10 Hekokoroku ese heai bona heatu ia havaraia noho, to aonega tauna ese sisiba ia tahua noho.
11 Abia kava moni bona kohu, be do ia ore haragaharaga, to iena kohu ia haboua metairametaira tauna, ese do ia habadaia.
12 Bema tau ta ia laloa gau namona ta do ia abia, to unai gau totona nega daudau ia naria kava, unai be lalohisihisi ia davaria noho, to bema unai tau ese, ia ura henia gauna ia abia neganai, moale momokani do ia davaria.
13 Bema sisiba namona oi negea, kerere do oi davaria, to bema sisiba namona oi badinaia, mauri do oi davaria.
14 Aonega tauna ena hadibaia hereva, be mauri ia henia ranu bamona. Inai hereva ese oi do idia durua, vadaeni mase dekena amo do oi heau mauri diba.
15 Taunimanima ese aonega tauna idia matauraia noho, to taunimanima idia abidadama henia diba lasi tauna ese, dika momokani do ia davaria.
16 Aonega tauna ese sibona do ia laloa namonamo guna, vadaeni kara do ia karaia, to kavakava tauna ese iena kavakava ia gwauraia hedinarai.
17 Hereva ia mailaia tau dikana ese, koikoi dainai kerere ia havaraia noho, to hereva ia mailaia mai momokani danu tauna ese, mauri namona ia mailaia noho.
18 Hadibaia hereva ia kamonai lasi tauna, be do ia ogogami, bona mai ena hemarai danu, to sisiba hereva ia abia dae noho tauna, be do idia matauraia.
19 Oiemu ura gauna ena anina oi davaria neganai, lalo namo do oi davaria, to kavakava taudia ese, kara dika rakatania kara idia ura lasi momokani.
20 Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.
21 Dika bona kerere ese, kara dika tauna ena murina dekenai idia lao noho, to kara maoromaoro tauna ena davana, be mauri namona mai kohu danu.
22 Tau namona be ia mase neganai, ia ese iena kohu be iena tubuna dekenai ia henia, to kara dika taudia edia kohu bona moni, be kara maoromaoro taudia ese do idia abia.
23 Sedira ogogami tauna ena uma ese, aniani momo do ia havaraia, to kota maoromaoro lasi taudia ese, ogogami tauna ena kohu idia kokia noho.
24 Iena natuna ia kwadia lasi tauna ese, iena natuna ia hadikaia noho, to iena natuna ia lalokau henia tauna ese, iena natuna ia matakani henia noho.
25 Kara maoromaoro tauna be do ia aniani boga kunu noho, to kara dika tauna be do ia hitolo noho.
