankap etep tete nenbe, ere kom panen site nenbe.

³¹ God ere yuri tete wos Devit ere etep metem. Ere metem, Krais ere sate, God ere erne wou sene newote. Devit ere etep kiyi metem, ere etep wom. God ere Krais erne som beke kip mesgin, ere gabo komke som beke kip te, ere beke kip kupoi. Etep wom.

³² Nema lam, God ere Jisas erne wou sene newom. Nema etep lam, nema kemne etep wusoube.

³³ God ere erne wou sene newon ere wayen ere God eteri yamame yekwori wolbaye yenbok siten. God ere kiyi womkap, ere etep nenem, ere Eteri Wou Jisas erne newom. Newom, ere Wou erne nemne won yan newoye. Gwotepte kem etep metbe, etep labe.

³⁴ Devit eter ere God eteri komke beke yau. Devit ere Krais eterne abon ere eke bas rasem. Keryen God ere areri Aneyen erne etep wom. Ne Aneyen, ne yan ari yamame yekwok site.

³⁵ Yuri an wote, ne nereri peiktame emne teitkwunte. Ne emne panen site nenbe. Devit ere etep bas rasem.

³⁶ Pita ere sene etep wom. Kem Juda tame, kem noub mette. Jisas erne kem me kwuran kwanem. Ete Jisas ere Krais, God ere erne yaku newom. Pita ere etep wom.

³⁷ Tatame eme Pita eteri tuma metem, eme sebera yan pap yaper tem. Eme Pita eterken aposel tameken emne etep wometem. Lakemase, nema beke nente, God ere nemne kobo late?

³⁸ Pita ere awosein etep wom. Kem wurare wurare kemri kiyi nenbetem wule yaper akei mesginin sene mane nente. Sene nema Jisas eteri sigke won kemne wurare wurare baptais ok wirute. Kem etep tete, God ere kemri nenbetem wule yaper peten sepitte, ere Eteri Wou kemne bepou me newote.