6 andral o kmeňos Juda o Kaleb, le Jefunnoskero čhavo;
7 andral o kmeňos Jissachar o Jigal, le Jozefoskero čhavo;
8 andral o kmeňos Efrajim o Hošeah, le Nunoskero čhavo;
9 andral o kmeňos Benjamin o Palti, le Rafuoskero čhavo;
10 andral o kmeňos Zebulun o Gaddiel, le Sodioskero čhavo;
11 andral o kmeňos Jozef (so hin o kmeňos Menašše) o Gaddi, le Susioskero čhavo;
12 andral o kmeňos Dan o Ammiel, le Gemalliskero čhavo;
13 andral o kmeňos Ašer o Setur, le Michaeloskero čhavo;
14 andral o kmeňos Naftali o Nachbi, le Vofsiskero čhavo;
15 the andral o kmeňos Gad o Geuel, le Machioskero čhavo.
16 Kala hine o nava le muršengere, saven o Mojžiš bičhaďa te predikhel e phuv. O Mojžiš diňa le Hošeoske, saveske sas dad o Nun, nav Jozua.
17 Sar len o Mojžiš bičhavelas te predikhel e phuv Kanaan, phenďa: “Kadarik džan prekal e pušťa Negev andre brehengeri phuv.
18 Dodžanen tumen, savi hiňi e phuv a save manuša andre bešen. Či hine zorale vaj slabe? Hine but vaj frima?
19 Hiňi odi phuv lačhi vaj na? Hin lengere fori phundrade, abo hin pašal o muri?
20 Anen o maľi uľipen a hin ode stromi vaj na? Keren savoro pre oda, hoj te anen varesavo ovocje andral odi phuv.” Sas oda andro časos, sar pes ešebnovar (peršovar) andro berš obkidel o hroznos.
21 Avke on gele a predikhle e phuv la pušťatar Sin dži ko foros Rechob, paš o verchengero drom Chamat.
22 Avle andro Negev, odarik gele andro foros Hebron, kaj bešenas le Anakoskere potomki: o Achiman, Šešaj the o Talmaj. (O Hebron sas ačhado efta berš sigeder sar o foros Coan andro Egipt.)
23 Sar doavle andre Dolina Eškol, ode odčhinde jekh strapcos hroznos, so sas ajso pharo, hoj les mušinenas te anel duj džene pro drukos. Ande the vajkeci granatoskere phaba the figi.
24 Oda than pes vičinelas Dolina Eškol pal o strapcos le hroznostar, so ode o Izraeliti odčhinde.
25 Saranda (40) dživesa predikhenas odi phuv a paľis avle pale.
26 Avle ko Mojžiš, Aron the Izraeliti andro Kadeš pre pušťa Paran. Phende lenge, so ode dikhle, a sikade o ovocje, so odarik ande.
27 Phende le Mojžišoske: “Predikhľam e phuv a dodžanľam pes, hoj hiňi lačhi a čačes ode čuľal o thud the o medos. Kada ovocje hin odarik.
28 Ale o manuša ode hine zorale, o fori hin bare a pašal lende zorale muri. Dikhľam ode the le Anakoskere potomken.
29 O Amaleka bešen pre južno sera; o Chetitana, Jebuseja the Amoreja bešen pre brehengeri phuv a o Kanaančana bešen paš o moros the pašal o paňi Jordan.”
30 Ale o Kaleb kamelas, hoj te preačhen te vakerel ola manuša, save reptinenas pro Mojžiš, a phenďa: “Aven, džas pre lende a zalas odi phuv! Amen len domaraha!”
31 Ale okla džene, save sas leha te predikhel e phuv, phenenas: “Našťi pes lenca džas te marel, bo hine zoraleder sar amen.”
32 On kavke maškar o Izraeliti ľidžanas o nalačho hiros pal odi phuv. Phenenas: “Odi phuv, so predikhľam, chal le manušen, save andre bešen. Savore manuša, saven ode dikhľam, hine igen bare.
