Maol Amom Aposeli 17:8-34 in Mufian

⁸ Esis amam nematawa hiasi saloma agufumi wambelimi sameꞌ basef ifimba, asosafel gogolalasis kwapeteꞌ saꞌi mehip.

⁹ Eaꞌ deiꞌ agufumi mandaꞌ Jeson naloma esis Kristen isimba saliꞌ satala kot, sotagwaha amom mogafeꞌ wahifim.

¹⁰ Ama owamb atomb ambamba esis Kristen sasapaꞌ Poli Sailas aꞌ mafeꞌ anambel wambel Beria. Amom mafeꞌ mataga Beria, mafeꞌ mawis ipat luꞌutai esis Juda sandakolasatai.

¹¹ Epes sagape Beriai opalef fafeꞌ endilisi sameꞌ basef sandaꞌ waf buꞌwafi sikilaꞌ esis sagape Tesalonaikai. Apaꞌ esis Beria daoꞌ sofaꞌ basef sandagalamef aꞌowaꞌ. Eaꞌ dondol satalifa basef fagail buk Baibeli, ma sogogawa basef Pol nagaꞌipasafi endilisifi aꞌa owaꞌ.

¹² Eaꞌ deiꞌ amam nematawa Juda hiasi sahapifa Krais. Eaꞌ anowa nematawa hiawai agof luꞌwagufuwai waloma anom Grik hiami wapani sahapifana.

¹³ Aꞌi owaꞌ main, esis Juda sagape Tesalonaikai sameꞌ basef faꞌi, Pol nawalapa basef Godi Beria. Eaꞌ safeꞌ salalamona nomonas esis amam nematawa sagape Beriai awes.

¹⁴ Naꞌamba deiꞌ atef amom Kristen masapaꞌ Pol aꞌ niliana nafeꞌ naoh akata. Apaꞌ Sailasi Timoti atom mape Beria.

¹⁵ Eaꞌ amom mofaꞌ Pol magafeꞌ ufiaꞌwi malutumana mafeꞌ mahaponana Atens. Ama motanima mafeꞌ owaꞌ, Pol nasapaꞌ basef fafeꞌma Sailasi Timoti naꞌi, “Ipaꞌ bipa pifiꞌmai aeꞌ kwafalis.”

¹⁶ Pol nape nasasa amom biam Atens eaꞌ nati wambel ambalemba nati god basoꞌamunai hiana aꞌ owaꞌ. Eaꞌ okom mandaiwaꞌ endilisi ma esis sandaꞌ lotuma amamba.

¹⁷ Eaꞌ nimaguf hiafi anen nafeꞌ ipat esis Juda sandakolasatai naꞌi basef hiafi naloma esis Juda saloma anis isimba sondaꞌ lotuma Godi. Nalomas saꞌi basef sandahihianamaef nahagofa ukup asasipi. Eaꞌ nimaguf hiafi nafeꞌ anamba esis sandatama sagapoma, naꞌi basef hiafi nalomas saꞌi sandahihianamaef saloma anis safiꞌi sagapani.

¹⁸ Anom amam tisa gawaimi anom Epikurian maloma anom Stoik maꞌi basef mandahihianama maloma Pol maꞌi, “Aman anamba okom magahanai, nagaꞌi basef mamimamii, anen naꞌi niꞌi main?” Pol nawalapa basef buꞌwafi Jisasi naꞌipasa Jisas nogosafel matmat. Eaꞌ anom maꞌi, “Anen naꞌi nowalapa basefa anom god dembami anambel wambili aꞌa?”

¹⁹ Eaꞌ mofaꞌ Pol mafeꞌ maloma anom gawaimi mandakolas anota domota agol Areopagus. Amom maꞌi, “Afaꞌ waꞌi ogawa basef ifimba dambaifi inaꞌ nagasoꞌasef esis amam nematawai.

²⁰ Afaꞌ wagahembeꞌma basef ineꞌifi ma ogogawef. Owaꞌ owaꞌatin, anif daif. Eaꞌ deiꞌ afaꞌ waꞌi ataꞌ ogawa basef ifimba kofagefa.”

²¹ Esis Atens hiasi saloma epes analemb walembi safiꞌi sagape Atensi, ina safiꞌi sandaꞌ anin mae, owaꞌatin. Esis saha nimaguf hiafi sambanef sapoma sandaꞌ basef atom dambaimi ma sagameꞌ basef dambaifi.

²² Pol nalutu laꞌafena amom gawaimi mandakolas halafuta Areopagusi naꞌipasef naꞌi, “Ipaꞌ epes Atensipai, aeꞌ ati ipaꞌ banagepa aꞌowaꞌ ma hiahaom hiami pandaꞌ lotumami.

²³ Dokoꞌ aeꞌ afoꞌo owaꞌ ati hiahaom amamba ipaꞌ pandaꞌ lotumami eaꞌ ati anom otam ipaꞌ pandaꞌ ofa pandaꞌ lotumami wapani, esis sandaꞌ anif basef fail otam amamba fagaꞌi naꞌamba faꞌi, ‘God anamba apaꞌ owaꞌ mogogawa agilinamaia.’ Apaꞌ owaꞌ owaꞌatin, ipaꞌ pandandaꞌ lotumana falafuna, deiꞌ awalapa basef alihif aꞌipipana.

²⁴ “God nandaꞌ itap paloma apaꞌ epes maloma hiahaom magape itap apaꞌe, anen Dembinai ma otagai itapi. Anen ina nagape nomona ifagw lotugwi epes sagalaꞌagw lagufi, owaꞌatin.

²⁵ Anen atona nasoꞌama ambal namili laloma ambip saloma hiahaom hiamuma epes hiasi. Eaꞌ anen ina anin mae akana ma epes sotopalopana sogasoꞌana anis maefah, owaꞌatin.

²⁶ Bafamapa atona anen God nandaꞌ misiꞌah amam nematawa hiasi sataga hiꞌalas. Eaꞌ nandaꞌas sape itap hiagoma. Anen atona nandaꞌ nohotagw nimaguf maꞌumaꞌuf fandahama esis sagape mamahogomai. Eaꞌ nosahoꞌ itap pafeꞌ pegetambela paloma walemb asasilimbi.

²⁷ God nandaꞌam naꞌamba ma esis solaꞌ sogolaoma anona sogahapifana. Iꞌi esis laꞌ wandoꞌ sowandoꞌmana sefeꞌ sotolona aꞌa owaꞌ. Apaꞌ anen ina nape laogona apaꞌ hiapai atona atin, owaꞌatin.

²⁸ Siꞌi anona aman ipeꞌinai naꞌi basef nagaꞌi, ‘Apaꞌ mofaꞌ ambal namili ma anen eaꞌ nasoꞌapa pepel, deiꞌ malutu mafeꞌ.’ Siꞌi anom amam gawaimi magaꞌi naꞌamba maꞌi, ‘Apaꞌ wapani awasi ananipai.’

²⁹ “Eaꞌ Pol naꞌi wapani naꞌi, “Apaꞌ mape awasi Godi. Eaꞌ apaꞌ ina ukup pendandaꞌ piꞌi anen siꞌi ambal dowaf epes sandaꞌ otambai gol silva sandaꞌami, owaꞌ. Amamba ina aꞌ ukup epesi atip pandandaꞌmam sandaꞌam gawa asasini, owaꞌatin.

³⁰ Fowaꞌ epes owaꞌ ataꞌ sogawanaia, God ina naꞌi basef hiahaofa hiahaom hiami esis sandaꞌam nogota atambai, owaꞌ. Apaꞌ deiꞌ anen eaꞌ naꞌi dindinipa epes hiasi ma walemb hiagoma naꞌi, ‘Ipaꞌ pewaꞌ alafugaha waf awafi pembema nelelemb pesoꞌ aeꞌ.’

³¹ “Anen aꞌ nandandepa anef nemaf eaꞌ ma nondaꞌ kot. Nemaf afamba anen nowaloga waf amam nematawa hiasi hiꞌilas. Basefa kot ananitai anaf fefeꞌ usiꞌif hililiꞌ hiꞌilif. Anen nandandepa anona aman eaꞌ ma nogahapila kot atamba. Aman anamba nagaꞌ eaꞌ ma God nagasaꞌmana wapani matmati. Isimba atis apaꞌ mogawa basef ifimba endilisifi atifa anen nondaꞌmas kot.”

³² Esis sameꞌ basef ifimba ma epes sogosafel wapani matmat eaꞌ anis saꞌi basef sandaꞌ findiwaef. Apaꞌ anis saꞌi, “Daoꞌ, apaꞌ maꞌi atiasi memeꞌ basef ineꞌifi wapani ma hiahawes isimba.”

³³ Eaꞌ Pol nakwaha amom gawaimi mandakolas magapani aꞌ nafeꞌ.

³⁴ Eaꞌ anis epes sahapifa Jisas saila Pol safeꞌ. Epes isimba Dionisius, anen anona gawainai ma amom mandakolas Areopagusi naloma anoꞌw nemataꞌw agiliꞌwa Damaris saloma anis daias wapani.

⁸ Esis amam nematawa hiesi saloma agufumi wambelimi sameꞌ basef amama, sohafel gegelalasis kwapeteꞌas saꞌi mehip.

⁹ Eaꞌ deiꞌ agufumi mandaꞌ Jeson naloma anom Kristen amama maliꞌ matala kot motagaha amam mafeꞌ wafifim.

¹⁰ Owamb nataga amam Kristen masapaꞌ Pol naloma Sailas mafeꞌ anona wambel Beria. Amam mafeꞌ mataga Beria, mafeꞌ mawis ipat luꞌunai esis Juda saꞌi basef sapeinai.

¹¹ Epes sape Beriai ukup mohafel endilisi sameꞌ basef sandaꞌ waf buꞌunai sikilaꞌ esis sape Tesalonaikai. Deiꞌ main, esis Beria sofaꞌ basef sandanifelamam endilisi. Eaꞌ laꞌelaꞌef satalifa basef mail buk Baibeli ma sogawa basef Pol naꞌipasami endilisimi o owaꞌ.

¹² Eaꞌ deiꞌ amam nematawa Juda hiesi sombaleꞌefa Krais. Eaꞌ anowa nematawa hiawai agof luꞌwami waloma anom Grik hiami wapotiꞌ sembaleꞌefana.

¹³ Eaꞌ anona nemaf esis Juda sape Tesalonaikai sameꞌ basef maꞌi Pol nawalapa basef Godi Beria. Eaꞌ safeꞌ safela ukup esis amam nematawa sape Beriai aom.

¹⁴ Naꞌama deiꞌ atef amam Kristen masapaꞌ Pol nakiniꞌ nafeꞌ naoh akata. Eaꞌ Sailas naloma Timoti atom mape Beria.

¹⁵ Eaꞌ amam mofaꞌ Pol mafeꞌ eaf maitumana mafeꞌ mahaponana Atens. Amam motanima mafeꞌ eaꞌ, Pol nasapaꞌ basef mafeꞌma Sailas naloma Timoti naꞌi, “Ipeꞌ bipa pifiꞌmai aeꞌ mehip.”

¹⁶ Pol nape nahafa amam biam Atens eaꞌ nati wambel anama nati god basoꞌamunai hianai endilisi. Eaꞌ okom nandaiwaꞌ endilisi ma esis sandaꞌ lotuma anama.

¹⁷ Eaꞌ nimeguf hiami anan nafeꞌ ipat esis Juda saꞌi basef sapeinai naꞌi basef hiami naloma esis Juda saloma enis isima sandaꞌ lotuma Godi. Nalomas saꞌi basef sandahihianamam nahagofa ukup asasimi. Eaꞌ nimeguf hiami nafeꞌ anama esis sandatama etifigin sapoma naꞌi basef hiami nalomas saꞌi sandahihianamam saloma enis safiꞌi sapani.

¹⁸ Anom amam tisa mogawa gawaimi anom Epikurian maloma anom Stoik maꞌi basef mandahihianamam maloma Pol maꞌi, “Aman anama okom nahaga nagaoli naꞌi basef mamumami, anan naꞌi niꞌi main?” Pol nawalapa basef buꞌwami Jisasi naꞌipasa Jisas nohafel hiꞌagif. Eaꞌ anom amam maꞌi, “Anan naꞌi nowalapa basefa anom god dambami anona wambili?”

¹⁹ Eaꞌ amam magawa gawai mefaꞌ Pol mafeꞌ maloma anom gawaimi mandatama etifigin anona domota agel Areopagus. Amam maꞌi, “Afaꞌ waꞌi ogawa basef amama dambaimi ineꞌ nawalapama esis amam nematawai.

²⁰ Afaꞌ wagahembeꞌma basef ineꞌimi ma ogawam. Owaꞌ, anom basef. Eaꞌ deiꞌ afaꞌ waꞌi ogawa basef amama ofagema.”

²¹ Esis Atens hiesi saloma epes anona wambelisi safiꞌi sape Atensi, ina safiꞌi sandaꞌ anona maol, owaꞌ. Esis sape nimeguf hiami sape saꞌi basef atom dambaimi ma semeꞌ anom basef dambaimi.

²² Eaꞌ Pol naitu laꞌafena amam gawaimi mandatama etifigin halaf Areopagusi naꞌipasam naꞌi, “Ipeꞌ epes Atensipei, aeꞌ ati ipeꞌ laꞌifipa endilisi ma amamaga hiami pandaꞌ lotumami.

²³ Doꞌok aeꞌ afoꞌo ati amamaga amama ipeꞌ pandaꞌ lotumami eaꞌ ati anona otam ipeꞌ pandaꞌ ofa pandaꞌ lotumanai wapotiꞌ, esis sandaꞌ anom basef mail otam anama maꞌi naꞌama maꞌi, ‘god anama apeꞌ owaꞌ mogawa agilinamae.’ Ipeꞌ pandaꞌ lotuma anama ipeꞌ owaꞌ pegawa agilinama, deiꞌ aeꞌ awalapa basef alihim aꞌipipana.

²⁴ God nandaꞌ etap naloma apeꞌ epes maloma amamaga mape etap anaeꞌ, anan Dembinai ma ilif etapi. Anan ina nape nomona ifagw lotumi epes sandaꞌam lagufi, owaꞌ.

²⁵ Anan atona naseꞌasa ambal namunai naloma hiami epes hiesi. Eaꞌ Anan ina anom amamaga aꞌana ma epes sigiambamana soseꞌana anom amamaga, owaꞌ.

²⁶ Aman atona anan God nandaꞌ epes amam nematawa hiesi sataga etap anaeꞌ. Eaꞌ nandaꞌas sape etap hiagoma. Anan atona nandaꞌ nimeguf maꞌumaꞌum mandahama esis sape eti. Eaꞌ nandandepa etap nafeꞌ neatambela naloma wambel asasima.

²⁷ God nandaꞌam naꞌama ma esis sogolopa anona sombaleꞌefana. Iꞌi esis sogolopana sefeꞌ sombaleꞌefana o owaꞌ? Anan ina nape laogona apeꞌ hiapai atona etin, owaꞌ. Nape felefeleꞌma apeꞌ hiapai.

²⁸ Siꞌi anona aman ipeꞌinai naꞌi basef naꞌi, ‘Apeꞌ mofaꞌ ambal namunai ma anan eaꞌ naseꞌapa pepel, deiꞌ maitu mafeꞌ.’ Siꞌi anom amam gawaimi maꞌi naꞌama maꞌi, ‘Apeꞌ wapotiꞌ awasi ananipai.’ ”

²⁹ Eaꞌ Pol naꞌipam wapotiꞌ naꞌi, “Apeꞌ mape awasi Godi. Naꞌama apeꞌ ina ukup miꞌi anan siꞌi ambal atona epes sandaꞌ otamba gol siliwa sandaꞌanai, owaꞌ. Anama ina ukup epesi atom maꞌi sandaꞌana gawa asasinai, owaꞌ.

³⁰ Fowaꞌ gani epes owaꞌ seagawanai, God ina naꞌi basef mamumami ma amamaga hiami esis sandaꞌam nogota anama, owaꞌ. Eaꞌ deiꞌ anan naꞌipas naꞌi mehip epes hiesi ma wambel etap hiagoma naꞌi, ‘Ipeꞌ pemboma opalef pila Aeꞌ.’

³¹ Anan nandandepa anona nemaf eaꞌ ma nondaꞌ basefa kot, nowaloga waf amam nematawa hiesi sandaꞌanai. Basefa kot ananinai mofeꞌ boꞌom andeandeꞌ. Anan nandandepa anona aman eaꞌ ma nohapila kot anama. Aman anama nagaꞌ eaꞌ God nafelona wapotiꞌ hiꞌagif. Amama atom deiꞌ epes hiesi sape etap hiagomai sogawa basef amama endilisimi atoma anan anona nemaf nondaꞌmas kot anama.”

³² Esis sameꞌ basef amama ma epes sohafel wapotiꞌ hiꞌagif eaꞌ enis saꞌi basef sandaꞌ iafana. Eaꞌ enis saꞌi, “Wila, apeꞌ maꞌi nambimb momeꞌ basef ineꞌimi wapotiꞌ ma amamaga amama.”

³³ Eaꞌ Pol nakwaha amam mogawa gawai mandatama etifigin mapeinai eaꞌ nafeꞌ.

³⁴ Eaꞌ enis epes kwaieꞌwis sombaleꞌefa Jisas saila Pol safeꞌ. Epes isima Dionisius, anan nagawa gawai ma amam mandatama etifigin Areopagus naloma anoꞌw nemataꞌw agiliꞌwa Damaris saloma enis epes wapotiꞌ.