8 Angel ranem renh ilek, “Arnkwa ngkwenhel aylperl-alha, pwet sandal ngkwenh-atherrel-then.” Peter arnkwel-anem aylpek. Ikwer-penhan angel-el renh ilek, “Arnkwa kwet ngkwenhel aylpa, ayenh-anem apentemel ingkern-they!”
9 Peter-el-anem angel renh apentek. Ra iterrek ra altyerr renh arerl-anenty-arrpantey.
10 Ratherr ahelengkw-atherr-angkwarr rwaylpenhek. Ikwer-penhan ahelengkw ingwer-atherr rwaylpenhek arrpemarl. Ikwer-penh ayen keyt arriw ikwer-warl apetyek. Keyt ament altywerirrek. Ratherr-anem aketh-warl tyerrelhenhek iwerr anyent-angkwarr. Ikwer-penhan angel-el Peter renh iwerl-alhek-anem.
11 Peter-el kel iterl-anem-arek. Ra angkek, “Atha kel iterl-areyel-anem. Akngeyel angel ikwerenh thwenek, ayenh Herod-kety itethiletyek. Herod-then Jew-rnem-then ilkelhek, rernem ayenh ipmek atwetyek-arrpantey.”
12 Peter Mary-kenh apmer-warl alhek. Mary John-kenh amikw anenh. John itna ingweran ikwerenh Mark. Mary-kenh warl-itwek Jesus-arl apenteyel ingwer-rnem arrwekel akarrirrek Akngey-warl angkayntetyek.
13 Peter ra arriw renh rltar-atwek. Kwey warrkenh anyent itnan ikwerenh Rhoda ra arriw-warl alhek aretyek.
14 Peter ra angkek. Warrkenhel renh alhengk-awek inkwerelhemel. Peter ikwer arriw-anem altyweriley-angenh. Kel anamerl-antey ingwer-rnem ilek, “Peter yanh arriw-itwek rtneyel!”
