9 Tau ta ese iena kudouna lalonai, iena dala ia palania noho, to Lohiabada ese unai tau ena raka dalana, dekenai ia hakaua noho.
10 King ena hereva be mai siahu danu, Dirava ena siahu dekena amo. King ena kota hereva be idia kerere lasi.
11 Lohiabada ia ura gau edia bada, bona edia metau tohoa sikele, be do idia maoromaoro momokani. Hoihoi kara ibounai danu, ia ura be mai maoromaoro bona momokani danu.
12 King taudia ese kara dika idia badu henia noho, badina be basileia ta be kara maoromaoro dekena amo, do ia gini goada noho.
13 King ese hereva maoromaoro bona momokani ia ura henia noho. Ia ese hereva momokani tauna ia lalokau henia noho.
14 Aonega tauna ese, iena king do ia hamoalea noho be namo, badina bema king ia badu neganai, sedira tau ta do ia mase.
15 King ia moale neganai, iena taunimanima do idia mauri. King ena lalona namo, be laurabada neganai medu ia diho bamona.
16 Aonega ena namo ese, golo ena namo ia hereaia noho. Laloa kehoa ena namo ese, siliva ena namo ia hereaia noho.
17 Kara maoromaoro tauna ese, dika ia noho lasi dalana dekenai ia raka noho. Unai dainai oi raka lao noho dalana, be do oi naria namonamo, mauri do oi davaria totona.
18 Hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani.
19 Ogogami taudia danu, mai manau danu do oi noho be namo, to hekokoroku taudia danu, idia dadia kohu do oi haria be dika.
20 Oiemu hadibaia tauna ena hereva do oi kamonai henia, vadaeni do oi kwalimu. Lohiabada do oi abidadama henia, vadaeni do oi moale.
21 Aonega tauna be taunimanima ese, laloa kehoa tauna idia gwauraia noho. Iena hereva be namo dainai, ia be hadibaia tauna namo herea.
22 Aonega be mauri davaria dalana, aonega tauna dekenai, to bema kavakava tauna oi hadibaia neganai, oiemu nega oi haorea kava.
23 Aonega tauna ena kudouna ese, iena hereva ia hamaoromaoroa noho, bona iena hereva ese, iena diba idia habadaia noho.
24 Hereva namodia mai bogahisihisi danu, be hani bamona, edia mamina be namo, lauma dekenai, bona tauanina dekenai danu.
25 Dala ta ia noho, sedira iena toana oi dekenai be maoro, to iena dokona be mase dekenai do ia lao.
26 Gaukara tauna be aniani ia laloa dainai, ia gaukara goada noho, badina ia ura iena hitolo do ia hanamoa.
