13 Ikut ara taro det urongon un det, ma det watungi lena, “Det inum a wain ra det sipak nami.”
14 O Pita i tur tomo nama noino ma ra aposel, ma i wasiso namin labino walngano torom a taro lena, “Mot a taro Juda, ma mot rop ra mot kis nin o Jerusalem, an palos a utna ri torom mot, ma mot in longoro wakaki.
15 Mot watungi lena det sipak. Ikut awu, uni i lisu na pakano bung utmakai una kobot.
16 A utna ri mot tama i, a poropet Joel i sa wasiso mugu taru uni lena,
17 ‘O God i watungi lena: Una kum ururop na bung an pitar pirso a Niong torom a taro rop. A kum nutnutu mot, a kum musano ma a wardain, det in wasiso na poropet. Anumot a kum barman det in tama a kum tamtama, ma anumot a kum takano na musano det in ririon a kum ririon.
