Acts 21:4-25

⁴Mu gu pir’eged boch e girdi’ u rom nike mich Jesus u wun’rad, ma gamad par rorad ni reb e wik. Miyad yog ngak Paul u gelngin fare Kan Nthothup ndabki yan Paul nga Jerusalem.

⁵Ma fa’ani taw nga nap’an ni nggu paged yad, ma gamad yan. Ma yad gubin, ni cheag e ppin rorad nge pifakrad ngorad ngar uned ngomad i yib nga wuru’ e re binaw nem. Ma gamad ragbug nga but’ u daken e yan’ u dap’el’ay ni gamad gubin nggu meybilgad.

⁶Ma gamad fangich, nge mu’ ma gamad af nga barkow miyad sul nga taferad.

⁷Ma gamad ul ul ko milekag romad, ni aram e gu warod u barkow u Tyre nga Ptolemais, ma gamad fingichiy e pi walag ni girdi’en Kristus u rom ma gamad par rorad nreb e rran.

⁸Me reb e rran riy ma gamad chuw ma gamad taw nga Cesarea. Mu rom e gu warod riy nga tafen be’ nma wereg e fare Thin Ni Bfel’ ni Filip fithingan, ma gamad par rok, ni ir reb fa medlip i girdi’ nturguyrad u Jerusalem ni ngar ayuweged e maruwel ko galesiya.

⁹Ma aningeg e ppin ni fak ni bay ndawor ra uned ko mabgol ni yad ma machibnag e thin rok Got.

¹⁰In e rran ni kug pired u rom me taw ba profet u Judea ngaram ni Agabus fithingan.

¹¹Me yib ngomad, me fek e leed rok Paul, me m’ag ay nge pa’ ngay, me ga’ar, “N’en nike yog fare Kan Nthothup e ray nike ga’ar, ‘Cha’ ni fen e gi leed ney e ireray rogon ni piyu Israel e ngar m’aged u Jerusalem, miyad pi’ nga pa’ e pi’in gathi yad piyu Israel.’”

¹²Fa’an gu rung’aged e re bugithin ney, ma gamad nge girdi’ u rom e gu weniggad ngak Paul ndabki yan nga Jerusalem.

¹³Machane me fulweg ni ga’ar, “Mang e kam rin’ed ni gimed be yor gimed be kirebnag an’ug? Kug fal’eg rogog ni gathi kemus ni ngan m’ageg u Jerusalem machane mus ni nggum’ ni fan ngak Somol Jesus.”

¹⁴Ma de yag ni gu t’ared laniyan’. Ma aram ma gamad pag me lungumad, “Tin nib m’agan’ Somol ngay e ngan rin’.”

¹⁵Ma gamad par boch u rom, ma gamad fal’eg rogon e chugum romad ma gamad yan nga Jerusalem.

¹⁶Me un boch pi gachalpen Jesus ngomad ni yad ma par u Cesarea nggu warod, miyad fekmad nga tafen be’ nib mo’on ni ir e nggu pired rok, ni aram Mnason, ni be’ u Cyprus, ni ir be’ nib mich Jesus u wan’ ko tin ni ba’aram e rran ni som’on.

¹⁷Fa’an gu tawgad nga Jerusalem me ri felfelan’ e pi walag ni girdi’en Kristus ni kugbad.

¹⁸Me reb e rran riy ma gamad yan Paul ngguyed James; ma urngin e pi’in pi’ilal ko galesiya ni yad bay.

¹⁹Me fingichiyrad Paul ma aram me weliy ngorad urngin e tin ke rin’ Got u fithik’ e pi’in gathi yad piyu Israel, ni rin’ u daken e maruwel ni tay Paul.

²⁰Fa’anra motoyilgad ngak nge mu’ miyad pining e sorok ngak Got ni yad gubin. Ma aram me lungurad ngak Paul, “Walagmad, ga manang ni bo’or i biyu’ e girdi’ nu Israel nike mich Jesus u wun’rad, ma yad gubin ni yad be tiyan’rad ko fare Motochiyel.

²¹Ka ni weliy ngorad murung’agem ni ga be machibnag ngak urngin piyu Israel ni yad be par ko pi nam rok e pi’in gathi yad piyu Israel ni ngar paged e Motochiyel rok Moses, ma ga be weliy ngorad ndab kun maad’ad ngak pifakrad ni pumo’on ara rfolgad u yalen piyu Israel.

²²Rib muduwgil ni bay rrung’aged ni kam taw. Ere mang e ngan rin’?

²³Mu rin’ e tin gamad be yog ngom. Bay aningeg i girdi’ u roy ni kar og niged bbugithin u mit Got ni ngar rin’ed.

²⁴Mu un ngorad ngabangbangen e be’ech nigey ma ga pi’ e salpiy ni pa’rad; me yag ni ngar th’abed piyan lolugrad. Ireray rogon me nang urngin e girdi’ nde riyul’ e pin’en ni kanog ngorad ni murung’agem, ma ka ga be fol ko Motochiyel rok Moses.

²⁵Machane pi’in gathi yad piyu Israel nike mich Jesus u wun’rad, e kug pi’ed bangi babyor ke yan ngorad ni gamad be yog ngorad riy ni kug turguyed nthingari dab ra ked e ggan nni pi’ ni maligach ko liyos nma meybil boch e girdi’ ngay, ara ra ked e racha’ nge gamanman nni uchuluy k’angan nge yim’, ma ngar ayuweged yad ndab ra pired be’ ni gathi mabgol rorad.”