Aposel 2:18-36

¹⁸Maxung sibuna, mana lipuxigu oxatamdi, lupdi xaung haingdi, bagula ngasina Aningogua mari manadi mana xaidapkadi bagudi ba, saing bagula daxap suxungugua saing dibaxanga.

¹⁹Bagula ngahatanga axamang haringindi etua sabalunia xaung hatangangadi hawa titia, hatangangadi mana sip xaung yap xaung mana bunuxuyana buxuixui mahaing.

²⁰Xaidaba bagula laba saing sobaga bagula sok bila sip muga mana xaidap sabanga Toxoratamona bagula ma xaung ralang sabanga.

²¹Baing lipu gaxarea duwagi mana Toxoratamona yanoa, bagula ngaxapdi muli.’

²²“Lipu Isreliam mana, alungu to: Yesu Nasaretiam lipu tela Urana hatanga rangrang nang ba inia, mana axamang haringing xumana libudi liwe mang mana lipua li rimanoa. Ang sibuim ang gaxabia alaba.

²³Ne lipua li ata bixuandi rimadingia. Ning waleu sibuna Urana hau hatumingua mana kubolua bagula libu. Xabia masup baraxinta bagula sok. Baing ina naga, araxata? Ang ba ayu lipuadi daxabia Urana hanaunaungandi te, bu dahauliang ba agoxi xai balingamia bu aung mati.

²⁴Ning Urana iti mesa muli mana matiyua, hitixiya salak matiama sangua, namua na matia sanga ba tuxu lipua li te.

²⁵Debit harua mana ba: “ ‘Ngabagu Toxoratamona muga manga bungingbunginalo. Axamang tela sanga ba libu ngamaxuwa ngalulu te, namua na wa rimagu rimamo rubinia.

²⁶Binabu gamogua yaha sibuna saing suxungugua harua haruanga yahangam. Sanggagua ragu axamang xaidi Urana bo ba libudi manga xauna,

²⁷namua na bagula uyunga nga Matiadi Yabadingia te, saing Lipua Ung Sibum Umogu ba bagula uyunga sangganoa buya gobagobia te.

²⁸Uhatanga nanga daxanga walingamdi lo, bagula ulibu nga ngayaha sibuna maxamia.’

²⁹“Riagu mana, ngabalang rangrang ba mugangaroa Debit mati ba, waleu sibuna dikimang ba, saing guha gobagoba inia wa mana longga li laing hatata.

³⁰Ne ina Urana lipuxing suxunguxunguam tela, saing xabia ba haruanga baguba Urana hau rangua, ina bagula libu mana tibung rangging garang tela ba xap yabanoa mana kabukabung xaitamoxiam.

³¹Debit xabia muga baraxinta bagula sok kimu sibuna, baing baxanga mana Urana Lipuxing Mogunganama bagula mesa muli. Baxanga ba Urana sanga ba yunga Matiadi Yabadingia te, ne sangganoa bagula buya te. Tegu sibuna.

³²Yesu ba, Urana iti mesa muli, am longgalo am gabagu kimu mana mesa muli ba, saing am gabaxanga mana axa am gabagu ba.

³³Urana sina yaya na, libu ba rung rimang rimamo rubinia. Baing Yesu xap Urana Aningonoa rangua Tibuna bila hau haruanga mana, saing sina mari ba, bila hatata abagu alungu.

³⁴Namua na Debit haing mala long xaiya te, ne harua ba, “ ‘Toxoratamona harua na Toxoratamona ngayua ba: “Urung kabukabu yayam wa rimagu rimamo rubinia,

³⁵laing ngata bixuamdi hawa maung.” ’

³⁶“Binabu ang Isrel mana bing alungu bu axabia rangrang ba: Yesu ba, ina agoxi xai balingamia ba, Urana libu sok Toxoratamona xaung Lipuxing Mogunganama naga.”