Acts 7:34-39

³⁴Mili yanybayi Kud Musiskanyi. Yanyba nyuli, ‘Ningkijba ngayi yalunya, ngakinmuku nganinymuku, jibarrimuku, baki bayamuku. Ningkijba ngayi yalunya nananyina yajina Yijib. Linjumba yalunjali mambukamukunyi. Manku ngayi yalunya ngindunkurri, jali linjumba yalunya mambukawanyi. Badajba ngayi. Janga marrimba yalunya mardarda. Ninyaja ngayu manjijba Yijibyurri.’ Barriwa.

³⁵Waluwa mungkijimuku Musiskanyi, yurlwa yali Musiskanyi. Yanyba yali nangangi, ‘Miku ninji mambuka nurrungi. Miku.’ Miku yali nulijba Musis yalunginkanyi mambukanyi. Ngala baku manjijbayi Musis Kudwanyi, manjijba nyuli Musis Yijibyurri, kuyunki yalunya mungkijimuku nangangi, kuyunki yalunya yingkayurri yajiyurri. Yabimbayi Musis walkurra mambuka Kudwanyi, walkurra mambuka ngamanginkanyi mungkijimukuyngka. Marrimbayi mardarda wankalanyi mungkijimuku ngambalangi Musiswanyi. Nanda Yanjil jali najba Musiswanyi manikujana jali yajba, nanangini Yanjilwanyi, nyuli yabimba Musis ngiruka. Yabimba nyuli Musis ngiruka mambuka.

³⁶Baki jarimba nyuli mungkijimuku karri Musiswanyi. Yabimba nyuli kaja ngiruka yaji. Yabimba nyuli ngiruka yaji nanaba Yijib, baki yingkana yajina niji ‘Kanja Nganmarra.’ Baki mangkurruna yabimbayi ngiruka yaji Musiswanyi. Jungku yali mangkurruna yurrngumba, 40 kamambarra kindilkurrinyina, ngala yabimbayi kaja yaji ngiruka Musiswanyi.

³⁷Yanybayi Musis yalungi mungkijinyi, yanyba nyuli yalungi, ‘Manjijbaja yingka nganinyi Kudwanyi. Ngana nyuli manjijba, baki baku janyulu manjijba yingka, jalija yanyba nangangi jangkurr Kudkanyi. Janyulu karu yalunya mungkijimuku bayngkani ngambalandu, janyulu karu yalunya jangkurranyi Kudkanyi. Manjijba janyulu nanda, barrinani ngayu. Barrinani ngayu janyulu manjijba Kudwanyi. Janyulu Ju mungkiji ngambalangi.’ Barriwa.” Nani yanybayi Sdibin kunsilmukuyngka.

³⁸Baki mili jangkurr yanyba nyuli, “Nanda Musis, nyuli yalundu mungkijimukunyina mangkurruna. Nanaba nyuli jungku marda ngamanginmuku mungkijimuku yurrngumba. Nanaba nyuli jungku yundu Dungala Sayinayi, nanamannga yajina jali yanyba Yanjil Musiskanyi wabula. Yanybayi Kud Musiskanyi nanganginkanyi jangkurranyi Kudkanyi. Yanybayi jangkurr Musiskanyi. Wajbayi Musis nanganginkanyi yuwanyi Kudwanyi. Yanybayi Kud yuwa Musiskanyi, nyulu karunki yingkamuku nanankanyi yuwanyi. Baki nyuli yarrijba nanda yuwa najana Musiswanyi.

³⁹Ngala miku yaliya ngayangayijba Musis wankalamukunyi. Miku yaliya manku nangangi. Muningka yaliyanyi wijba Yijibyurri.