8 ma aenei i viauepa ma babara i vikarei. Anina ma taui maiteni i rui au tempol ma tauna tempol oraninei i bababara, i viviauepa ma God i vovoepaepai.
9 Ma rava anatapui orotona i ʼnanai i bababara ma God i vovoepaepai,
10 ma i aramanei da tauna ravana tagogina tempol metaetana e ḡoreḡorei inanana aiaina au naona, i kiakiala ma i vivigigimana. Ma rava anatapui i ʼnanai aiwai i tupua wei orotona awarina ma i ba-guratana.
11 Ma orotona Peter ma John i vovojijini ma rava anatapui i bana-kauei, ma i viruberubei taui awari au lovelove e ḡoreḡorei, Solomon ana lovelove.
12 Ma maranai Peter patarai i ʼnanai ma i riwei: Au rava mai Israel, aiwai aubaina o vivinuanaina? Ma aiwai aubaina o inainana-tunutunuiai, apamina tauai ai rewapanei bo ai vipatutuei, wei ravana a kauei da i babara?
13 Wei lamna amamata Abraham, Isaac ma Jacob ai God, ana taunola Iesu i viborumei, ma taumi Tauna o verenei da ita viraḡeni, ma Pilate au matana o geduaiei. Pilate i ḡoei da ita rupeni wate taumi eḡa ota vianinei.
14 Iesu lamna rava vivivireina ma jijimanina, wate o geduaiei. Ma Pilate i ḡoei da Iesu ita rupeni, wate taumi o ḡoei da tauviraḡena i rupeni aubaimi.
15 Ma taumi lawana maemae-nonoana tauvereina o viraḡeni, wate God i vilawana-melei, tauai wei a vimatematei.
16 Wei ravana aena gwaḡagwaḡana Iesu au wavana i vitumaḡana ma lamna aubaina i lawana. Taumi o aramanei ana doria menanare, Wate ana tumaḡana Iesu awarina i vilawani.
17 Ma au rava marina a aramanei da taumi ami babada maiteni Iesu o viraḡeni, aubaina taumi eḡa ota aramanei da tauna tauvilawana.
18 Wate wei lamna wariaḡa God ana peroveta anatapui i ririweia i tupua, God i riwa da ana tauvilawana ina vinuapoapoe.
19 Ami ḡoa apoapoe Ona voterei ma ona mae-taviremi God awarina da tauna ami ḡoʼapoapoe ina nota-tawanei.
20 Ma lamna maranaina God aruami nualawalawana ina verei, God Iesu i vinei da ami Tauvilawana ma ina paritawaneiai.
21 Iesu au Mara ina mae da God kaua anatapui ina ravivouni, me God ana peroveta vivivirei wariaḡa i ririweia nanare.
22 Moses i riwa, “Bada ami God peroveta, me tau nanare, ina terei ma tauna ami dam oinei ina nei. Ma aiwai anatapuna e ririwemi ona rautaniḡanana-kauei.
23 Ma aiai da wei perovetana eḡa ina rautaniḡanei lamna God ana rava awariei ina vilamonei.”
24 Peroveta Samuel ma muriai Peroveta maḡamaḡaui, kaua i ririweia marina e tuputupua.
25 Taumi nai perovetai natunatui ma taumi maiteni parivainuaḡana bagibagina au orana. Au baina God Abraham i riwei, “Am epaepaia awariei dam anatapui au dobu ana viaiaini.”
26 Ma maranai God ana taunola i vinei, ma au naona i paritawaneiai awarimi da ita viaiainimi, ma lamnei taumi tagotagogi ava ami ḡoʼapoapoe ota opu-tawanei ma ota nei Tauna awarina.
