15 Kadia pakat na vinarubu na go ra bala i diat iat, Ma kadia umana panak diat a tabubur boko.
16 Ra paupau magit kai ra tena takodo I boina ta dir ma ra peal tabarikik kai mangoro na tena varpiam.
17 Tago ra lima i ra umana tena varpiam na tabubur boko, Ma ra Luluai i tukatukal ra umana tena takodo.
18 A Luluai i nunure ra lavur bung kadiat dia ko tuna, Ma kadia tiniba na tur pa na mutu.
19 Vakir diat a vavirvir ta ra kaina e, Ma ta ra e na mulmulum diat a maur uka.
20 A umana tena varpiam diat a virua ka, Ma ra umana ebar kai ra Luluai diat a da ra minamar i ra umana pia na vura, Diat a panie; da ra mi diat a panie muka.
21 A tena varpiam i dinau, ma pa i babali mulai, Ma ra tena takodo i varvarmari ka, ma i varvartabar.
22 Tago diat ba ra Luluai i vadoane diat dia kale pa ra gunan, Ma diat ba i tata vabilak diat diat a virua.
23 Ba ra Luluai i vapadikat ra vinavana kai tika na tutana, Ma ba i gugu ta kana vinavana,
24 A dovotina ba i bura, pa na kaina kakit, Tago ra Luluai na vatur ia ma ra limana.
25 Iau ga bul, ma go iau tar patuan; Ma pa iau gire ta tena takodo ba i ki kaina, Ma ra umana bul mur tana pa dia lulul upi ra adiat.
26 I varvarmari vatikai, ma di kakail pirana, Ma ra umana bul mur tana dia ti doan.
27 Una vana irai kan ra kaina, ma una pait ra boina ka; Damana una ki bulu vatikai.
28 Tago ra Luluai i mainge ra takodo na varkurai, Ma pa i vana kan kana umana tena lotu. I balaure vatikene pa diat. Ma ra umana bul mur kai ra lavur tena varpiam diat a virua ka.
29 A umana tena takodo diat a kale pa ra gunan, Ma diat a ki tana pa na mutu.
30 A ngie i ra tena takodo i vaarike ra kabinana, Ma ra karameana i vatang ra varkurai i takodo.
31 A vartovo kai kana God i ki ta ra nuknukina, Ma a kakene pa na tagalir.
32 A tena varpiam i kiki uai upi ra tena takodo, Ma i mainge na ub ia.
33 Ra Luluai pa na nur tar ia ta ra limana, Ma pa na kure vakaina ba di varkurai.
34 Una ki nunur tai ra Luluai, ma una mur kana nga, Ma na vangala pa u pi una kale.pa ra gunan; Ba ra umana tena varpiam dia virua una gire.
35 Iau tar gire ra tena varpiam ba i varvaburut na kaia, Ma i lulul da ra davai i lubalubang ta kana pia iat.
36 Ma ba iau vana pakit, gire, pa i tur mulai. Maia, iau ga tikatikan upi ia, ma pa iau na tadav ia.
37 Una nuk pa ra tutana i ko tuna, ma una gire ra dovot na tutana; Tago a tutana na malmal na vatur vake ra umana bul mur.
38 Ma ra umana tena vana rara diat a virua varurung, Ra umana bul mur ta diat, da vamutue diat.
39 Ma ga ra valavalaun kai ra umana tena takodo i arikai tai ra Luluai; Ia iat kadia pal na bakbakit ta ra e na purpuruan.