14 Bema tau ta ia gwauhamata, harihari gauna do ia henia, to ia henia lasi, unai tau be dika, medu idia mailaia lasi ori bona lai bamona.
15 Haheauka ese taunimanima aukadia edia lalona ia hamanadaia diba, bona hereva manada ese, lohia tauna ena lalona ia veria diba.
16 Bema hani oi davaria neganai, hegeregerena sibona do oi ania, momo do oi ania lasi, do oi mumuta garina.
17 Oiemu badibadinai tauna ena ruma, be do oi raka vareai nega momo lasi, ia ese do ia hesiku, bona oi do ia badu henia garina.
18 Iena badibadinai tauna ia samania koikoi tauna, be tuari kaia, kepata, o diba mai matana bamona.
19 Hekwakwanai neganai bema koikoi tauna oi abidadama henia, unai be isena mai ena hisihisi, o aena ia dika noho bamona.
20 Lalohisihisi tauna dekenai ane do oi abia neganai, unai be keru neganai iena dabua oi kokia, o iena berona be damena dekena amo oi kakasia bamona.
21 Bema oi dekenai ia tuari tauna ia hitolo neganai, aniani do oi henia, bona bema ia be ranu mase, ranu do oi henia.
22 Bema inai bamona oi karaia, oi ese lahi gida iena kwarana dekenai do oi haboua, bona Lohiabada ese oiemu davana namona do ia henia.
23 Lahara ese medu ia mailaia noho, bona hereva dikana ese badu ia havaraia noho.
24 Ruma ena guhi dekenai do oi noho be namo, to hereva momo hahine danu, ruma lalonai do oi noho be dika.
25 Sivarai namona gabu daudau dekena amo, be ranu keru momokani, ranu mase tauna dekenai bamona.
26 Kara maoromaoro tauna ese, kara dika taudia edia dala ia koua lasi neganai, unai be ranu guri ena ranu ia miro, o ranu bodaga ia lohilohi noho bamona.
