3 Amir ma kaugu viviliai amir tar pait ra kunubu, Iau tar vavalima tai David kaugu tultul dari:
4 Ina vaki vatikene pa ra umana bul mur tam, Ma ina vatur kaum kiki na king ta ra lavur taun tarai. Sela.
5 Luluai, ra bala na bakut na pite pa kaum lavur enana papalum, Di pite pa bula kaum dovot na mangamangana ta ra kivung kai ra umana tena gomgom.
6 Tago to ia arama ra ul a bakut ba da nuk vardadane dir ma ra Luluai? To ia ta ra lavur natu i God dir varogop ma ra Luluai,
7 A God ba di burut i tuna tana ta ra kivung kai ra umana tena gomgom, Ma i topa ia ba da manga ru ia ta diat dia tur kikil ia?
8 Luluai God kai ra lavur kor, To ia i ongor da u, Ia?
9 U iat u kure vadekdek ra karangap na. ta, Ba i tut kana lavur bobol, u iat u kure vango diat.
10 U tar pamar Rab da tikai ba i tar virua; U tar korot varbaiane kaum lavur ebar ma ra dekdek na limam.
11 A bala na bakut kaum iat, ma ra gunagunan kaum bula; U ga vaki ra rakarakan a gunagunan ma ra lavur magit i kor tana.
12 A matana labur ma ra matana taubar u tar pait dir; Tabor ma Kermon dir gugu ta ra iangim.
13 A limam i ongor tuna, A limam i dekdek ma ra limam tuna i ngala.
14 A mangamangana takodo ma ra dovot na varkurai dir a vunapai kaum kiki na king; A varmari ma ra dovotina dir lualua ta ra matam.
15 Nam ra tarai ba dia nunure ra ngenge na gugu dia ti doan; Dia vanavana ta ra talapar i ra matam, Luluai.
16 Dia gugu ta ra iangim a bungbung par, Ma dia lia ma kaum mangamangana takodo.
17 Tago dia langlang ta ra dekdekim; Ma ra ongor i vevet na tavua ta kaum varmari,
