Maol Amom Aposeli 12:3-21 in Mufian

³ Eaꞌ anen nati esis Juda saꞌi ahoꞌma isimba eaꞌ nandaꞌ kalabusima Pita wapani nogota atamba esis Juda sandaꞌ gwaꞌaisi luꞌwasi sagaꞌ bret wafitai owaꞌ togatifia.

⁴ Anen nombaloꞌ Pita nandaꞌana nandaꞌ kalabus. Eaꞌ nandaꞌana nafeꞌma soldia misiꞌah biahi biah eaꞌ mumafiana. Herot okom mandandaꞌ naꞌi otaꞌ ma esis Juda sope seaꞌ gwaꞌaisi luꞌwasi sagaꞌi Pasovai ma hiꞌilas, daoꞌ aꞌ nolaꞌi Pita nuwisi andoꞌma naep amam nematawa hiasi sotolona, aꞌ nohana nogaꞌ.

⁵ Owaꞌ Pita napani kalabus amom mape mumafiana. Apaꞌ lifilafi esis Kristen sandabeten banagambela God nugumafiana.

⁶ Ama wafilu Herot naꞌi nofaꞌ Pita nefeꞌ kot. Eaꞌ nemaf afamba owaꞌ ataꞌ fetaga ulala, aꞌi owaꞌ owamb ambamba Pita naꞌoh laꞌafena anom soldia biam. Amom mowaꞌ Pita sen biafin. Anom soldia malutu mumafi uta ipat atamba sandaꞌ kalabusa.

⁷ Eaꞌ kwafalis atis atef bif owaꞌ, ensel Dembinaii nataga naloma nogogalaꞌi nogalaꞌ nawis ipat sandaꞌ kalabusa nomon. Eaꞌ ensel napisi lambeh Pitai ninimbalana naꞌipana naꞌi, “Inaꞌ safel kwafalis.” Eaꞌ sen peleꞌatana dowaf lagof Pitai nowa naꞌoh itap.

⁸ Eaꞌ ensel naꞌipana naꞌi, “Inaꞌ wahoꞌ let nugundisa klos la su boꞌwagah ineꞌigahi.” Eaꞌ Pita nandaꞌam siꞌi ensel nagaꞌipana. Eaꞌ ensel naꞌipana wapani naꞌi, “La saket ineꞌinai nigiꞌma aeꞌ nifiꞌi.”

⁹ Eaꞌ Pita nakwaha ipat sandaꞌ kalabusa nomon nagiꞌma ensel aꞌ nafeꞌ. Apaꞌ anen ina nogawa hiahawes isimba ensel nandaꞌasi naꞌi endilisi, owaꞌ. Pita naꞌi owaꞌ, siꞌi naꞌoh nandondoꞌah atin.

¹⁰ Amom biam mafeꞌ makwaha amom plisman malutu magaliꞌi mafeꞌ mikilaꞌ anom wapani eaꞌ mafeꞌ mataga uta luꞌutai ainambitai. Uta atamba sagafeꞌ tauna. Eaꞌ uta atamba luꞌutai tandawisiꞌ dowafa amom biam. Eaꞌ amom makwaha kalabus mawisi andoꞌ aꞌ mafeꞌ anoꞌw ufiaꞌw. Eaꞌ kwafalis atis ensel aꞌ nandambahoꞌma Pita nafeꞌ anagon.

¹¹ Eaꞌ okom Pitai aꞌ mataga alihim nogawa naꞌi, “Deiꞌ aeꞌ egawa endilisi. Dembinai nasapaꞌi ensel ananinai nafiꞌi natagwahowe ma lagol dembinai king Heroti, ma awami amamba hiami esis Juda ukup papoma saꞌi sondaꞌme ami.”

¹² Anen okom mandandaꞌma isimba eaꞌ, nafeꞌ ipat Mariai, Jon Mak maꞌmana nati esis Kristen sandakolas sape ipat atamba atota sape sandabeten.

¹³ Eaꞌ Pita nafeꞌ nalutu naha uta andoꞌ, anoꞌw nemataꞌw kwandaꞌmas maoli agiliꞌwa Roda kwafiꞌi kwaꞌi kuwisiꞌ uta.

¹⁴ Owaꞌ kwameꞌ malogol Pitai aꞌ kogawana, okom akwaꞌumi sonahaꞌw aꞌowaꞌ eaꞌ ina kwawisiꞌ uta, owaꞌ. Kwasagih kotanima kwafeꞌ nomon kwaꞌipas kwaꞌi, “Pita nani nalutu uta andoꞌ!”

¹⁵ Owaꞌ esis saꞌipaꞌw saꞌi, “Inaꞌ okom maolena aꞌa!” Owaꞌ akoꞌw dindinapiꞌw kwaꞌias kwaꞌi, “Owaꞌatin. Endilisi atis, anen nalutu andoꞌ.” Eaꞌ esis saꞌi, “Anamba ensel ananinai atona.”

¹⁶ Owaꞌ Pita ataꞌ nalutu naha uta atapina. Eaꞌ esis sameꞌana safeꞌ sawisiꞌ uta satolona, sosafel gogolalasis kwapeteꞌasa anen.

¹⁷ Eaꞌ Pita nandaꞌ lagol atogol naꞌipasa sogasopama malogof. Eaꞌ naꞌipasa hiahawes isimba Dembinai nofaꞌana nakwaha ipat sandaꞌ kalabusa naoꞌwana nagawisi andoꞌ. Eaꞌ naꞌi, “Ipaꞌ piꞌipago Jems nolomago sahin owan ama hiahawes isimba.” Eaꞌ nakwaha esis notanima nawisi andoꞌ nafeꞌ anagon.

¹⁸ Ama awin natafi, amom soldia matimana owaꞌ, aꞌ mosafel gogolalasom kwapeteꞌ nomonas hiahawes sapaomana eaꞌ maꞌi, “Pita nafeꞌ ani?”

¹⁹ Eaꞌ Herot wapani nalaꞌ nolaoma Pita, apaꞌ owaꞌ owaꞌatin, ina natolona nofaꞌanai, owaꞌ. Eaꞌ nandambema nahaliꞌ amom soldia nandaꞌ kotimama noham mogagaꞌ. Eaꞌ Herot nakwaha itap luꞌupa Judia nafeꞌ niliana napani wambel Sisaria.

²⁰ Anen okom numbutinama esis amam nematawa sagape walemb luꞌwalimbi bialemb Tairi Saidon. Eaꞌ anis epes Tairi Saidon sakolata safiꞌmai anen. Eaꞌ saliꞌ solaoma Blastus, nandaꞌ maola dembinai kingi. Eaꞌ sonandana basef salefa sondaꞌ okom anamba wandafunai nogagaꞌ. Deiꞌ main, epes sagape walemb ambalemba bielimbi sogofaꞌ gwaꞌaisi ma itap luꞌupa kingi.

²¹ Ama anef nemaf Herot nandandepafi anen nandausa sosaf dembinai kingi eaꞌ nape natoma sia kingi nandaꞌ basef luꞌwafi ma esis.

³ Eaꞌ anan nati esis Juda sandanifel ma amama eaꞌ nandaꞌ kalabusima Pita wapotiꞌ nemaf anama esis Juda sandaꞌ gwaꞌaimi luꞌwami saꞌ bret wafinai owaꞌ neatifi.

⁴ Anan nombaloꞌ Pita nandaꞌana nandaꞌ kalabus. Eaꞌ nandaꞌana nafeꞌma soldia wambotagw biami biam mumafiana. Herot okom naꞌi otaꞌ Pita nape wambota atotona soldia biami biami mumafiana ma esis Juda sope seaꞌ gwaꞌaimi luꞌwami saꞌi Pasova ma hiꞌilam, nefaꞌai Pita nuwisi andeꞌma naep amam nematawa hiesi sotolona ma nohana nogaꞌ.

⁵ Pita ataꞌ napani kalabus amam soldia mape mumafiana. Eaꞌ laꞌelaꞌef esis Kristen sandaꞌ beten laꞌifisa God numafia Pita.

⁶ Wafilu Herot naꞌi nofaꞌ Pita nefeꞌ ma kot. Eaꞌ nemaf anama owaꞌ ataꞌ notaga ulal owamb anama Pita naꞌoh laꞌafena anom soldia biam. Amam mowaꞌ Pita sen biefina. Anom soldia maitu mumafi uta ipat anama sandaꞌ kalabusanai.

⁷ Eaꞌ mehip ensel Dembinai nataga naloma howalagon nawis ipat sandaꞌ kalabusanai nomon. Eaꞌ ensel naha lambeh Pitai ninimbalona naꞌipana naꞌi, “Ineꞌ hafel mehip.” Eaꞌ sen peleꞌatana etin lagof Pitai nowa naꞌoh etap.

⁸ Eaꞌ ensel naꞌipana naꞌi, “Ineꞌ wahoꞌ let nugundisa lowaf la su boꞌwagah ineꞌimi.” Eaꞌ Pita nandaꞌam siꞌi ensel naꞌipana. Eaꞌ ensel naꞌipana wapotiꞌ naꞌi, “La siot ineꞌinai nila aeꞌ nifiꞌi.”

⁹ Eaꞌ Pita nakwaha ipat sandaꞌ kalabusanai nomon nagiꞌma ensel anama nafeꞌ. Eaꞌ anan ina nogawa amamaga amama ensel nandaꞌami naꞌi endilisi, owaꞌ. Pita naꞌi siꞌi naꞌoh nandondoꞌoh etin.

¹⁰ Amam biam mafeꞌ makwaha amam plisman maitu maliꞌi mafeꞌ mikilaꞌ anom wapotiꞌ eaꞌ mafeꞌ mataga uta luꞌunai sondaꞌ ainambanai. Uta anama nafeꞌ tauni. Eaꞌ uta anama luꞌunai nandawisiꞌ etina amam biam. Eaꞌ amam makwaha kalabus mawisi andeꞌ mafeꞌ anona eaf. Eaꞌ mehip ensel nandambahoꞌma Pita nafeꞌ anagon.

¹¹ Eaꞌ okom Pitai nataga alihina nogawa naꞌi, “Deiꞌ aeꞌ egawa endilisi. Dembinai nasapaꞌi ensel ananinai nafiꞌi natagahowe ma lagel king Heroti ma awami amama hiami esis Juda ukup maꞌi seandaꞌme emi.”

¹² Anan negawa amama eaꞌ, nafeꞌ ipat Mariai, Jon Mak mamaꞌwana nati esis Kristen sandakolas etifigin sape ipat anama atona sape sandaꞌ beten.

¹³ Eaꞌ Pita nafeꞌ naitu naha uta andeꞌ, anoꞌw nemataꞌw kwandaꞌmasa maoli agiliꞌwa Roda kwafiꞌi kwaꞌi kuwisiꞌ uta.

¹⁴ Eaꞌ kwameꞌ maf Pitai kogawana, okom akwaꞌunai boꞌona kwandanifel eaꞌ ina kwawisiꞌ uta, owaꞌ. Kwasagih kotanima kwafeꞌ nomon kwaꞌipas kwaꞌi, “Pita nani naitu uta andeꞌ!”

¹⁵ Eaꞌ esis saꞌipakw saꞌi, “Ineꞌ okom nahaga nagaolinai.” Eaꞌ akwaꞌw laꞌifikw kwaꞌiam kwaꞌi, “Endilisi, anan naitu andeꞌ.” Eaꞌ esis saꞌi, “Anama ensel ananinai atona.”

¹⁶ Eaꞌ Pita ataꞌ naitu naha uta wapotiꞌ. Eaꞌ esis sameꞌana safeꞌ sawisiꞌ uta satolona, sohafel gegelalasis kwapeteꞌasa anan.

¹⁷ Eaꞌ Pita nandaꞌ lagel atona naꞌipas naꞌi “Fesoꞌmepa.” Eaꞌ naꞌipasa amamaga amama Dembinai nofaꞌana nakwaha ipat sandaꞌ kalabusainai naoꞌwana nawisi andeꞌ. Eaꞌ naꞌi, “Ipeꞌ kipago Jems nolomago sahin owan ama amamaga amama.” Eaꞌ nakwaha esis notanima nawisi andeꞌ nafeꞌ anagon.

¹⁸ Eaꞌ lala kuhimbita, amam soldia matimana owaꞌ mohafel gegelalasom kwapeteꞌam ukup matamea eaꞌ maꞌi, “Pita nafeꞌ eti?”

¹⁹ Eaꞌ Herot wapotiꞌ nafeꞌ nagolopa Pita, owaꞌ. Ina natolona nofaꞌanai, owaꞌ. Eaꞌ nandamboma nahaliꞌ amam soldia nandaꞌ kotimama noham mogaꞌ. Eaꞌ Herot nakwaha etap hiagoma Judia nafeꞌ nakiniꞌ napani wambel Sisaria.

²⁰ Anan okom numbutinama esis amam nematawa sape wambel luꞌunai biefina Tair naloma Saidon. Eaꞌ enis epes Tair naloma Saidon sandakolas safiꞌmai anan. Eaꞌ saliꞌ sagolopa Blastus, nandaꞌ maola dembinai kingi. Eaꞌ sonandana basef salefa sondaꞌ okom anama wandafunai nogaꞌ. Deiꞌ main, epes sape wambel anama biefina sofaꞌ gwaꞌaimi ma etap hiagoma kingi.

²¹ Anona nemaf Herot nandandepanai anan nandausa sosaf dembinai kingi eaꞌ nape natoma balata kingi nandaꞌ basef luꞌwami ma esis.