9 Badina bema egu aniani bona kohu momo idia noho neganai, sedira lau be inai bamona do lau gwau garina, ‘Lohiabada be daika?’ O sedira bema lau ogogami neganai do lau henaoa, bona egu Dirava ena ladana do lau hahemaraia garina.
10 “Hesiai tauna be iena biaguna dekenai do oi samania koikoi lasi, ia ese iena hereva dekena amo oi do ia hadikaia, bona kerere do oi davaria garina.
11 “Tau haida ese edia tamadia idia hereva dika henia noho, bona idia ese edia sinadia idia hanamoa lasi.
12 Ma tau haida ese, sibodia idia gwauraia idia be goeva momokani, to gau be, edia miro ia bada momokani.
13 Ma haida be edia matadia dekena amo, edia hekokoroku idia hedinaraia noho. Edia matadia huina idia abia isi noho, mai hekokoroku danu.
14 Ma haida edia isedia be tuari kaia, edia aukidia dekenai be kaia idia noho. Idia ese ogogami taudia, be tanobada dekena amo idia ania ore noho, bona gau lasi taudia be, taunimanima edia huanai dekena amo idia anidia ore danu.
15 “Doma ta be mai ena natuna hahine rua. Idia boiboi noho, idia gwau, ‘Ai dekenai henia, ai dekenai henia!’ “Gau 4 edia bogadia idia kunu diba lasi: Idia be nega ta, ‘Vadaeni’ idia gwauraia diba lasi.
16 Gaudia be inai: Mase taudia edia gabu. Hahine ta, madi mai ena natuna lasi. Tano kaukau, medu ia diho lasi dainai, bona lahi, nega ta ‘Vadaeni’ ia gwauraia lasi.
17 “Iena tamana ena ladana dekenai ia hevaseha tauna, o iena sinana ia kamonai henia lasi tauna, be galo manu ese iena matana do ia gwadaia, bona ugava manu ese unai tau do idia ania ore.
18 “Gau 4 be mai edia hoa lau dekenai, edia dala be lau diba lasi. Gaudia be inai: Ugava ena roho dalana guba dekenai.
19 Gaigai ena heau dalana nadi badana ena latanai. Lagatoi ena dala, davara badana dekenai. Bona uhau tauna ena dala, kekeni ia ura henia neganai.
20 “Heudahanai hahine ena dala be inai: Ia aniani, vadaeni iena uduna ia dahua. Unai murinai ia gwau, ‘Kerere ta lau karaia lasi.’
21 “Gau 4 dekenai tanobada taudia idia haheauka diba lasi,
22 gaudia be inai: Hesiai mai guia danu tauna, king ena dagi ia abia neganai. Kavakava tauna, iena ura henia aniani ibounai ia ania neganai.
