17 Tago dia langlang ta ra dekdekim; Ma ra ongor i vevet na tavua ta kaum varmari,
18 Tago ra Luluai i tul tar kada ramravit, Ma ra Lia Kakit kai Israel i vaki kada king.
19 Ta nam ra e u ga tata pire kaum umana tena lotu ta ra ninana, Ma u ga biti: Iau tar tul tar ia tai tika na tena ongor upi na maramaravut; Iau tar vangala tika na rangrang kai ra tarai.
20 Iau tar tikan tadav David kaugu tultul, Iau tar ku ia ma kaugu varku i gomgom;
21 A limagu na maramaravut ia; A limagu na vapadikat ia bula.
22 Ra ebar pa na ki taun ia, Ma ra tena varpiam pa na vakadik ia.
23 Ma ina rapue kana lavur ebar ta ra luaina matana, Ma ina ubu diat dia milikuane.
24 Ma kaugu dovot na mangamangana ma kaugu varmari, dital a varirivut me; Ma ra dekdekina na ngala ta ra iangigu.
25 Kana varkurai na tuk tar ta ra ta, Ma kana gunan na varkurai ta ra umana tava alir.
26 Na tatike piragu dari: U tamagu, Kaugu God, ma ra vat ki iau laun tana.
27 Ina vaki ia upi ia ra luaina, Na ki ak tuna ta ra lavur king ta ra rakarakan a gunagunan;
28 Kaugu varmari na ki pirana pa na mutu, Ma kaugu kunubu na tur okot pirana.
29 Kana umana bul mur diat a ki ma pa na mutu, Ma kana kiki na king na tur tukum da ra bala na bakut.
30 Ba ra umana natuna dia vana kan kaugu lavur vartuluai, Ma ari pa dia mur kaugu lavur varkurai,
31 Tumu dia piam vue kaugu lavur togotogo, Ma pa dia torom ta kaugu lavur vartuluai;
32 Io, ina bali kadia nirara ma ra virit, Ma kadia bilak na mangamangana ma ra umana meme na varkita.
33 Ma pa ina tak vakakit vue kaugu varmari kan ia, Ma kaugu mangamangana dovot pa na pak.
34 Pa ina piam vue kaugu kunubu, Ma pa ina vaenana pa ra tinata i ga arikai kan ra ngiegu.
35 A kopono bung iau ga vavalima. ta kaugu lia na kini dari: Pa ina vaongo pa David.
36 Kana umana bul mur diat a ki vatikai, Ma kana kiki na king na tur ta ra luaina matagu da ra matana keake.
37 Na tur vatikai da ra gai, Ma da ra tena varvai arama ra maup i dovot. Sela.
38 Ma u tar okole vue nina u ga ku ia, U tar pilak vue, u tar kulot ure.
39 U tar milikuane ra kunubu pire kaum tultul, U tar rapue kana kere na king ara ra pia.
40 U tar re vue kana lavur liplip; U tar nila vue kana lavur dekdek na pal na bakbakit.
41 Diat par dia vana pakit dia loalong tana; Diat dia ki kikil ia dia vul ia.
42 U tar vadekdek ra lima i kana lavur ebar, Ma u tar vagugu diat dia varubu me.
