Maol Amom Aposeli 14:11-27 in Mufian

¹¹ Amam nematawa hiasi sati hiahawes isimba Pol nandaꞌasi eaꞌ soga saꞌi diga Likoniai naꞌamba saꞌi, “Amom god dembami apeꞌimi biam mataga siꞌi epes misilaꞌmai apaꞌ!”

¹² Barnabas sofalana saꞌi anona dembinai Sus. Eaꞌ Pol anen aman nandaꞌ basef atumi. Eaꞌ sofalana saꞌi anona dembinai Hermes.

¹³ Ipat esis sandaꞌ lotuma Susi totawa andoꞌ taun inimba. Eaꞌ pris nondolalima Susi nofaꞌ anom bulmakau suwafumi maloma anis afis sogowaloꞌasi eaꞌ nafiꞌi uta atamba tauni. Anen nalumai esis amam nematawa saꞌi sondolali sondaꞌ ofa ma amom biam.

¹⁴ Owaꞌ aposel Barnabasi Pol mameꞌ esis saꞌi basef naꞌamba, amom mahapeꞌ klos maim amom magalami. Eaꞌ masagih mafeꞌ mawala esis amam nematawa laꞌafisa maꞌipas mehip maꞌi,

¹⁵ “Ipaꞌ epes, deiꞌ maina pandaꞌam naꞌamba? Afaꞌ wandaiwaꞌ. Afaꞌ biafa ina God dembifai, owaꞌatin. Afaꞌ epes atofa dowaf siꞌi ipaꞌ wawalipipa basef buꞌwafi. Ama ipaꞌ pegakwaha god amamba falafumi basoꞌami ma pefeꞌ pigaila God nagape namona atapinai. Anen nandaꞌ otaga ilif naloma itapi epes hiasi saloma naoh embel luꞌwami maloma hiahaom hiami magapaumi.

¹⁶ Endilisi fowaꞌ nimaguf hiafi nape natiti esis amam nematawa misiꞌah hiasi safeꞌma waf asasifi.

¹⁷ Apaꞌ anen ina nape nandambahiꞌi, owaꞌatin. Anen nihimbaꞌmapa waf ananifi ma nandaꞌ waf buꞌwafi ma apaꞌ. Anen napani heven nandaꞌ asaf falai ma ipaꞌ eaꞌ nandaꞌ hiahaom gwaꞌaimi buꞌwami mataga dondoꞌ nogota amamutai. Eaꞌ nowapanimipa gwaꞌaisi ipaꞌ, nandaꞌ opalef ipeꞌilifi sowenahalef.”

¹⁸ Amom maꞌipasa basef ifimba, mandaꞌ maol luꞌwani aꞌowaꞌ magatalagas ina sondolalim sondaꞌ ofamam, owaꞌ.

¹⁹ Anom Juda magape Antioki Aikoniam mafiꞌi Listra masaꞌma ukup asasipi. Eaꞌ deiꞌ esis sakwaha otamba saha Pol saꞌi owaꞌ afuna eaꞌ sahondoꞌana nawisi naꞌoh andoꞌ taun inimba.

²⁰ Owaꞌ esis sagahapifa Godi safiꞌi salutu salipana, aꞌ nosafel wapani eaꞌ nafeꞌ nawis taun. Ama wafilu nafeꞌ naloma Barnabas mafeꞌ Derbe.

²¹ Poli Barnabas mawalapa basef buꞌwafi Godi taun inimba eaꞌ masaꞌma ukup esis amam nematawa hiasii sataga Kristen, alipisi Jisasi. Ama main, aꞌ motanima mafeꞌ walemb ambalemba Listrai Aikoniam Antiok

²² eaꞌ mowaꞌ banaga esis Kristen. Amom maꞌipas dindinip naꞌamba maꞌi, “Ipaꞌ pendape banagepa pindahapifa Dembinai God. Apaꞌ mondameꞌ nimanimi akafimi mamimami ma mugawis nomona maol Godi nope Dembinai nugumafiapa.”

²³ Eaꞌ mandandepa agufumi mugumafi esis Kristeni mandandaꞌ sios isimba hiasi. Amom mololama gwaꞌasi mandabetena mandaꞌ esis sogape banagesa lagol Dembinaii anamba eaꞌ sagahapifanai.

²⁴ Ama main, amom mafeꞌ laꞌafena anip itap luꞌupa Pisidia, mafeꞌ mataga anep itap waꞌol Pamfilia.

²⁵ Amom mawalapa basefa esis epes sagape Pergai, ama main, miliana Atalia.

²⁶ Anamba Atalia malota sip eaꞌ pofaꞌam mafeꞌ Antiok. Wambel ambalemba fowaꞌ esis Kristen sandandepam magapoma lagol Godi ma nagatopalopam dowafa mondaꞌ maol inimba deiꞌ mandaꞌani hiꞌagalani. Eaꞌ deiꞌ motanima mafiꞌi wambel ambaleꞌe.

²⁷ Amom mataga Antiok mofala esis muwaꞌanias sandaꞌ kolasi eaꞌ maꞌipasa basefa maol Dembinai nape nalomam natopalopam mandaꞌani. Eaꞌ maꞌi, “God nandaꞌ ufiaꞌw kwagala esis amam nematawa hiasi anis daias owaꞌ Judaisia ma sogahapifa Krais.”

¹¹ Amam nematawa hiesi sati amama Pol nandaꞌami eaꞌ saꞌi mehip diga Likoniai naꞌama saꞌi, “Amam god dambami apeꞌimi biam mataga siꞌi epes misilaꞌa apeꞌ!”

¹² Barnabas sofalana saꞌi anona dembinai Sus. Eaꞌ Pol anan aman nandaꞌ basef atomi. Eaꞌ sofalana saꞌi anona dembinai Hermes.

¹³ Ipat esis sandaꞌ lotuma Susi notawa andeꞌ taun anama. Eaꞌ pris nondolalima Susi nofaꞌ anom bulmakau suwafumi maloma enis afis sowaloꞌami eaꞌ nafiꞌi uta anama tauni. Anan nalumai esis amam nematawa saꞌi sondolali sondaꞌ ofa ma amam biam.

¹⁴ Amam aposel Barnabas naloma Pol mameꞌ esis saꞌi basef naꞌama, amam mawala luwaguf maim amam malami. Eaꞌ masagih mafeꞌ mawala esis amam nematawa laꞌafena esis maꞌipas mehip maꞌi,

¹⁵ “Ipeꞌ epes, deiꞌ maina pandaꞌam naꞌama? Afaꞌ wandaiwaꞌ. Afaꞌ biafa ina God dembifai, owaꞌ. Afaꞌ epes atofa etin siꞌi ipeꞌ wawalipipa basef buꞌwami. Wawalipipa ma ipeꞌ pekwaha god anama falafunai basoꞌmaimi ma pefeꞌ pembaleꞌefa God ambal namunai nape laꞌelaꞌefi. Anan nandaꞌ otaga ilif naloma etap maloma epes hiesi saloma naoh embel luꞌwami maloma amamaga hiami mape.

¹⁶ Endilisi fowaꞌ nimeguf hiami nape nati amam nematawa hiesi saila waf asasinai.

¹⁷ Eaꞌ anan ina nape nandambahiꞌi, owaꞌ. Anan nihiꞌambapa waf ananinai ma nandaꞌ waf buꞌunai ma apeꞌ. Anan napani heven nandaꞌ asaf nalai ma ipeꞌ eaꞌ nandaꞌ amamaga gwaꞌaimi buꞌwami mataga dendeꞌ nimeguf amamumi. Eaꞌ nowapotiꞌmipa gwaꞌaimi ipeꞌ, nandaꞌ opalef ipeꞌimi mandanifel.”

¹⁸ Amam maꞌipasa basef amama, mandaꞌ maol luꞌunai endilisi maꞌipas ina sandolalimam sandaꞌ ofamam, owaꞌ.

¹⁹ Anom Juda mape Antiok naloma Aikoniam mafiꞌi Listra mafela ukup asasimi amam nematawa. Eaꞌ deiꞌ esis sakwaha otamba saha Pol saꞌi endilisi anan afuna eaꞌ sahondeꞌana nawisi naꞌoh andeꞌ taun anama.

²⁰ Eaꞌ esis sombaleꞌefa Godi safiꞌi saitu salipana, nohafel wapotiꞌ eaꞌ nafeꞌ nawis taun anama. Wafilu nafeꞌ naloma Barnabas mafeꞌ Derbe.

²¹ Pol naloma Barnabas mawalapa basef buꞌwami Godi taun anama eaꞌ mafela ukup esis amam nematawa hiesi sataga alupusi Jisasi. Anom nimeguf mafeꞌma eaꞌ, motanima mafeꞌ wambel anama Listra naloma Aikoniam naloma Antiok.

²² Eaꞌ mandaꞌ esis Kristen sataga laꞌifis. Amam maꞌipasa basef laꞌifimi naꞌama maꞌi, “Ipeꞌ pepe laꞌifipa pembaleꞌefa dembinai God. Apeꞌ memeꞌ mofaꞌ nimanimi mamumami luꞌwami ma muwis nomon wambota Godi numafiapa.”

²³ Eaꞌ mandandepa agufumi mumafi esis Kristeni mandandaꞌ ma sios amama hiami. Amam makwaha gwaꞌaimi mandaꞌ betena mandaꞌ esis sope laꞌifisa lagel Dembinai anama sembaleꞌefana.

²⁴ Eaꞌ amam mafeꞌ laꞌafena anona etap hiagoma Pisidia, mafeꞌ mataga anona etap hiagoma waꞌol Pamfilia.

²⁵ Amam mawalapa basefa epes sape Pergai eaꞌ makiniꞌ Atalia.

²⁶ Anama Atalia malata sip eaꞌ nefaꞌam mafeꞌ Antiok. Wambel anama fowaꞌ esis Kristen sandandepam mapoma lagel Godi ma nandahomam mandaꞌ maol anama deiꞌ mandaꞌanai hiꞌalana. Eaꞌ deiꞌ motanima mafiꞌi wambel anama.

²⁷ Amam mataga Antiok mofala esis mowaꞌanias sandakolas etifigin maꞌipasa basefa maol Dembinai nape nalomam nagiambamam mandaꞌanai. Eaꞌ maꞌi, “God nandaꞌ eaf nagala esis amam nematawa hiesi enis owaꞌ Judaisi ma sombaleꞌefa Krais.”