5 Ma kavakava tauna be, iena kavakava hegeregerena do oi haere henia, ia sibona do ia laloa ia be mai ena aonega garina.
6 Bema kavakava tauna oi siaia, hereva do ia gwauraia totona, unai be oiemu aena oi utua oho, o poisini do oi inua bamona.
7 Aonega hereva, kavakava tauna ena uduna dekenai, be anina lasi, aena dika tauna ena aena be anina lasi hegeregerena.
8 Bema kavakava tauna oi matauraia neganai, unai be nadi negea varona dekenai, nadi oi kwatua kau bamona.
9 Aonega hereva ena anina, be kavakava tauna ese ia gwauraia neganai be, kekero tauna ese, iena imana ia gwadaia ginigini ia kokia toho bamona.
10 Biaguna ta, iena gaukara karaia totona, bema kavakava tauna o kekero tauna ia abia hidi, be peva tauna taunimanima ibounai ia haberoa kava noho bamona.
11 Kavakava tauna ese, iena kara kava ma ia karaia lou noho, iena mumuta dekenai ia giroa lou noho sisia bamona.
12 Tau ta oi itaia, ia sibona aonega ia gwauraia noho? Kavakava tauna be sisina ia namo, to unai tau be ia namo diba lasi.
13 Lahedo tauna be badina dahaka iena ruma ia rakatania lasi? Ia be dahaka dekenai ia gari? Laiona dekenai ia gari, a?
14 Iduara ese iena hinisi ia rakatania lasi hegeregerena, lahedo tauna ese iena mahuta patana ia rakatania lasi.
15 Taunimanima haida be lahedo momo dainai, sibodia edia uduna dekenai aniani idia atoa lasi.
16 Lahedo tauna sibona ia laloa iena aonega ese, tau 7 edia aonega ia hereaia noho. Edia laloa kehoa bona haere namodia, be gau ta lasi, ia gwau.
17 Tau haida edia heai lalonai ia vareai noho tauna, be ia raka hanaia tauna ese, sisia ena taiana ia dogoatao noho bamona.
18 Tau ta ese iena badibadinai tauna ia koia, bona ia gwau ia hevaseha sibona, be kavakava tauna ese diba bona lahi, mase gaudia, ia pidia bona negea noho kava bamona.
20 Bema au be lasi neganai, lahi be ia bodo noho, bona bema hadikaia hereva be lasi neganai, heai be do ia doko.
21 Gida ese guma idia hasiahua noho, au ese lahi ia habadaia noho, bona badu haraga tauna ese heai ia havaraia noho.
22 Anina lasi kiki, tau ta ena ladana hadikaia totona, be ita ura bada, ani? Ia be mamina namo aniani bamona, bona ita ania haraga noho, ani?
23 Hereva manada ia gwauraia, to iena lalona be dika tauna, be uro dikana mai ena kopina siliva manadana bamona.
24 Badu tauna ese hereva manada dekenai, iena badu ia hunia noho, to iena kudouna lalonai be koikoi ia noho,
25 vadaeni bema hereva manada ia gwauraia neganai, do oi kamonai henia lasi, badina be iena kudouna, be badu dekenai ia honu momokani.
26 Momokani, iena badu ia hunia noho, to gabeai iena dika, be taunimanima edia hebou lalonai do ia hedinaraia.
