6 Ogogami tauna be iena kara maoromaoro dekenai ia noho be namo, to kohu momo tauna be iena kara koikoi dekenai ia noho be dika.
7 Taravatu ia badinaia noho merona be aonega merona, to heatu kava taudia danu ia turana karaia merona, ese iena tamana ia hahemaraia noho.
8 Bema atoa kau moni dekena amo, oiemu kohu do oi habadaia neganai, unai oi haboua vadaeni kohu be, ogogami taudia ia bogahisihisi henia tauna ta ese do ia abia.
9 Bema Dirava ena taravatu ita kamonai henia lasi, ia ese iseda guriguri do ia kamonai henia lasi.
10 Kara maoromaoro taudia, bema tau ta ese kara dika ena dala dekenai ia hakaudia kerere, unai tau be sibona ena guri lalonai do ia moru diho, to kerere lasi taudia ese davana namona do idia davaria.
11 Kohu momo taudia ese, idia laloa idia be aonega taudia, to ogogami tauna mai ena laloa kehoa ese, unai taudia edia kara momokani ia diba.
12 Kara maoromaoro taudia idia kwalimu noho neganai, taunimanima idia moale bada noho, to kara dika taudia idia toreisi noho neganai, taunimanima be idia hunia noho.
13 Bema oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.
14 Nega ibounai Lohiabada do oi gari henia, vadaeni do oi moale, to bema oiemu kudouna oi ha-aukaia neganai, dika momokani do oi davaria.
15 King dikana ese ogogami taudia ia biagua, be laiona ia boiboi noho, o bea ia dagedage noho bamona.
16 King mai ena laloa kehoa lasi ese, taunimanima ia hisihisi henidia bada noho. To ia ura lasi koikoi dekena amo, kohu do ia abia tauna, be nega daudau, dina momo, do ia mauri noho.
17 Tau ta ese ma tau ta ia alaia mase neganai, unai ala-ala tauna be heau tauna do ia lao, ela bona ia mase. Tau ta ese ia do ia durua lasi.
18 Kara maoromaoro dalana dekenai ia raka noho tauna, be do ia mauri, to kara kerere tauna, be guri lalonai do ia moru diho haragaharaga.
19 Iena tano dekenai ia gaukara auka tauna ese, aniani momo do ia ania, to anina lasi karadia ia karaia noho tauna, be do ia ogogami momokani.
