2 Dirava ese gau haida ia hunia noho dainai, ita ese ita matauraia bona hanamoa noho, bona king ese gau edia anina idia tahua noho dainai, ita ese idia ita matauraia bona hanamoa noho.
3 Guba be ataiai ia daekau noho, bona tanobada be dobu gabudia ia diho noho hegeregerena, king ena laloa gaudia ita tahua diba lasi.
4 Siliva do idia havevea neganai, miro ibounai do idia kokia. Unai neganai siliva gaukaralaia tauna ese, hairai gauna ta do ia karaia diba.
5 Iena sisiba henia tau dikadia, be king ena vairana dekena amo do umui kokia, vadaeni unai king ese mai kara maoromaoro danu, iena basileia do ia naria.
6 King ena vairana dekenai do oi hekokoroku lasi, bona lohia taudia edia huanai, helai gabu badana do oi tahua lasi,
7 badina be oi do ia hamaoroa, do ia gwau, “Iniseni do oi daekau mai,” be namo, to king ena vairana dekenai, henunai gabuna dekenai oi do idia siaia lao be dika.
8 Kara ta oi itaia vadaeni totona, kota dekenai do oi lao haraga lasi, badina dokona neganai edena bamona do oi karaia, bema oiemu badibadinai tauna ese oi do ia hahemaraia neganai?
9 Oiemu badibadinai tauna sibona danu, emui hepapahuahu do umui herevalaia hebou, bona tau ta dekenai, oiemu badibadinai tauna ena hunia hereva do oi hamaoroa lasi.
10 Badina unai hereva ia kamonai tauna ese, oi do ia hahemaraia, bona oiemu ladana be do ia dika noho, ela bona nega ibounai garina.
11 Hereva maorona gwauraia namonamo karana, be golo herahera siliva bosea latanai bamona.
12 Bema aonega tauna ena sisiba hereva, be tau ta ese ia kamonai henia neganai, unai hereva be golo rini o golo herahera gauna ta bamona.
13 Hereva mailaia tauna namona ese, iena biaguna ena lalona ia hamatamataia lou, ranu keruma ese uma anina idia utua taudia ia hanamoa bamona, idia siahu bada neganai.
