3 I rabobo murinai ba kao 40 kamonai, ikesina mom keta pesarisi yai i rerematara kurisi, ba i beyisi kata kona wai yawayawasina, ba God ana basileiya i sisiyei kurisi.
4 Maranai si kesanisi yabata si kamkam wai nikasike i kaotuneisi, “Jerusalem kega kona kasibau taveyei, ba koi potapota yepo, Tamaku puyo i kaobiyoyobani ba a wonimi wai ini porai kurimi.
5 John wai okowai i babataito, saba kao kega pesarisi murinai wai komi Kaunuma Kaobaisiyenai kona babataito.”
6 Maranai apostles Iesu yabata si kesanisi wai si toirubai, “Bada, kom karaku basileiya Israel biyisi kuna bere meyisi kona?”
7 Ba kurisi i wona, “Komi kao ba mara tama ikesina ana bibadana maragasina i tere naveyisi wai kega kona kuiri.
8 Ba maranai Kanuma Kaobaisiyena ina botu kurimi wai maragata kona yauni, ba yauku kairaviku pipiya kurisi koni sisiya, Jerusalem kamonai ba Judea ereonowanai ba Samaria ai ba dobu tompipininai.”
9 Nikona i sisiyei murinai wai si kinakinani ba God i yauna taveyei, i gae ba guba kamonai i siwana.
10 Si gagawa si kita tupeni i gegae ku kaidamona ba yagiyagina wata sebasebare ruwamo gara poepoesi yai si kau bunaga ba parisi yai si bimsiri.
11 Ba si wona, “Galilee sebasebare, awaika kairavina nina ko bimsiri ba ko gagawa ku sapama? Niko Iesu, gwabimi yai God i yauna taveyei i gae ku sapama wai ketana kesaninai yebo kona kinani ina veramaga.”
12 Damanina ba apostle Olive koyanai si veramaga ku Jerusalem, kata si yewo wai kana rabarabana kilometre kesana rubana.
13 Maranai si verakasibau wai, si riu ku yove ba si gae memena si mamana wai ku gawarina. Ba iyabosi wata nai si mamana wai kona, Peter, John, James, Andrew, Philip, Thomas, Bartholomew ba Mathew, Alphaeus natuna sebare James, Simon Zealot biyina ba, James natuna sebare Judas yebo yabata.
14 Kosi ereonowasi mamanina namai si kesanisi ba si rupari, bibaine ba Iesu sinana Mary ba warewaresina yabata.
