Acts 10:42-46

⁴²Jirrinyba nyuli nurrunya Jisuswanyi. Jirrinybayi nurrunya karunki nanda kunyba jangkurr bukambijuyngka. Mili jirrinyba nyuli nurrunya, nurru karunki Jisuskanyi. Yarrijbayi Jisus Kudwanyi, baki janyulu jingkijba nanda kunyba yaji baki balki yaji, jala ngambala yabimba. Yuku nanangini Jisuswanyi, jingkijba nyulu bukambiju, nanamuku jala jungku wanka, marda nanamuku janyba jali yalungka.

⁴³Yali karu nangangi Jisuskanyi nanamukunyi wankalanyi, jali yalu yanyba jangkurr Kudkanyi. Yanyba yali, ‘Nanda jala kuyu nangangi jangkurr Jisuskanyi, marda ngayangayijba Jisus, janyulu manjamanjamba nangangi balki yaji Jisuswanyi.’ Barriwa.

⁴⁴Ngala yuwaji yanybayi Bida yalungi, nanda Kunyba Ngarndu Kudkanyi, ngankijba nyuli yalunbu mankanyina. Ngankijba nyuli yalundu, manku jali yalu jangkurr Bidanyi. Baki yanyba yali yinini yinini yanyi.

⁴⁵Manmala yali, kandimuku Jumuku jali badajba yali kulani nangandu Bidana. Manmala yali, wajbangangi yalunya ngurranyimuku nanganginkanyi Kunybanyi Ngarndunyi Kudwanyi. Manmala yali.

⁴⁶Jingkijba yali, yawumbayi nangangi Kunyba Ngarndu yalundu ngurranyimukunyina Kudwanyi. Nanamukunyi nangandu Bidana, manku yali ngurranyimuku yanybikurri yinini yinini yanyi. Yanyba yali kunyba jangkurr Kudkanyi marda. Jingkijba yali, nanamukunyi nangandu Bidana, jingkijba yali, yawumbayi nangangi Kunyba Ngarndu ngurranyimukunyina Kudwanyi. Baki yanybayi Bida, “Yawumba nyuli Kunyba Ngarndu Kudkanyi nanamukunyina ngurranyimukunyina Kudwanyi, barrinani nyuli yawumba Kunyba Ngarndu nurrundu. Marda nurrimi ngurrunba yalunya yuku barri.”