2 Sedira do oi laloa oiemu kara ibounai be maoro, to Lohiabada ese oiemu laloa ibounai ia tahua noho.
3 Oi ura karaia gaudia ibounai totona, Lohiabada do oi noia, ia ese do ia hanamoa gwauraia, unai neganai oiemu palani ibounai edia anina do idia vara momokani.
4 Lohiabada ese gau ibounai ia karaia vadaeni, ta ta mai edia dokona. Kara dika taudia danu be ia ese ia karaia, edia dokona be, dika do idia davaria.
5 Hekokoroku taudia ibounai, be Lohiabada ese ia badu henidia momokani. Ia ese edia kerere davana dekena amo, heau mauri dalana ta do ia henidia lasi, lasi momokani.
6 Tau ta ena bogahisihisi kara bona abidadama kara dainai, Dirava ese iena kara dika do ia gwauatao, bona bema Lohiabada oi gari henia neganai, oi be kara dika dekena amo oi siri noho.
7 Bema oiemu kara ese Lohiabada idia hamoalea noho neganai, oi idia hadikaia gwauraia taudia, be Lohiabada ese oiemu turana do ia halaoa.
8 Bema tau ta be mai ena kohu maragina sibona, to mai ena kara maoromaoro danu, be namo. To bema tau ta be mai ena kohu bada herea, to mai kara kerere bona koikoi danu, be dika.
9 Tau ta ese iena kudouna lalonai, iena dala ia palania noho, to Lohiabada ese unai tau ena raka dalana, dekenai ia hakaua noho.
10 King ena hereva be mai siahu danu, Dirava ena siahu dekena amo. King ena kota hereva be idia kerere lasi.
11 Lohiabada ia ura gau edia bada, bona edia metau tohoa sikele, be do idia maoromaoro momokani. Hoihoi kara ibounai danu, ia ura be mai maoromaoro bona momokani danu.
12 King taudia ese kara dika idia badu henia noho, badina be basileia ta be kara maoromaoro dekena amo, do ia gini goada noho.
