8 Koko una kankan, ma una ngo kan ra kulot; Koko u ngarangarao, tago i papait na vuna ta ra mangamangana i rara.
9 Tago a umana tena varpiam diat a virua; Ma ga diat dia ki nunur tai ra Luluai, diat a kale pa ra gunan.
10 Tago a ik boko ma ra tena varpiam pa na ki mulai; Maia, ma una ga manga gire pa ra kubana, ma pa na ki mulai.
11 Ma diat i madu ra bala i diat, diat a kale pa ra gunan, Ma diat a manga gugu ta ra ngala na malmal.
12 A umana tena varpiam dia varpit ure ra tena takodo, Ma dia vangvangia ra pal a ngie i diat tadav ia.
13 A Luluai na nongone, Tago i tar gire ba na vut ra bunguna.
14 A umana tena varpiam dia tar ele pa ra pakat na vinarubu, ma dia tar lele ra panak; Upi diat a uvia pa diat dia malari ma dia luveana, Upi diat a uvia pa diat i takodo kadia mangamangana.
15 Kadia pakat na vinarubu na go ra bala i diat iat, Ma kadia umana panak diat a tabubur boko.
16 Ra paupau magit kai ra tena takodo I boina ta dir ma ra peal tabarikik kai mangoro na tena varpiam.
17 Tago ra lima i ra umana tena varpiam na tabubur boko, Ma ra Luluai i tukatukal ra umana tena takodo.
18 A Luluai i nunure ra lavur bung kadiat dia ko tuna, Ma kadia tiniba na tur pa na mutu.
19 Vakir diat a vavirvir ta ra kaina e, Ma ta ra e na mulmulum diat a maur uka.
20 A umana tena varpiam diat a virua ka, Ma ra umana ebar kai ra Luluai diat a da ra minamar i ra umana pia na vura, Diat a panie; da ra mi diat a panie muka.
21 A tena varpiam i dinau, ma pa i babali mulai, Ma ra tena takodo i varvarmari ka, ma i varvartabar.
22 Tago diat ba ra Luluai i vadoane diat dia kale pa ra gunan, Ma diat ba i tata vabilak diat diat a virua.
23 Ba ra Luluai i vapadikat ra vinavana kai tika na tutana, Ma ba i gugu ta kana vinavana,
24 A dovotina ba i bura, pa na kaina kakit, Tago ra Luluai na vatur ia ma ra limana.
25 Iau ga bul, ma go iau tar patuan; Ma pa iau gire ta tena takodo ba i ki kaina, Ma ra umana bul mur tana pa dia lulul upi ra adiat.
26 I varvarmari vatikai, ma di kakail pirana, Ma ra umana bul mur tana dia ti doan.
27 Una vana irai kan ra kaina, ma una pait ra boina ka; Damana una ki bulu vatikai.
28 Tago ra Luluai i mainge ra takodo na varkurai, Ma pa i vana kan kana umana tena lotu. I balaure vatikene pa diat. Ma ra umana bul mur kai ra lavur tena varpiam diat a virua ka.
29 A umana tena takodo diat a kale pa ra gunan, Ma diat a ki tana pa na mutu.
30 A ngie i ra tena takodo i vaarike ra kabinana, Ma ra karameana i vatang ra varkurai i takodo.
31 A vartovo kai kana God i ki ta ra nuknukina, Ma a kakene pa na tagalir.
