6 Ratherr Jason-kenh apmer-itwek aney-angenh. Alakenh-anyem rernem Jason renh anterrkwek, Jesus-arl apenteyel irrpety ingwer-rnem-then. Rernem-anem Paul-atherr atnwenhek, artwa ampwernem-warl ayntarrp-ilemel-anem ilek. “Paul-then Silas-then ratherr, apmer arrpanenh-warl apetyek, apmwangkwarr ilpertiletyek. Ikwer-penhan ratherr nhenh-warl-anem apetyek.
7 Jason-el renh-atherr arntarnt-arek. Rernem anwenhantherr ilek, ‘Jesus Atyetyart ilkwa aneyel.’ Alakenh rernem Atyetyart anwekantherrenh Caesar-ek irrpelthirreyel.”
8 Angka awek-penh, ingkerrenh anyentirrek, rernem ahelirrek-anem.
9 Artwa ampwernemel-anem Jason ilek, man ra anthenhey-alpetyek. Ikwer-penhan renh-rnem iletyek-anem tyarlewek.
10 Ingwa ikwerel-antey Jesus-arl apenteyel-rnemel Paul Silas-atherr Berea tawen-warl-anem thwenek. Berea ikwer-itwek ratherr Jew-rnem-kenh tyaty-warl alhek.
11 Jew Thessalonica tawen-areny-rnem arlkarirrenh. Berea-areny-rnem iylpareth-rnem anenh. Rernem inkwerelhek innga Paul-kenh angkek. Arlta arrpanenhel Akngey-kenh pip arrwekeleny reytemilek, rernem aretyek Paul-el apek renh-rnem arraty-angkwarr akalty-anthetyek.
12 Jew akngerrel Jesus renh tnakek, arelh atyetyart Greece-areny Jesus renh tnakek arrpemarl Greece-areny artwernemel-then.
13 Jew Thessalonica-areny akngerrel awek-penh Paul-el tawen Berea-itwek Akngey-kenh angka innga akalty-anthek, rernem Berea-warl-anem alhek. Rernem irrwernek.
14 Alakenh-anyem Jesus-arl apenteyel akngerrel Paul renh anamerl-antey thwenek ament kwaty alay-angkwarr arntarnpenhemel alpetyek ingwer-rnem-kety Silas Timothy-atherr apmer Berea-el-antey anenh.
15 Artwa akngerr ingwer-rnem rernem Paul-atherr-angkwarr ilkwatherr alhek rernem renh Athens tawen-warl artengewek. Rernem alpey-angenh-antey, Paul-el renh-rnem ilek Silas-atherr anamerl ikwer-warl apey-alpetyek.
16 Paul Silas ratherr Athens-itwek mpwelhenh ingkart-arrpantey mpwarekarl akngerr, ranem ahelirremel arey-alhek.
