9 Me lek Peter fare engel ngranow nga wuru’ e kalbus. Machane de nang ni n’en ni be rin’ e re engel nem e rib riyul’; ya be finey ni kan piliyeg e changar rok be guy.
10 Miyow yib ngranow u to’oben e bin som’on e tafen e matnag, miyow yan ko bin migid, miyow yib ko fare garog nib wasey ni ir e yira yan riy mi ni yan ngalan binaw. Me mab fare garog ni yigi mab rok, miyow yan riy nga wuru’ e yoror. Miyow yan u ba pa’ i kanawo’ mi yigi yan fare engel ngabang ni aram e ke pag Peter.
11 Ma aram mfini nang Peter e n’en nike rin’, me ga’ar, “Chiney e ka fini gu nang nriyul’! I Somol e ke l’oeg e engel rok, ke yib i ayuwegneg rok gelngin Herod ngu urngin e tin ke leamnag piyu Israel ni ngar rin’ed ngog.”
12 Ma nap’an ni nang e n’en nike rin’, me yan nga tabinaw rok Maria, ni chitiningin John Mark. Ma bo’or e girdi’ nike mu’ulung ngaram yad be pi’ e meybil rok.
13 Me tugtuguy Peter mban e garog, me yib ba tapigpig ni be’ ni bpin ni Rhoda fithingan ni nge guy e en nike yib.
14 Me pow rok lungun Peter me ri felfelan’ me sul nga naun ni be mil nde bing fare mab, me yib i yog ni bay Peter u waen nib sak’iy.
15 Me lungurad ngak, “Kam aliliy!” Machane ri be yog nriyul’. Ma aram miyad fulweg ngak ni lungurad, “Ere engel rok.”
16 Ma aram e kayigi par Peter ni yugu be tugtuguy fare mab. Ma aram mfin ra binged fare mab, ma fa’anra guyed Peter miyad gin.
17 Me fanathin ngorad u pa’ ndab rnonod, ma aram me weliy ngorad rogon nike yib Somol i chuweg u kalbus. Me ga’ar, “Mu weliyed e pi thin ney ngak James nge tin ni kabay i walagdad ni girdi’en Jesus;” ma aram me pagrad ngki yan ngabang.
18 Ma fa’ani kadbul, me balyangan’ girdi’en e matnag, ya dar nanged ko mang e ke rin’ Peter.
19 Me pi’ Herod e thin ni ngan gay Peter, machane de yag ni ngar pir’eged. Ma aram me pining fapi girdi’en e matnag nge fithrad nge mu’ me yog ni ngan li’rad ngarm’ad. Ma fa’ani mu’ me yan Herod u Judea nge yan i par nga Cesarea nib n’uw boch nap’an.
20 Ma kari damumuw Herod ngak e girdi’ nu Tyre ngu Sidon; miyad yan ni yad ba ulung ni ngranod ra guyed Herod. Som’on e ra guyed rogon nge fol Blastus ngorad; ni ir e mmil fan e re naun nem ntafen e pilung ngak. Ma aram miyad yan ngak Herod ngar weniggad ngak ni nge aw e gapas u thilrad, ya nam rorad e yad ma fek garad ko nam rok e re pilung nem.
21 Me taw nga reb e rran ni kan turguy me yin’ Herod madan e pilung nga daken nge yan i par nga but’ u tagil’ me welthin ngak e girdi’.
22 Miyad tolulnag ni be lungurad, “Cha’ney ni be welthin e gathi ba girdi’, ya ba got!”
23 Ka chingiyal’ nem me gad e engel rok Somol pa’ ngak Herod, ni bochan e yog e girdi’ ni ir ba got ma de talegrad nge mang Got e nog e sorok ngak. Me longuy e fakl’ud Herod nge yim’.