11 Ma marina Bada urana ina kovoḡim da matam ina apoapoe mara aburuna ma eḡa madeḡa lalalaina ma inanai.” Maratagogi matana i vinawanawa ma i gimtona ma nare da were i voladaḡa-nae da rava au urana ita vojijina.
12 Maranai gavena i ʼnanai aiwai i tupua ma i vitumaḡana, aubaina tauna Bada ana viararamana i bana-kauei.
13 Paul ana rava maiteni Paphos i voterei ma i amkuka damana au Perga taon au Pamphilia provins, Ma weka John-Mark taui i voterei ma i naeme au Jerusalem.
14 Perga i voterei ma i rui da au Antiok taon au Pisidia provins. Ma au Sabate i rui au boru-numana ma i kiala.
15 Ma rava ḡelaui, Moses ana tarawatu bukana ma peroveta ḡelaui ai buka i ʼavi, ma babada riwa i paritawanei Paul ma Barnabas awari i pa, “Varevareiu! Mepa da awarimi nota aiwai da ota voaguiai lamna marina ona ḡei da ona babaniei.”
16 Paul i vomairi ma urana i voepai da rava i genuana ma babani i vikarei i pa: Mai Israel ma taumi eḡa mai Jew ai God tauviborumeina, ona rautaniḡaneu!
17 Mai Israel ai God noinoita i vinei, ma i vimaurai ai au mae au Egypt, ma ana rewapana ḡaeḡaenei dobunei i taravaina-opunei.
18 Madeḡa 40 au mutulua ami kaua apoapoei ami beura ma ami gunura anatapui am-iauei.
19 Dam ḡaeḡaei 7 i vipupui au Canaan ma dobuna mai Israel i verei da i viḡariana-nonoei.
20 Wei anatapuna madeḡa 450 au orana i tupua. Wei au murina God taurauetara i terei da taui i vibadei da peroveta Samuel ana mara.
21 Anina ma rava God i vibaḡai da gulau ita verei. Ma God Saul, Kish natuna Benjamin ana damei i terei; ai gulau da madeḡa 40 i kwa.
22 Ma God Saul i tere-opunei ma David i terei ai gulau. Ma wenanare i riwa i pa, “Tau a aramanei da David, Jesse natuna orau ana rauoḡara, ma au ḡoana anatapuna ina kauei.”
23 Muriai me God i parivainuaḡani nanare, Mai Israel ai Tauvilawana, Iesu David ana damei i nei.
24 Muriai da Iesu ita nei, John mai Israel anatapui awari i jima da ai ḡoʼapoapoe ina voterei ma ina mae-tavirei God awarina ma ina babataito.
25 Ma John ana nola au damona i riwa, “Taumi o notanotai da tau Tauvilawana bo? Eḡa! Tau eḡa tauna. Wate ona rautaniḡana, rava au muriu e nenei tauna i ḡetelara, tau eḡa tagotagogina da ana ae uma ḡuravana ana rupeni.”
