4 Lahedo tauna ese gau ia ura dikadika, to gau ta ia abia lasi. Gaukara auka tauna ese, ia ura henia gaudia ibounai do ia davaria.
5 Kara maoromaoro taudia ese, koikoi idia ura henia lasi momokani, to kara dika taudia ese, hemarai bona dika idia havaraia noho.
6 Kara maoromaoro ese laloa maoromaoro tauna, dika dekena amo ia naria noho, to dika ese kara dika tauna ia hamorua noho.
7 Taunimanima haida idia gwau idia be mai moni momo, to idia be ogogami, bona taunimanima haida idia gwau idia be ogogami, to idia be kohu momo taudia.
8 Kohu momo tauna be haida ese idia hadikaia gwauraia neganai, iena moni ia halusia, iena mauri abia totona, to ogogami tauna be, haida ese do idia hadikaia gwauraia lasi.
9 Kara maoromaoro tauna, be lamepa mai ena diari namona bamona, to kara dika tauna be lamepa ia bodo noho bamona.
10 Hekokoroku ese heai bona heatu ia havaraia noho, to aonega tauna ese sisiba ia tahua noho.
11 Abia kava moni bona kohu, be do ia ore haragaharaga, to iena kohu ia haboua metairametaira tauna, ese do ia habadaia.
12 Bema tau ta ia laloa gau namona ta do ia abia, to unai gau totona nega daudau ia naria kava, unai be lalohisihisi ia davaria noho, to bema unai tau ese, ia ura henia gauna ia abia neganai, moale momokani do ia davaria.
13 Bema sisiba namona oi negea, kerere do oi davaria, to bema sisiba namona oi badinaia, mauri do oi davaria.
14 Aonega tauna ena hadibaia hereva, be mauri ia henia ranu bamona. Inai hereva ese oi do idia durua, vadaeni mase dekena amo do oi heau mauri diba.
15 Taunimanima ese aonega tauna idia matauraia noho, to taunimanima idia abidadama henia diba lasi tauna ese, dika momokani do ia davaria.
