29 Peter kwertengerl ingwer-rnem-then angkek, “Ahern-arenyek awelhey-angenh, Akngeyekant awelheyel.
30 Arrantherr Jesus renh atwek, arwerl iylpeyl-atherr-warl, aylparirremel. Arrwekeleny-rneman awelhenhan Akngeyek, rarl Jesus renh itethilemel ipmepenh akemelhilek, Akngey anyent rey-antey.
31 Akngey ra Atyetyart anwekantherr arrernek, itethiley-angker. Akngey Ingkartel renh arrernek, Israel-kenh-rnem apmwekety angkepirretyek, apmwa ingkerrenh-kety iwetyek.
32 Arrantherr ileyel, Itnweng Rlwartel ileyel arrpemarl. Rernem Akngeyek awelhenty, rernem Itnweng Rlwart-akert-anem.”
33 Council-rnemel awek, rernem ahelirrek, renh-rnem ipmek atwetyek.
34 Anyent ingweran Pharisee anenh, itnan Gamaliel. Ingkerrenhel renh mwerr antwenh. Ra impen Moses-kenh angka akalty-anthenh. Ranem iltyemwerney-rnem ilanthek, kwertengerl-rnem aketh-warl akngetyek.
35 Ra Council-rnem-warl angkek, “Artwa Israel-kenh-rnem mwantyel iletyek.
36 Apmwerrkel artwa anyent Theudas, ra ilelhek ra akwel atyetyart ilkwa anetyek. Artwa 400 irlkenty ikwer-angkwarr anenh arrpemarl. Artwa ingwerel renh ipmek atwek, ikwerenh-rnem anterrerrek, Artwa Impenarl atwek-kety.
37 Artwa anyent ingweran Judas Galilee-areny apetyek, kapment-rnem-el artwernem count-emileyel-angkwarr-antey. Artwa ingwerel renh ipmek atwek arrpemarl. Artwa ikwerenh-rnem arlperrtyirrek arrpemarl.
38 Alakenhaym-kety artwa renh-rnem menty-anem ipmenherr-arey. Angka nhenh apek ahern-areny-kenh anamerl ywerreyenh weth-lkwer.
