11 Aleha sikaďal tu the caľi tiri partija, hoj pes vzburinďan pro RAJ. Ko hin o Aron, hoj reptinen pre leste?”
12 Akor o Mojžiš diňa te vičinel le Datan the le Abiram, le Eliaboskere čhaven. Ale on odphende: “Na džas!
13 Hin ada frima, hoj amen iľal avri andral e phuv, kaj čuľal o thud the o medos, hoj te meras pre kadi pušťa? So, mek kames te ačhel upral amende sar raj?
14 Se na anďal amen andre phuv, kaj čuľal o thud the o medos, a aňi amenge na diňal andro ďeďictvos o maľi the o viňici. Kames amenca te thovel avri? Na! Na džas!”
15 Akor o Mojžiš igen choľisaľiľa a phenďa le RAJESKE: “Ma prile lendar o obeti. Aňi jekhe somaris lendar na iľom. Ňikaske ňič nalačho na kerďom!”
16 Paľis o Mojžiš phenďa le Korachoske: “Tu tira partijaha the o Aron mušinen te avel tajsa andre le RAJESKERO Sentno Stanos.
17 Dojekh tumendar mi lel peskeri kaďidloskeri lopatka, mi thovel andre o kaďidlos a mi anel anglo RAJ. Savore kaďidli ena jekhetane 250. The tu le Aronoha lena peskere kaďidloskere lopatki.”
18 Avke pre aver džives peske sako iľa peskeri kaďidloskeri lopatka, thoďa andre o jagale angara a thoďa upre o kaďidlos. Paľis pes savore ačhade paš o vudar ko Sentno Stanos jekhetane le Mojžišoha the le Aronoha.
19 O Korach zvičinďa caľa peskera partija pro Mojžiš the Aron a gele paš o vudar ko Sentno Stanos. Androda pes sikaďa le RAJESKERI slava savore manušenge.
20 O RAJ phenďa le Mojžišoske the le Aronoske:
21 “Džan pre sera kale manušendar, hoj len takoj te zňičinav!”
22 Akor sodujdžene pele le mujeha pre phuv a vičinenas: “Ó, Devla! Tu sal o Del, savo des o dživipnaskero dichos dojekhe manušes! Vaš jekh manuš, savo kerďa binos, kames te el choľamen pre savore manuša?”
23 O RAJ phenďa le Mojžišoske:
24 “Phen le manušenge, hoj te džan pre sera le Korachoskere, le Datanoskere the le Abiramoskere stanendar!”
25 Avke o Mojžiš geľa ko Datan the Abiram a o Izraeloskere vodci džanas pal leste.
26 Le manušenge phenďa: “Džan pre sera kale bijedevleskere muršengere stanendar! Ma chuden pes ňisostar, so hin lengero, hoj te na meren vaš savore lengere bini.”
27 Avke o Izraeliti odgele pašal o Korachoskere, Datanoskere the le Abiramoskere stani. Paľis o Datan the o Abiram gele avri andral lengere stani a ačhenas paš o vudar peskere romňenca the čhavenca.
28 O Mojžiš phenďa: “Ňič na kerav mira voľatar; savore kale skutki man bičhaďa te kerel o RAJ. Prindžarena oda pal kada:
29 Te kala manuša merena avke, sar merel dojekh manuš, abo te pes lenge ačhela oda, so pes šaj ačhel avre manušenge, akor man o RAJ na bičhaďa.
30 Ale te o RAJ kerela vareso ajso, so mek pes šoha (ňikda) na ačhiľa angloda, hoj e phuv phundravela peskero muj a chala len savoreha, so len hin, a te perena tele andro than le mulengero džide, akor prindžarena, hoj kala murša tele dikhle le RAJES.”
31 Soča o Mojžiš kada dophenďa, phundraďa pes e phuv tel o Datan the Abiram
32 a otkerďa peskero muj a zľiginďa len savoreha, so len sas, jekhetane ole manušenca, save pes vzburinde le Korachoha.
33 Džide pele tele andro than le mulengero savoreha, so len sas. E phuv pes upral lende zaphandľa, on našľile a imar na sas maškar o manuša.
34 Sar savore Izraeliti, save sas pašal lende, šunde lengero vriskišagos, denašenas a phenenas: “Denašas, hoj the amen e phuv te na zľiginel!”
35 Akor le RAJESTAR avľa jag a zlabarďa ole 250 muršen, save ande o kaďidlos.
