Abosel 8:18-33

¹⁸Yesuse okok dlasanin nakai inaniba i kweilono gabamon dim ut tebelubeiba Gode Hobe daakenea nakaia unangai bobol temo bia Saimone i titilo watemnea monio oleb tenea

¹⁹baabenea Ibo kweilono gabamon dim ut tebelubeiba Gode Hobe daakenea nakaia unangai bobol temo onamin titilo omniba ne monio oyano gesea

²⁰Fitae baabanea Gode titilo misim omkayebebo, kobo funaneba Ne monio titil olo walano geneb mole kebsa keb moni osa aseinin bib unine!

²¹Gode keb bobol tem funino watemekebeo misiam kesoa kobo ni okok olo mo klanamabebbabe.

²²Keb bobol tem funin misiam olo deiboneba keb bobol temo deskinaneba omoneba Gode omaneba baabaneba Kobo ne hengmino omtlatnene ge baabanale!

²³Ni keb bobol tem funino tekein kebuobe. E kobo ni titil olo bobolo wakebua fumbianeba Ne titil olo omonia okok kemia nakaia unangai natemniba ne niniino nemtouleb nine gabeb kesoa hengmin olo keb bobol temo watwat dakebobo gesea

²⁴Saimone Fita esa Yon esa baabenea Ibo Gode baabaniba daatnenea kukub misiam olo ne dimo mo tam tlamone gesea

²⁵Fita esa Yon esa Samelia bib seli baabeniba Bain Yesuse Gode Dofakamin Nakabo ge baabeniba Sume wengo omyenaniba deibe tebianiba Samelia bib mak bib mak seli Yesuse wengo omkayem omkayemniba imin teniba Yelusalem bib ele tesiobe.

²⁶Gode abisake Filibe baabanea Kobo moneba Saut da ye temebta deib make Yelusalem bib daniba ke tlaniba Gesa bib une binabib deibe sine ye biebo gesea

²⁷Filibe wentenea monea deib ele walanea deib tla bebianea Itiobia nakae atemsebe. Naka ele e niniin ohaminobe. E Itiobia seli komok sumo niniino Kandesio monio kimanin nakabe. E monea Yelusalem bib ye bianea Gode niniino dobtouleb binea Imin monia nene bib unano genea kalise tem tam toumbia til hosi tekda buba debeb bliba bebianea Gode weng omkeimalin nakae Aisaiae wengo dolanebuo kim bebea Filibe atenabea

²⁹Gode Hobe baabanea Kobo moneba kalis esu one ge baabasea

³⁰Filibe blublu monea naka elesu unanea temea e Gode weng omkeimalin nakae Aisaiae wengo dolanebuo kibe kesoa baabanea Kobo weng olo kibebo o mitmakamo mo tekein kebebo? gesea

³¹e baabanea Naka maki o mitmakamo mo aletneim blim kesoa ne o mitmakamo mo tekein kebibabo, kobo teneba ne kalis tem ele touneba aletnenale ge baabasebe.

³²Gode weng olo enangge baanoa Nakai eil sibsibi yenanom gaibo i wengo mo ngananimibbabe. Eka eil sibsib meme isa dleb moniba aano waketoufabenom gaib osa i wengo nganino kimik ge bliba waketoufabenabib inanea naka elesa wengo kimik gebia debeb moniba

³³enin kino omaniba dim baabaniba E hengmino sumobo geniba naka maki mo baanibta E meletani ye bliobo genomabibbabo, e anaiba kaanamabe kesoa e dabalim olo alang namanamabebo ge baanea dolanebu ota kibetabe.