12 Etep wom, eme wouken aken abolawoyim. Eme etemwou etemwou etep wometbetem. Beke eme etepkap tuma namdebe?
13 Etep wom, kau eme workwoyeken resen etep wom. Neremri tumak namdebe tame eme ok yaper an sisi peye, eke eme etepkap tebe. Eme etep wom.
14 Sene Pita ere aposel tame ep yekwo let ep yekwo let tewo ges wuri kei (11-pela) tameken eme teten Pita ere tatame emne tuma noubke etep wom. Juda tatame, Jerusalemke yam tatame, kem wan raste. Emri nenbekap an kemne wusoute.
15 Akeite akeite tumak namdebe tame eme sisi beke pe. Berai. Keni nema ok yaper beke a.
16 Emri nenbekap kem abo. God eteri kiyi temenem tuma wusoubetem tame, Joel, ere etepke wusowum.
17 God ere etep wom. Nowsel yaper tete yabel mekin mekinte, an Ari Wou tatame emne newote nenbe. Kemri yedeyen, taureyen eme yuri tete wos wusoute. Kemri taureyen tame eme nugsi tuknalabe woskap late. Kemri keryen eme nugsik tuknalate.
18 Ye, Ari Wou an areri yaku kerebe tatame emne newote. Newote, eme yuri tete wos wusoute.
19 An rigrabe nelke nente nenbe. Kem lan wouken akte. Kem nep, ker, ker bou nogwape late nenbe.
20 Yabel ere beke kip pas. Lup te wolepai tete nenbe. Etep tetek, Keryen ere ek yate nenbe.
21 Tatame eme God eter etemne kobo late womette, ere emne kobo late, eme noub tete nenbe. Kiyi temenem tame, Joel, ere etep wom.
22 Pita ere sene etep wom. Juda tame, kem ari tuma noub mette. An kemne Nasaret komri Jisas eterne kemne wusoute. God ere Jisas eterne won yam, ere wos yenbo nogwape nenbetem, ere rigrabe nenbetem, ere yaku eisau kerebetem. God ere erne mure eisau newon ere ete wos nenbetem. Kem etep lam, kem abom, God ere erne won yam.
23 Kiyi God ere eteri porerek Jisas erne keremri letke rasem. Rasem, wule yaper nenbetem tame eme erne mek kwuran kwanen ek sam, kem lewouke lam, kem emne beke wotake. Etepkap, kem erne pen sam.
24 Sam, God ere Jisas eteri sam mus lam, eri sam mus ere akei peten petewarem, ere erne wou sene newom, ere yenbo tem. Tame sabe wule Jisas erne keresuklawoyim.
25 Kiyi Devit ere Jisas eterne abon etep wom. An lam, God ere arenken mekin tetan. Ere arenken tetan, ere ane mure newobe, an beke kip ak.